Írak

Nú hefur utanríkisráðherra ákveðið að kalla heim þann eina íslending sem eftir er í friðargæslu í Írak en friðargæsluliðinn er reyndar titlaður majór og er þar af leiðandi hermaður.  Mjög hafa verið skiptar skoðanir á þessari ákvörðun.  Geir H. Haarde hefur sagt að þetta væri ekki rétt ákvörðun og Valgerður Sverrisdóttir fyrrverandi utanríkisráðherra hefur gagnrýnt Ingibjörgu Sólrúnu mjög fyrir þetta mál og gengið svo langt að tala um að Ísland væri að hlaupa frá þeirri ábyrgð að koma á friði í Írak.  Mér skilst að þessi eini íslendingur sem er í Írak sé kona að nafni Herdís og mikið hlýtur hún að vera öflug kona ef friður í Írak veltur á því hvort hún er þar eða ekki.  Eins og Davíð Þór Jónsson sagði í viðtali á Stöð 2 í kvöld væri gott að fá Herdísi heim og senda hana í miðbæ Reykjavíkur um helgar því ef henni hefðist tekist að tryggja frið í Írak yrði hún fljót að koma loksins á friði í miðbæ Reykjavíkur.

Mér finnst þessi ákvörðun Ingibjargar Sólrúnar hárrétt og sýna í verki að við viljum ekki vera bendluð við það sem fram fer í Írak þessa daganna.  Nógu slæmt var þegar Davíð Oddsson og Halldór Ásgrímsson létu Bush plata sig að styðja innrásina í Írak á sínum tíma og í ljósi þess er kannski skiljanlegt að Geir H. Haarde og Valgerður Sverrisdóttir reyni að verja gerðir sinna föllnu foringja.