Af hverju er staða Vestfjarða svona slæm ?

Það vita flestir að staða Vestfjarða í dag er ekki nógu góð og hvers vegna ætli svo sé?

Svarið er einfallt:  Alltaf þegar gera hefur átt eitthvað til að bæta stöðu Vestjarða er aldrei samstaða um eitt né neitt.  Á árunum 1980-1990 voru blóma tímar á Vestfjörðum, mikil vinna og góð laun, en nú er þetta allt horfið og það sem verra er er það að uppgjöf og örvænting er farin að koma fram hjá íbúum á Vestfjörðum.  Ef ekkert verður gert verða Vestfirðir komnir í eyði á næstu 15-20 árum.  Þingmenn lofa og lofa en standa ekki við neitt og allt er gert til að niðurlægja Vestfirði og nú síðast með því að láta sjómenn fara að mála einhver hús og örugglega á litlum launum.

Vestfirðir byggðust upp og öll þorpin urðu til vegna nálægðar við góð fiskimið og þegar ekki má nýta þau lengur er grundvöllur byggðar hruninn.  Vestfirðir eiga mikið inni hjá stjórnvöldum þessa lands og vilja nú fá það til baka.  En þar sem vitleysingar stjórna Íslandi er besti kosturinn að stofna sjálfstætt ríki o losna undan oki þessara háu herra.  Bæjarstjórinn á Ísafirði er svo mikið íhald að hann dansar eftir öllu sem frá íhaldinu kemur og veit það ekki á gott og mun ekki efla Vestfirði.

Hér þarf nýja hugsun og fólk sem vill berjast fyrir Vestfirði, það gengur ekki að sitja bara á rassgatinu og gera ekki neitt.  Vestfirðir eiga ekki að sætta sig við að fá aðeins litla mola sem detta af borði stjórnarhnerrana á Íslandi.  Enda hefur fólksflóttinn verið gífurlegur frá Vestfjörðum á undanförnum árum.

Þessu verður að breyta og snúa þróuninni við og það er hægt og mun verða gert.  En mig tekur sárt að heyra frá sumum sem enn eru búsettir á Vestfjörðum, að þetta sé vonlaust verk og bara draumórar sem aldrei verða framkvæmdir.

Það er að vísu rétt að hugmyndir eru draumórar á meðan enginn framkvæmir þær, en það er einmitt það sem við í BBV-Samtökunum ætlum að gera þ.e, framkvæma þessar hugmyndir og gera Vestfirði að sæluríki þar sem allir vilja búa.  En fyrst verðum við að losna frá allri vitleysunni á Íslandi og stofna sjálfstætt ríki og þá fer boltinn fyrst að rúlla og eins og snjóbolti vindur hann upp á sig við hvern snúning og störfin fara að streyma til Vestfjarða og miklar framkvæmdir eru fram undan.  Fólk mun hópast til Vestfjarða og þar munu flestir vilja búa.

Við ætlum ekki að láta sjómenn mála hús, þeirra hlutverk er að veiða fisk og ef aflakvóta verður skipt á milli Íslands og Vestfjarða eftir okkar hugmyndum mun ótrúlega stór hluti koma í hlut Vestfjarða og til viðbótar koma milljarðar í uppbyggingu og framkvæmdir.  Nú þegar hefur þýskt fyrirtæki boðist til að grafa skipaskurðinn og verður það gert næsta sumar.

Góðir Vestfirðingar. þið verðið að treysta okkur í þessum málum og vera þolinmóð á meðan við erum að vinna okkar verk, sem við erum að vinna í fullri alvöru og gefum ekkert eftir og ekki snúast á móti okkur vegna pólitískra skoðana.  Þetta er alvöru mál og ekki neitt til að grínast með.

Og áfram með fríríkið Vestfirði..............................

Jakob Kristinsson

Athugasemdir

[Guðrún Emilía Guðnadóttir, 30.3.2008 kl. 10:20]

Það hefði nú farið best á því þegar borgarbúar töngluðust á því hér fyrir tugum ára, að best væri að skera vestfirði burt frá landinu,
en nota bene það gerðu þeir ekki því að, Vestfirðir sköffuðu svo mikið í ríkiskassann. nú skalt þú ekki vera bjartsýnn á að eitt eða neitt takist að gera. ÉG SKAL SEGJA ÞÉR AF HVERJU: ,, Það er vegna þess að Íslendingar eru löngu sofnaðir á verðinum og nenna ekki að standa í stórræðum, þægilegra er að láta þessa blessaða ráðamenn, þú veist þessa sem sjá ekki fátæktina og horfa yfir sorann, ráða sínum málum og hokast síðan bara áfram og skilja ekkert í því hversu erfitt er að lifa. Hvenær ætlar fólk að standa með sjálfum sér, og skilja að það er í lagi að tjá sig, mótmæla og framkvæma.
Svei þeim sem velja virðingaleysið gagnvart sjálfum sér.
                                Góðar kveðjur til þín Jakob.
                                                Milla.

[Ásthildur Cesil Þórðardóttir, 30.3.2008 kl. 13:33]

Já við verðum að gera eitthvað í þessu, og reyna að rífa fólk upp á rassinum. 

[Sigurður Jón Hreinsson, 30.3.2008 kl. 18:42]

Ég hef oft hugsað það undanfarið, að við Vestfirðingar værum betur settir undir stjórn annara en Reykvíkinga.  Jafnvel held ég að Danir væru sanngjarnari við okkur.  Ég vil endilega að þetta mál verði skoðað með fullri alvöru í huga.  Hinsvegar set ég spurningamerki við þá hugsun, að landfræðilegur aðskilnaður frá Íslandi sé einhver forsenda fyrir framkvæmd fullveldis.  Það er alltént öfugsnúin sýn að hópur fólks með náttúruvernd að leiðarljósi, vilji standa fyrir mesta jarðraski Íslandssögunnar.

[Sigurður Þórðarson, 30.3.2008 kl. 19:32]

Ég er kannski hlutdrægur en læt samt eftir mér að segja að greinin hans bróður míns (sigurjóns) í Fréttablaðinu í dag var góð.

[Jakob Falur Kristinsson, 31.3.2008 kl. 11:33]

Landfræðilegur aðskilnaður er nauðsynlegur Sigurður Jón, því að á því byggist skipting aflakótans á milli Vestfjarðar og Íslands.  Þetta verður ekki mesta jarðrask Íslandssögunnar, hefur þú aldrei heyrt talað um Kárahnjúkavirkjun og allt jarðraskið þar.

Það er rétt hjá þér Milla, að alltof margir nenna ekki að standa í neinum og láta bara valtra yfir sig á skítugum skónum.  En öllu er hægt að breyta og ég spái því að lata fólkið verði eftir á Íslandi en það duglega á Vestfjörðum.  Það hefur að vísu ekki skeð mikið enn hjá okkur sem erum að vinna að stofnun fríríkisins Vestfirðir, en orð eru til alls fyrst og síðan kemur að framkvæmdum.  Þetta skal takast að lokum.

[Aida., 31.3.2008 kl. 14:50]

Eg vona það svo sannarlega og er ég reiðubúinn.

[Jakob Falur Kristinsson, 31.3.2008 kl. 16:34]

Já arabia, þetta kemur og það verður að hafa það í huga að það er ansi mikið verk að stofna nýtt ríki.  Við sem erum í undirbúningshópnum höfum þó alla veganna komið góðri hreyfingu á þetta mál.  Nú þarf að ráða allskonar sérfræðinga til að skipuleggja þetta og koma þessu á umræðugrundvöll við ríkisstjórn Íslands.  Eins þarf að kynna málið betur á Vestfjörðum og sýna hvaða kostir eru í boði.  Það eru því miður alltof margir á Vestfjörðum, sem sjá ekkert nema þessa olíuhreinsistöð.  En hingað til hefur enginn getað svarað því hvaða olíu á að hreinsa.  Hún á bara að koma einhverstaðar frá og er alveg dæmigert um allt ruglið varðandi þessa stöð, sem ALDREI verður reist Sem betur fer.

[Sigurður Jón Hreinsson, 31.3.2008 kl. 21:37]

Varðandi landfræðilegann aðskilnað, þá tíðkast það víða um heim að vera með landamæri á landi.  Ég get ekki séð að það breiti neinu til þess að gera fríríkið trúverðugt, hvort að það er aðskilið með sjó eða girðingu.

Og aðeins varðandi magntölur.  Ég get ekki betur séð en að auðveldasta leiðin til að skilja Vestfirðina frá Íslandi væri að grafa upp Krossárdal úr Bitrufirði og upp Kleifaá frá Gilsfirði.  Samtals eru það tæpir 15km og mesta hæð frá sjó 260m.

• Miðað við 20m breiðann skurð niðri í botni.
• Miðað við 10m djúpann fyrir skipaumferð
• =
• Ef það er lóðrétt grafinn skurður er efnismagn 8,6 milljón m3
• =
• Ef fláginn á skurðinum er 30° er efnismagnið 255,2 milljón m3

Til samanburðar er efnismagnið í öllum stíflum Kárahnjúkavirkjunar 13,6 milljón m2. 

Mjög varhugavert er að grafa jafn stórann skurð með minni flága en 30°, með tilliti til slysahættu.

Þá er samt nokkrum spurningum ósvarað. 

1. Hvað á að gera við allt þetta efni? 
2. Hver er raunverulegur tilgangur með framkvæmdinni? 
3. Hver er kostnaðurinn af framkvæmdinni og hver er ágóðinn?

Nokkur dæmi um svör.

1. 250 milljón m3 af jarðveg myndu nægja til að þekja allt höfuðborgarsvæðið með 2m þykku lagi.  Óvíst er að allur Bitrufjörðurinn dugi til að taka við öllu því efni.
2. Ef hugsunin er að gera þetta skipagengt er 20 m breidd og 10 m dýpt tæplega nóg.  Auk þess er Breiðafjörðurinn ekki sá heppilegasti til stórskipasiglinga.  Fullvíst má telja að gríðarlegur straumur verði um skurðinn og því má slá föstu að núverandi Gilsfjarðarbrú muni ekki þola slík átök.  Ef hugsunin er eingöngu að nýta þetta til að virkja, er vert að menn íhugi aðrar, ódýrari og umhverfisvænni leiðir.
3. Ef 250 milljón m3 er endanlegt efnismagn og verð á rúmmeter er 200 kr/m3 er summan 50 milljarðar.  Nú veit ég ekki hvaða verð menn eru að leika sér með og verð að byðja um að fá það upp á borðið.  Ég þykist hinsvegar vita það að fyrir þessa upphæð mætti gera mikinn skurk í vegamálum í fjórðunginum, einhvað sem mindi skila sér margfallt.

 Mér þykir leiðinlegt að vera boðberi slæmra tíðinda.  Hugmyndin um landfræðilegann aðskilnað með skurði er mjög slæm og verður ekki séð að það tryggji stöðu okkar neitt betur en girðing.

Þó svo að mér líki hugmyndin um fríríki mjög vel og væri vel tilbúinn að koma að slíku máli, meðeinhverjum hætti, þá verð ég að benda þér Jakob og öðrum í þessum hópi á eina staðreynd: 

Trúverðugleiki hugmyndarinnar er fallinn með hugmyndinni um skurð.

Landamæri, ekkert mál. 

[Rósa Aðalsteinsdóttir, 31.3.2008 kl. 23:24]

Sæll Sigurður Jón.

Þakka þér fyrir þitt sjónarmið. Ég sé að þú hefur lagt heilmikið í innleggið og er það virðingarvert. Við sjáum hvað setur en núna þurfum við að kynna sjónarmiðin okkar rækilega fyrir Vestfirðingum. Margir þeirra eru með sömu sjónarmið að þeir eru búnir að fá nóg af afskiptaleysi forráðamanna á Íslandi og við vitum að Vestfirðingar hafa skaffað vel fyrir c.a. 20 - 25 árum. Þegar ég var stundum að ferðast um þarna á þeim árum gat ég ekki séð þá uppbyggingu sem hefði verið eðlileg miðað við hvað var lagt í sjóði ríkisins frá Vestfjörðum.

Baráttukveðjur til Vestfirðinga/Rósa

[Jakob Falur Kristinsson, 1.4.2008 kl. 08:40]

Sigurður Jón,

Þessar pælingar þínar eru komnar langt út fyrir það sem ég hef vit á og ég hef bent á í mínum skrifum að nú er komið að því að ráða í vinnu hóp sérfræðinga til að útfæra hugmyndina nánar.  Hlutverk okkar í undirbúningshópnum var að koma af stað hreyfingu og umræðu um þessi mál.  Í mínum huga skiptir það ekki höfuðmáli hvort landamæri eru með skipaskurði eða girðingu.  Og sem fyrrverandi sjómaður var ég með talsverðar áhyggjur af hafstraumum ef skurður yrði grafinn.  Því hvergi á landinu er eins mikill munur á flóði og fjöru og við Breiðafjörð og að sama skapi er slíkur munur minnstur við Húnaflóa, ég get alveg verið sá maður að viðurkenna ef eitthvað í mínum skrifum er ekki raunhæft.  Aðalatriðið í mínum huga er að stofna fríríkið Vestfirðir sem fyrst.  Það er alla veganna kominn hreyfing á hlutina og þá er komið að útfæra þetta betur.

[Rósa Aðalsteinsdóttir, 1.4.2008 kl. 09:43]

Sæl öll.

Skipaskurðir hafa verið stallaðir og þá þarf ekki að hafa áhyggjur af þeim mikla mismun sem er á flóði og fjöru annars vegar í Breiðafirði og hins vegar í Húnaflóa.

Sérfræðingar geta skorið úr því hvort sé vit í þessu eða ekki? Nú ef skipaskurðurinn yrði stallaður þá þarf minna að grafa og þá myndi sparast miklir flutningar á uppgreftri hvort sem farið væri með uppgröftinn á haf út eða eitthvað annað?

Frí-ríkið á Vestfjörðum er aðalatriðið.

Baráttukveðjur/Rósa

[Sigurður Jón Hreinsson, 1.4.2008 kl. 09:44]

Ég er ekki að reyna að draga úr ykkur kjarkinn, en ég verð að vara ykkur við því að setja góða hugmynd í samhengi við vonda hugmynd.  Hvort að mínir útreikningar séu alveg réttir, veit ég ekki en þeir eru amk nálgun og sú nálgun er svakaleg.

[Sigurður Jón Hreinsson, 1.4.2008 kl. 12:29]

Rósa, stallaðir skipaskurðir byggja á því að vera með vatnsmiklar ár í nágrenninu, eins og td, Panamaskurðurinn.  Því er ekki að heilsa í þessu tilfelli.  Auk þess er Breiðafjörðurinn ekki það djúpur að skipaumferð verði eftirsóknaverð, í einhverju magni.  Hvergi á Íslandi yrðu meiri líkur á skipsskaða en einmitt á slíkri siglingarleið.  Svo þarf að vera beinn fjárhagslegur ávinningur af svona framkvæmdum til að þær séu fýsilegar fyrir framkvæmdaaðila og lánveitendur.  Hvort skipaumferð þessa leiðina yrði nóg, finnst mér mjög ósennilegt.

Að öðru leiti er hugmyndin um fríríkið Vestfirði, góð.  Ekki skemma hugmyndina með einhverjum óþarfa.

[Rósa Aðalsteinsdóttir, 1.4.2008 kl. 13:42]

Sæll Sigurður Jón.

Baráttukveðjur til þín.

Rósa.

[Jakob Falur Kristinsson, 1.4.2008 kl. 15:34]

Það er rétt hjá þér Sigurður Jón, að það má ekki eyðileggja hugmyndina um fríríkið Vestfirði með slæmum hugmyndum.  Þetta verður nógu erfitt samt.  Ég hef sagt það áður og get sagt það aftur að við verðum að vanda hvert skref í þessu máli.  Og ekki vera með neinar vitleysu í því sambandi, því þá er hætt við að aldrei neitt úr neinu.  Næsta skref er að kynna þetta fyrir Vestfirðingum og fara af stað með fundaherferð.  Ég hrökk talsvert við þegar ég las í blaðinu Bæjarins besta á Ísafirði ásakanir á okkur í undirbúningshópnum og sagt að við værum með draumóra og jafnvel undir áhrifum eiturlyfja og það eina sem yrði Vestfjörðum til bjargar væri þessi olíuhreinsistöð sem mun fljótlega menga allt lífríkið á Vestfjörðum og seinna á landinu öllu.  Þessi mengun fer í fiskinn og eins og flestir vita þá syndir hann um allan sjó og fer víða.  Landbúnaður mun leggjast af og enginn þjóð mun vilja kaupa okkar afurðir, nema kanski álið og verður það sennilega það eina sem við höfum til að flytja út.  Eyðileggingin verður gríðarleg og ekki réttlætanleg til að bjarga Vestfirðingum.  Það er verið að tala um 500 störf en þetta mun þá verða einhver risastöð, því þar sem ég hef kynnt mér þessi mál, þá starfa í svona stöð 40-50 manns.  Síðan eru allar þessar stöðvar reknar með bullandi tapi nema þar sem hægt er að tengja þær beint við þann stað þar sem hráolíunni er dælt upp.  Þannig að þessi störf verða ansi dýru verði keypt.  Ég vil benda á grein sem Magnús Þór Hafsteinsson skrifaði á sinni blogg-síðu, en þar er hann að velta fyrir sér hvar eigi að fá olíu til að hreinsa en þeirri spurningu hefur enginn getað svarað ennþá.  Þetta er rugl og aftur rugl.

[Jakob Falur Kristinsson, 12.4.2008 kl. 11:22]

Já Erlingur, það er fínt að búa fyrir vestan, þar átti ég heima í 55 ár.  En núverandi ástand er að leggja Vestfirði í eyði og þá er nú ekki fínt að búa þarna.