Hugsum betur hafsbotninn

Það er vitað mál að hinar miklu togveiðar hér við land hafa sléttað verulega hafsbotnin og þar af leiðandi minna skjól verið fyrir fiskinn en hann hefur oft safnast saman við rif, hóla og kanta og eins þar sem skipsflök liggja.  Þetta hefur margoft verið myndað neðansjávar þar sem þetta sést mjög vel.  Eins er frægt flak vestur af Látrabjargi sem er stórt skip sem sökk þar á stríðsárunum og þeir skipstjórar sem hafa komist uppá lagið að toga við þetta flak hafa oft lent í ævintýralegum afla.  Mig minnir að þetta flak gangi undir nafninu Blanka.   Nú hefur verið svo hér á landi að bannað hefur verið að farga skipum með því að sökkva þeim og hafa þess vegna skip sem hætt er að gera út safnast saman víða í höfnum landsins þar sem þau grotna niður öllum til ama og leiðinda og eru að lokum seld í brotajárn fyrir lítinn pening.  Við ættum að snúa þessu við og setja sem skilyrði að við förgun skipa verði þeim sökkt víða á veiðislóðum, það ætti auðvitað að ganga þannig frá skipunum að ekki væri hætta á mengun frá þeim.  Eins og tæknin er orðin í dag þegar flest skip og bátar eru komin með tölvubúnað með fullkomnum sjókortum og nákvæmum staðsetningarbúnaði væri auðvelt að merkja inná þau kort hvar hvert og eitt skip liggur.  Væri því auðvelt fyrir fiskiskipin að forðast að festa veiðarfæri í þessum flökum.  Skip sem er á togveiðum getur auðveldlega lyft trollinu uppí sjó á meðan farið er yfir viðkomandi flak eða sveigt framhjá því.  Þau skip sem eru á línu- eða netaveiðum farið til hliðar við flökin og það sama á við um dragnótabáta.  Með þessu sköpuðum við á vissum svæðum ákveðna möguleika fyrir fiskinn til að safnast saman og fá að vera í friði, þetta er sérstaklega mikilvægt þar sem fiskurinn hrygnir því þá þarf hann mest á því að halda að finna eitthvað skjól. 

Athugasemdir

[Rósa Aðalsteinsdóttir 12.9.2007 kl. 00:52]

Sæll og blessaður. Þetta var gert í Oslóarfirði fyrir nokkrum árum. Hvernig væri að setja þessa grein inn hjá Kristni Péturssyni. [e-mail] Kveðja/Rósa 

[Jakob Falur Kristinsson, 12.9.2007 kl. 10:50]

Kristinn Pétursson er einn af mínum bloggvinum svo hann sér þetta hjá mér.  Já þetta er rétt hjá þér var gert í Oslóarfirði fyrir nokkrum árum og hugmyndir hafa verið að gera þetta víðar.

[Rósa Aðalsteinsdóttir 12.9.2007 kl. 17:53]

Sæll aftur.

Haltu áfram að koma með góða umfjöllun um hafið "Lengi tekur sjórinn við" var sagt en sjórinn er búinn að fá nóg af eyðileggingu en nú þarf að snúa vörn í sókn. Þetta með að sökkva skipum sem eru ekki mengandi er mjög sniðugt og þar mun hafsbotninn jafna sig með tíð og tíma. Kær kveðja/Rósa