Nýtt land

Mohamed Nasheed, nýkjörinn forseti Maldíveyja, segist vilja kaupa nýja ættjörð handa íbúum landsins. Hann segir ljóst að íbúarnir verði á endanum að finna sér nýtt land þar sem hlýnun jarðar sé þess valdandi að yfirborð sjávar fari smátt og smátt hækkandi.

Ég held að við Íslendingar ættum að skoða þennan möguleika líka.  Við verðum í það minnsta að skipta um nafn á okkar landi ef við ætlum að vinna okkur aftur traust meðal þjóða heimsins.  Óbreytt getum við ekki haldið áfram að taka tril og heinsa upp eftir alla spillinguna og lygina.

Burt með allt spillingarliðið, hvar í flokki sem það stendur.

Vill fjárfesta í nýju landi handa þjóðinni

Ógnaði skipverjum

Lögreglan á Suðurnesjum handtók í kvöld ungan karlmann sem ógnaði skipverjum með hnífi um borð í bát í kvöld, sem bundin var við bryggju í Sandgerði. Félagar mannsins höfðu samband við lögregluna, sem óskaði eftir aðstoð sérsveitarinnar. Hún var hins vegar afturkölluð þegar maðurinn kom sjálfviljugur út úr bátnum.

Þetta er gott dæmi um alla reiðina sem er í þjóðfélaginu og er látinn bitna á saklausum aðilum.  Því verður krafan sífellt háværari;

Burt með allt spillingarliðið, hvar í flokki sem það er.

Ógnaði skipverjum með hnífi

Mótmæli

Nú kraumar óánægja sem aldrei fyrr í íslensku samfélagi og þarf engan að undra miðað við alla þá spillingu og sukk sem hefur verið í þjóðfélaginu undanfarin ár í svonefndu góðæri.  Nýríkir íslendingar flugu um allan heim og keyptu og keyptu og tóku gríðarleg lán fyrir.  Þessir aðilar voru nánast með óútfyllt tékkahefti frá íslensku þjóðinni til að greiða með.  Bankakerfið þandist út á ógnarhraða og tók öll þau lán sem þeir komust yfir.  Allt virtist vera hægt að framkvæma og menn sem enginn hafði heyrt talað um áður urðu moldríkir á einni nóttu.  Fyrirtæki gengu kaupum og sölum og hækkuðu stöðugt í verði.  Veisluhöld sem kostuðu hundruð milljóna voru daglegt brauð.  Ofurlaun forstjóra í fyrirtækjum þóttu sjálfsögð og eðlileg.  Mánaðarlaun fyrir nokkur hundruð þúsund voru nú bara eðlileg fyrir skúringarfólk og smápeð, topparnir þurftu tugi milljóna í laun á mánuði svo þeir væru teknir alvarlega.  Mörgum þessara auðmanna fannst fyrir neðan síðan virðingu að búa á Íslandi og margir keyptu sér rándýrar villur í London eða á Manhattan í New York og létu börn sín ganga í dýra einkaskóla.  En við minnsta vindblæ hrundi allt eins og spilaborg og í ljós kom að auðmennirnir áttu ekki neitt nema verðlausan pappír. Þeir nutu minni virðingar  en rónar í stórborgum erlendis.  En í skjóli eftirlitsleysis Seðlabanka Íslands, Fjármálaeftirlitsins ofl. aðila tókst þessu spillingarliði að skuldsetja Ísland sem nam margfaldri þjóðarframleiðslu.  Á einni nóttu varð Ísland skuldugasta land í heimi en hafði áður verið talið eitt það ríkasta.  Nú var komið að uppgjörinu og ríkið stofnaði Nýja banka á rústum þeirra gömlu og fyllti nýju bankanna af fólki úr þessu spillingarliði.  Það hefði verið auðvelt verk að hindra að bankarnir yrðu svona stórir ef Seðlabankinn hefði haft vit á að auka bindiskyldu bankanna hjá Seðlabankanum en stjórnendur þar voru nú ekki hæfari en það að í stað þess að auka bindiskyldu bankanna var hún felld niður.  Nú er sagt við þegna þessa lands að erfiðir tímar séu framundan og íslenska þjóðin verði að standa saman í að byggja allt upp á nýtt.  Við förum nokkur áratugi aftur í tímann hvað efnahagsmál varðar og stjórnvöld biðja um að ekki sé leitað af sökudólgum. 

Því er það mjög eðlilegt að mikil reiði sé kraumandi í þjóðfélaginu og það er nú einu sinni borgarlegur réttur hvers manns að mótmæla því sem honum ofbýður.  En þá verður fólk að gæta aðeins að sér.  Friðsamleg mótmæli með ræðuhöldum virka mjög sterk en ef mótmælin snúast uppí skrílslæti eins og skeði sl. laugardag þegar fólk grýtti eggjum ofl. í Alþingishúsið geta stórskaðað mótmæli og orðið vatn á myllu þeirra sem eru nú að verja núverandi ástand og eyðileggja hin raunverulegu mótmæli.  Svona atvik geta farið svo gjörsamlega úr böndunum að svo getur farið að einhver lætur lífið í átökum.

Nú mun Davíð Oddsson vera með sex lífverði alla daga og heimili hans er vaktað af lögreglu allan sólahringinn.  Það sama mun eiga sér stað með heimili Geirs H. Haarde en hann mun þó aðeins hafa einn lífvörð á daginn eins og þeir Árni Matthiessen fjármálaráðherra og Björgvin Sigurðsson viðskiptaráðherra.  Af hverju ætli þessir menn þurfi að hafa lífverði?  Eru þeir með því ekki að viðurkenna fyrir þjóðinni sína ábyrgð á því hvernig komið er.  Hér þar rækilega hreingerningu og byggja upp heilbrigt þjóðfélag að nýju, en það verður ekki gert með sömu mönnum og komu okkur í þessi vandræði.

Burt með allt spillingarliðið, hvar í flokki sem það er.

Tæknileg mistök

Það hefur oft verið nefnt undanfarið að tæknileg mistök hafi átt sér stað í bankakerfinu.  Þegar öll gögn um hlutafjárkaup Birnu Einarsdóttur bankastjóra hins Nýja Glitnis, fyrir 180 milljónir með láni frá gamla Glitnir, gufuðu upp voru það "tæknileg misstök" að kaupin fóru aldrei fram.

Fyrir nokkrum árum hafði Glitnir milligöngu um að fjármagna lán til nokkurra útgerðarmann sem voru að láta smíða ný fiskiskip erlendis.  Fjármagnið að upphæð sjö milljarðar fékk Glitnir að láni hjá norskum banka.  Nú hafa nær allir útgerðarmennirnir greitt lánin upp hjá Glitnir og áttu því greiðslurnar að duga til að Glitnir gæti greitt norska bankanum lánið sem hann fékk.  En við hrun Glitnis kom í ljós að norski bankinn átti enn inni hjá Glitnir sjö milljarða.  Bankinn hafði bara tekið við greiðslum frá útgerðarmönnunum en ekki greitt krónu af norska láninu.  Þegar spurt var af hverju þetta hefði skeð var svarið að um "tæknileg mistök" hefði verið að ræða.  Hvað ætli hafi verið mikið um álíka tæknileg mistök að ræða í öllu bankakerfinu?  Það veit enginn ennþá.  Og að lokum;

Burt með allt spillingarliðið, hvar í flokki sem það er.