Byggðakvóti

Nú loksins hefur bæjarstjórn Vesturbyggðar tekist að úthluta byggðakvótanum til Bíldudals, en það var gert á bæjarstjórnarfundi þann 28. janúar 2008.  Sá sem fékk þennan byggðakvóta var fyrirtækið Perlufiskur ehf. á Patreksfirði og rökin voru eftirfarandi "Helsturökin fyrir niðurstöðunni eru þau að Perlufiskur er í rekstri þ.e.s. fiskveiðum og fiskvinnslu og hefur bent á tvö útgerðarfyrirtæki í Vesturbyggð sem munu tengjast fyrirhugaðri starfsemi og hefur sérstöðu  í þessu tvennu umfram þá aðila aðra sem hafa sýnt því áhuga að hefja fiskvinnslu á Bíldudal með tilstyrk þessa byggðakvóta sem eru til úthlutunar hjá bæjarstjórn." Svona hljóðaði bókunin sem gerð var á þessum fundi.  Ég skrifaði grein í blaðið Bæjarins Besta á Ísafirði þann 27. desember 2007 um þetta mál og sagði þar að þetta fyrirtæki Perlufiskur ehf. fengi þennan byggðakvóta og gerði bæjarstjóri Vesturbyggðar strax sama dag athugasemd við mín skrif og sagði að þetta væri rangt.  Hann hefði betur sleppt því að gera þessa athugasemd því þótt Perlufiskur hefði ekki þá verið búið að fá byggðakvótann er það fyrirtæki búið að fá hann í dag.  Ekki kemur fram hjá bæjarstjórn hvaða tvö útgerðarfyrirtæki í Vesturbyggð muni tengjast þessari starfsemi á Bíldudal.  En ég vil óska Perlufiski til hamingju að hafa loksins fengið þennan kvóta og vona að honum gangi vel með sinn rekstur á Bíldudal og loksins komi að því að fólk á Bíldudal fái vinnu.  Hins vegar verð ég að gagnrýna bæjarstjórn fyrir hennar vinnubrögð og að ekki skuli allir sem sóttu um þennan byggðakvóta hafa setið við sama borð við þessa úthlutun.  Ég var einn af þeim sem sótti um þennan byggðakvóta og í bréfum mínum til forseta bæjarstjórnar Vesturbyggðar skýrði ég honum frá því að við værum nokkrir aðilar hér í Sandgerði sem værum að sameina þrjú útgerðarfyrirtæki í eitt og hefðum fullan áhuga á að koma með þá starfsemi til Bíldudals.  Okkar fyrirtæki hefur yfir að ráða um 1.700 tonnum í krókaaflamarki (Litla kerfinu) og um 1.800 tonn í aflamarki (Stóra kerfinu) 4 krókaaflamarksbáta, þar af 3 nýlega yfirbyggða 15 tonna plastbáta með beitningarvél og 2 báta í hinu kerfinu, einn yfirbyggðan stálbát með beitningarvél og einn stálbát sérútbúin á dragnót.  Einnig kom fram að eitt af þeim sjávarútvegsfyrirtækjum sem sterk geta talist á Vestfjörðum ætlaði að koma inn í þetta með okkur.  Við vorum aldrei beðnir um neinar meiri upplýsingar.  Heldur er okkur einfaldlega hafnað, kannski mat bæjarstjórn það svo að við værum með of mikinn kvóta, of marga báta og því hentaði það ekki Bíldudal því þar yrði of mikil vinna.  En þar sem er mikil og trygg vinna er öruggt að þá kemur fólkið.  Við vorum að hugsa um að rífa Bíldudal úr þeirri miklu lægð sem staðurinn hefur verið í undanfarin ár og í stað fólksfækkunar kæmi fólksfjölgun.  Ansi er ég nú hræddur um að erfitt verði að byggja upp atvinnulífið á Bíldudal með einum kvótalausum smábát þótt hann hafi fengið byggðakvóta og ekki mun það leiða til fólksfjölgunar á staðnum aðeins hægja á fólksfækkuninni.  En vonandi tekst það vel og ekki vil ég draga kjarkinn úr þessum unga manni sem nú ætlar að ráðast í þetta stórverkefni.  Við félagarnir hér í Sandgerði þurfum ekki að hafa neinar áhyggjur og höldum bara áfram að efla okkar starfsemi, en sem fyrrverandi íbúa á Bíldudal finnst mér leitt að Bíldudalur fái ekki að njóta þess, að fá allan þann aflakvóta og alla þá báta sem við höfum yfir að ráða, en því verður ekki breytt úr því sem komið er.  Við vorum búnir að leggja mikla vinnu í þetta verkefni og tryggja okkur örugg bankaviðskipti einmitt hjá sterkasta sparisjóði landsins sem er Sparisjóðurinn í Keflavík og Vestfirðingar virðast ekki vilja fá á sitt svæði og að því mér skilst vegna andstöðu á sunnanverðum Vestfjörðum.  Er sjálfseyðingarhvötin orðin allri heilbrigðri skynsemi yfirsterkari og ekkert má lengur byggja þarna upp eða styrkja þessar byggðir.  Hvar á þetta að enda?


« Síðasta færsla | Næsta færsla »

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Höfundur

Jakob Falur Kristinsson
Jakob Falur Kristinsson

Ég er fyrrverandi vélstjóri og útgerðarmaður en er nú 75% öryrki eftir slys á sjó 2003. Bjó lengst af á Bíldudal en flutti til Sandgerðis haustið 2005.  En er nú aftur fluttur á Bíldudal.  Að svo miklu leyti sem myndir á síðunni eru eftir Mats Wibe Lund, þá liggur fyrir tímabundið samþykki hans um birtingu hjá mér og þakka ég honum sérstaklega fyrir.  Mats á að sjálfsögðu hönundaréttin að öllum sínum myndum.  Vilja menn sjá fleiri myndir þá vísast á www.mats.is  Ég  var flokksbundinn í Frjálslynda flokknum og hef starfað þar, en sagði mig úr flokknum 24. apríl og gekk í Samfylkinguna.  Föðurætt mín er úr Arnarfirði og móðurættin frá Jökulfjörðum og Hornströndum og í báðum tilfellum, langt aftur í aldir.  Er ég því ekta Vestfirðingur.

Undir fyrirsögninni Færsluflokkar er flokkur sem heitir Vefurinn og ef smellt er á hann opnast síður þar sem ég er að skrifa ýmsar frásagnir.  Einnig er undir liðnum spaugilegt smá grín ofl. 

Ég leyfi öllum að skrifa athugasemdir við mín skrif.   En af gefnu tilefni hef ég ákveðið að þeir sem ekki kunna sér hófs í athugasemdum og nýta þær til persónulegra árása á mig og mína persónu, með allskonar skömmum og svívirðingum, mun ég hér eftir loka á slíka aðila.  Einnig mun ég henda út nafnlausum athugasemdum.  Því ég einn ber ábyrgð á því sem skrifað er á mína síðu.

jakobkr@internet.is     

GSM: 823-2954

Bloggvinir

Innskráning

Ath. Vinsamlegast kveikið á Javascript til að hefja innskráningu.

Hafðu samband