Afsögn Guðna Ágústssonar

Nú hefur Guðni Ágústsson sagt af sér sem formaður Framsóknar og jafnframt þingmennsku.  Þetta kom öllum á óvart svo ekki sé meira sagt.  Það verður mikil eftirsjá af Guðna af Alþingi, bæði var kann skemmtilegur karakter og góður ræðumaður.  Nú tekur væntanlega Áldrottningin Valgerður Sverrisdóttir, varaformaður við sem formaður a.m.k. fram að flokksþinginu sem verður í lok janúar en ekki á ég nú von á því að hún muni ná þar kjöri sem formaður og má jafnvel þakka fyrir að ná kjöri inná þing í næstu kosningum.  Það skyldi þó ekki verða svo að Bjarni Harðarson verði sannspár, en hann sagði í þættinum Mannamál í gær að ef Guðni yrði undir í ákvörðun um aðild af ESB þá gæti restin af flokknum alveg eins gengið í Samfylkinguna.  Það er nokkuð ljóst að Guðni hefur metið stöðuna sem svo eftir miðstjórnarfund sl. laugardag að hann yrði undir og því tekið þessa ákvörðun.  Það er nokkuð broslegt að í öllum þeim hremmingum sem Ísland hefur nú lent í, þá hafa aðeins sagt af sér tveir menn og báðir úr Framsókn og úr sama kjördæmi og hvorugur bar nokkra ábyrgð á núverandi ástandi.  Þótt Guðni hafi að vísu verið í ríkisstjórn í tvö kjörtímabil með Sjálfstæðisflokknum þá var hann landbúnaðarráðherra og sem slíkur bar hann ekki neina ábyrgð á fjármálum þjóðarinnar.  Valgerður Sverrisdóttir var aftur á móti viðskiptamálaráðherra þegar bankarnir voru einkavæddir á sínum tíma og hefði hún frekar átt að segja af sér en Guðni.  Og að lokum;

Burt með allt spillingarliðið, hvar í flokki sem það stendur.

Athugasemdir

[Arnar Geir Kárason 18.11.2008 kl. 11:18]

Ég styð það heilshugar að bankarnir hafi á sínum tíma verið einkavæddir.   En ég græt það hvað eftirlitið með rekstri þeirra hefur verið lítið.

Það er að mínu mati ekki raunhæft að kenna þeim sem að einkavæddu bankana um sök að þessu máli.  Það væri mikið nær að skella sökini á fjármálaeftirlitið og fjármálaráðherra síðustu árin.

[Jakob Falur Kristinsson, 18.11.2008 kl. 11:45]

Sammála Arnar, eftirlitið brást algerlega.

[Árni Gunnarsson, 18.11.2008 kl. 12:21]

Og ég er ósammála ykkur báðum. Einkavæðing eins og hún var framkvæmd var dæmd til að mistakast. Enda var þessi útfærsla langt frá því að vera sú hugmynd sem lagt var upp með. Það þurfti afar dreifða eignarsamsetningu og ríkið átti að vera kjölfestufjárfestirinn sem alltaf var rætt um.

[Jakob Falur Kristinsson, 19.11.2008 kl. 15:01]

Einkavæðing bankanna hefði getað heppnast vel ef Einkavæðingarnefnd hefði sinnt sínu hlutverki en það gerði hún ekki og í kjölfarið sagði Steingrímur Ari Arason sig úr nefndinni vegna ágreinings og síðan var allt eftirlit með bönkunum í molum og því fór sem fór.