Davíð Oddsson

Nú hefur Árna Johnsen bæst liðsauki í gagnrýni sinni á hinar svokölluðu Mótvægisaðgerðir sem ríkisstjórnin hefur verið að kynna.  Sá sem núna tekur sig að styðja Árna er sjálfur Davíð Oddson sem kallar þessar aðgerðir "fáránlegar".  Þótt mér finnist margt í þessum aðgerðum gagnrýnisvert er langt í frá að ég geti kallað þær fáránlegar.  Mér finnst Davíð oft gleyma því að hann er hættur í stjórnmálum og maður myndi nú ætla að hann frekar styddi sína gömlu félaga í stað þess að vera með svona skítkast.  Davíð Oddson hefur alltaf verið þeirrar skoðunar að allt ætti að vera frjálst og ríkið ætti einungis að setja þann ramma sem atvinnulífið ætti síðan að fá starfa frjálst í og ríkið ætti aldrei að vera með neinar aðgerðir til hjálpar einum né neinum.  Gott og vel, Davíð Oddsson má auðvita hafa sína skoðun á hverju máli en hinu má hann heldur aldrei gleyma að hann er starfandi Seðlabankastjóri og hefur verið talsmaður hans og þegar hann lætur svona lagað út úr sér er auðvitað litið á að hann sé að túlka sjónarmið bankans.  En talandi um frelsi þá vill persónan Davíð Oddsson að allt sé sem mest frjálst og þess vegna megi leggja landsbyggðina í rúst og þúsundir fólks missi vinnuna.  Aftur á móti Seðlabankastjórinn Davíð Oddsson vill takmarka frelsi eins og þegar hann lýsti því yfir að óheppilegt væri að Straumur-Burðarás ætlaði að færa hlutafé sitt í evrum og þegar hann sá að hann hefði enginn tök á að stoppa það mál, þá varaði hann sterklega aðrar fjármálastofnanir við að gera slíkt hið sama.  Sem frelsisunnandi var forsætisráðherrann Davíð Oddsson t.d. harður andstæðingur þeirra Bónusfeðga og er jafnvel talinn höfundur af hinum stórundarlegu málaferlum sem hefur gengið undir nafninu "Baugsmálið" og ekki má gleyma tilraun hans til að reyna að hindra frjálsa fjölmiðla í landinu.  Nei Hr. Davíð Oddsson, ég held að þú ættir að hætta að blanda þér í umræður um mál sem þér koma hreint ekkert við miðað við þína stöðu í dag.  Þér væri nær að vinna þá vinnu sem þú þiggur laun fyrir sem er að stýra Seðlabanka Íslands sem ekki hefur tekist betur til en svo að reglulega kemur þú fram og tilkynnir vaxtahækkun.  Er Davíð kannski með þessum ummælum sínum að óska eftir fjölda-atvinnuleysi á Íslandi, sem allir vita að eitt og sér slær á þenslu og verðbólgu, en yrði samt til þess að breiða yfir árangurslitla stjórnun Davíðs í Seðlabankanum varðandi stjórn efnahagsmála á Íslandi.  

Athugasemdir

[Ásthildur Cesil Þórðardóttir, 20.9.2007 kl. 15:32]

Vonandi fer hann bara að hafa hægt um sig, það er löngu kominn tími á karlinn.

[Jakob Falur Kristinsson, 20.9.2007 kl. 17:48]

Rétt Ásthildur, hann ætti að hafa vit á að draga sig í hlé áður en hann gerir fleiri vitleysur.

[Kristjana Bjarnadóttir, 20.9.2007 kl. 20:38]

Góður, lýsi mig sammála, þér. Sumir virðast hafa gleymt við hvað þeir starfa í dag. Það getur ekki talist við hæfi að seðlabankastjóri tjái sig á þennan hátt.

[Jakob Falur Kristinsson, 21.9.2007 kl. 00:17]

Það er nú eitthvað að rofa til í hausnum á honum karlgreyinu.  Því hann var mun mildari í viðtali í kvöld en kom framhjá honum í hádegisfréttum.