Bakkafjörður

Það var átakanlegt að horfa á það í fréttum á Stöð 2 í gærkvöldi, þegar verið var að selja á nauðungaruppboði allar eignir fiskvinnslunnar Gunnólfstinds ehf. á Bakkafirði en aðaleigandi þess var sá ágæti maður Kristinn Pétursson og eiginkona hans.  Ekki var látið nægja að bjóða upp allar eignir fiskverkunarinnar, heldur voru líka seldar á þessu nauðungaruppboði allar eignir þeirra hjóna, þar á meðal þeirra heimili.  Byggðastofnun mun hafa eignast flestar þessar eignir og maður hlýtur að spyrja hvort ekki hefði nú mátt sleppa þeirra heimili því nógu sárt hlýtur það að vera, að horfa á fiskverkunina fara á uppboð eftir að hafa varið mörgum árum af sinni starfævi í að byggja upp?  Nei allt var boðið upp og Kristinn Pétursson og hans fjölskylda stendur eftir algerlega eignalaus.   Þarna birtist okkur núverandi kvóta kerfi í sinni réttu mynd og þar sem Kristinn Pétursson hefur á undaförnum árum gagnrýnt það kerfi með mjög sterkum rökum, þá læðist að manni sá grunur að mafía sú er stendur dyggan vörð um þetta kerfi, hafi þrýst á að reyna að þagga niður í þessum manni.  En Kristinn Pétursson er kraftmikill maður og í viðtali við hann sem fylgdi fréttinni sagði Kristinn; "Það er ekki spurning hvernig maður fellur, heldur hvernig maður stendur upp aftur."  Ég er viss um að Kristinn á eftir að standa upp aftur og þá sterkari maður en áður.  Þessi fiskvinnsla hans á Bakkafirði mun hafa verið mjög vönduð og vel búinn tækjum og þar störfuðu 35 manns á sínum tíma, sem ekki er lítið í litlu þorpi, en vinnsla hefur legið niðri í um eitt ár og á þeim tíma mun íbúum Bakkafjarðar hafa fækkað um 40%.  Mér þótti líka fróðlegt að heyra svör hjá einum íbúa Bakkafjarðar en hann sagði;  Það er út af fyrir sig viss léttir að þetta uppboð er búið að fara fram og nú er bara að vona að einhver vilji nýta sér þetta tækifæri og byrja rekstur í þessari fiskvinnslu."  Þetta svar kom mér að sumu leiti ekki á óvart, því ég hef kynnst því af eigin raun þegar ég rak á sínum tíma hraðfrystihús á Bíldudal, að alltaf er stutt í öfundina hjá mörgum og oft skeður það á þessum litlu stöðum, þar sem návígið er svo mikið og allt neikvætt tal íbúa um forustumenn í atvinnurekstri á það til að rata inn í banka og fleiri staði.  Að minnsta kosti varð það mínu fyrirtæki að falli á sínum tíma, öfund og neikvætt tal íbúa varð svo mikill að það náði loks inn í viðskiptabanka fyrirtækisins sem gekk þá fram og slátraði því fyrirtæki á mjög ósmekklegan hátt.  Það getur sennilega orðið rétt hjá þessum manni á Bakkafirði sem ég var að vitna í að einhver sýni því áhuga að hefja þarna rekstur á ný og fær þá þessar eignir á silfurfati hjá Byggðastofnun, því nóg er til af ævintýramönnum á Íslandi, sem alltaf eru tilbúnir að stökkva á slíka hluti ef þeir sjá að þar kunni að vera möguleikar á að næla sér í einhverja peninga og stinga í eigin vasa.  Það hefur t.d. skeð á Bíldudal og frá því ég var þar með rekstur hafa 6-7 aðilar á um 15 árum reynt við rekstur þar.  Alltaf þegar nýr aðili hefur komið hefur Byggðastofnun opnað sína sjóði og dælt út peningum, sem eru í dag nokkur hundruð milljónir ef ekki milljarður, en mig vantaði 20 milljónir til að halda áfram og hafði ég þó yfir að ráða um 3000 tonnum af aflakvóta.  En nú er frystihúsið á Bíldudal í eigu Byggðastofnunar og enginn rekstur í gangi og þó að einhver vildi hefja þar rekstur er búið að selja í burtu mikið af vélum og tækjum, auk þess er enginn kvóti eftir á staðnum.  Þótt nýr aðili komi og vilji hefja rekstur á Bakkafirði er ég hræddur um að svipað fari eins og á Bíldudal, Því hver er hæfari til að reka þarna fiskvinnslu en Kristinn Pétursson, sem hefur byggt þetta upp af miklum myndarskap og með hag Bakkafjarðar að leiðarljósi.  Þessi atburður segir okkur enn og aftur hvað það er nauðsynlegt að, skilja að vinnslu og veiðar og allur fiskur fari á fiskmarkað hér á landi, hvort sem hann á að fara til vinnslu hér á landi eða vera sendur út óunnin í gámum.  Þá fyrst kemur fram eðlileg verðmyndun á fiskinn.  Eins og þetta er núna er svo lítill hluti sem fer á fiskmarkað að hin stóru fyrirtæki geta leikið sér að því, að stýra verðmyndum á fiskmarkaði með því að kaupa þar hátt ef hætta er á verlækkun og ef hætta er á verðhækkun setja þeir talsvert mikið magn inná markaðinn.  Miðað við óbreytt ástand er fiskvinnsla án útgerðar dauðadæmd, þrátt fyrir að mörg þessara fyrirtækja hafa verið með bestu afkomu íslenskra sjávarútvegsfyrirtækja árum saman.  Það sem nú hefur skeð á Bakkafirði er aðeins toppurinn á ísjakanum, við eigum eftir að fá reglulega slíkar fréttir á næstu mánuðum sérstaklega af landsbyggðinni sem virðist vera búið að ákveða að leggja niður og flytja á fólk hreppaflutningum á höfuðborgarsvæðið.

Athugasemdir

[Anna Karlsdóttir, 5.10.2007 kl. 09:40]

Sæll Jakob

 Takk fyrir þennan mjög svo fróðlega pistil. Því miður grafa íbúar byggðarlaga stundum undan sjálfum sér með niðurrifs stemningu gagnvart þeim sem á heiðarlegum forsendum hafa reynt að byggja upp og skapa öðrum atvinnu. Við höfum erft einn helsta ósið nágrannaþjóða okkar á norðurlöndum, janteloven. Þú skalt ekki halda að þú sért eitthvað meiri en aðrir viðhorfið. Mér finnst einna verst í þessari umræðu um áhrif niðurskurðar á þorskveiðiheimildum að það er talað um að nú fari af stað alda lokana fiskvinnslu eins og það sé eitthvað nýtt. ...Eins og stendur og undanfarin tvö ár hefur mestmegnis fisks veitt á íslandsmiðum verið flutt út meira eða minna óunnið. Það er ekki ákvörðun stjórnvalda, heldur forsvarsmanna útgerðarfyrirtækjanna. Það er ljóst að stjórnvöld hafa ekki staðið sig  í grípa til aðgerða sem skylda a) þá sem veiðileyfin hafa til að veiða að minnsta kosti 70% aflans sjálfir b)hefta með fiskmarkaðsákvæðum m.a að aflinn fari óunnin úr landi.

[Hallgrímur Guðmundsson, 5.10.2007 kl. 09:56]

Jakob þessi maður sem þú vitnar í neitaði að landa í vinnsluna hjá Kristni Péturssyni og stakk af úr viðskiptum þannig að ekki brá mér við það að sjá helvítis hræsnina í honum. Það er sennilega of seint að gera eitthvað þarna fólkið er farið og kemur ekki aftur. Kristinn og frú eru einstaklega gott fólk og dugleg bæði það verður aldrei tekið frá þeim. Ég tel mig heppinn mann að eiga þau fyrir vini. Við skulum vona að þetta leiði ekki til þess að þeirra kraftur og jákvæðni breytist ekki í hið neikvæða.

[Jakob Falur Kristinsson, 5.10.2007 kl. 11:56]

Ég hef fulla trú á að Kristinn Pétursson standi þetta af sér enda hefur hann oft sýnt það áður að hann er sterkur karakter.  Það var gott að fá þessar upplýsingar Hallgrímur um þennan mann.  Því ég þekki lítið til þarna  en fannst eitthvað skrýtið koma fram hjá þessum manni, en vildi ekki vera of stórorður.

[Hallgrímur Guðmundsson, 5.10.2007 kl. 16:44]

Ég hef ekki nokkra trú á öðru en Kristinn rísi upp aftur og þá af tvöföldu afli, hann er einfaldlega þannig gerður kallinn. Þú þekkir þessa hluti af eigin reynslu það skulu alltaf vera til svona helv.... rottur á hverjum stað sem reyna með öllum mætti að rústa því sem fyrir er haldandi að grasið sé grænna annarstaðar. Það eru ekki öll kurl komin til grafar þarna, athyglisvert verður að fylgjast með næstu vikur. Það er ýmislegt sem ég vona að komi fram í dagsljósið, það eiginlega verður að opinbera það í fjölmiðlum hvernig markvisst hefur verið farið að því að knésetja suma og öðrum klappað á bakið. Við erum að tala um aðfarir varðar af stjórnvöldum.

[Hallgrímur Guðmundsson, 5.10.2007 kl. 19:16]

Aðgerðir varðar af stjórnvöldum, átti þetta að vera.

[gránigamli 6.10.2007 kl. 21:49]

Allt þetta bull og kjaftæði sem Hallgr. lætur frá sér fara.  Að einhver stingi af úr viðskiptum!!! (halló er einhver heima) mönnum er vonandi frjálst að eiga viðskipti við hvern sem þeir vilja(og treysta).  Jú jú víst er það slæmt að menn missi allt sitt(en er það svo????).  Ég hef frétt að þessi maður hafi nú  sett fleiri fyrirtæki á hausinn, og svo kallað heimili þeirra, þau hafa ekki búið þar í fjölda ára.  Hið rétta heimili þeirra er víst í eigu annara í fjölskyldunni.  Hvað ætli það hafi verið mörg hundruð milljóna kr. gjaldþrot hjá honum í gegnum tíðina???  Og alltaf heldur hann sínu.

[Jakob Falur Kristinsson, 7.10.2007 kl. 08:43]

Ef einhver er með bull og kjaftæði ert það þú, (gránigamli IP-tala eitthvað) og veist greinilega ekkert í þinn haus hvað verið er að tala um, en slærð um þig með stórum fullyrðingum um Kristinn Pétursson og þorir ekki annað en skrifa undir dulnefni, það er nú ekki mikill kjarkur hjá jafnstóryrtum manni og þér.  Auðvitað er öllum frjálst að eiga sín viðskipti við þann sem þeir kjósa, en þegar maður sem hefur gert samning við annan um ákveðin viðskipti og síðan neitar að standa við hann er það kallað að stinga af frá viðskiptum.  Ég veit ekki til þess að Kristinn Pétursson hafi stundað svokallað kennitöluflakk, þ.e. stöðugt verið að stofna ný og ný fyrirtæki þegar eitt hefur farið á hausinn.  Hvað varðar heimili Kristins ert þú að fullyrða um hluti sem mér er ekki kunnugt um.  Mig fer nú bara að gruna, þar sem þú leynist undir dulnefni, að þú sért einmitt maðurinn sem Hallgrímur ræddi um eða eitthvað tengdur honum.  Meðan þú þorir ekki að gefa upp þitt rétta nafn verð ég að líta svo á að það sért þú sem hefur verið að stunda þá iðju að grafa undan atvinnulífi Bakkafjarðar.

[Hallgrímur Guðmundsson, 7.10.2007 kl. 21:28]

Það vil þannig til að ég hef nokkuð góða vitneskju um það sem ég skrifa og segi." Allt þetta bull og kjaftæði sem Hallgr. lætur frá sér fara" Hvaða allt er verið að tala um? Sannleikurinn er hverjum sárastur sem hefur eitthvað að fela. Það er staðreynd. Það er lágmark að menn skrifi undir réttu nafni, en sumir eru bara það mikil lítilmenni að þeir þora því ekki. Ég hef það fyrir vana að hunsa svoleiðis fólk og ætla að halda því áfram.

Kv, Halli