Sjómenn

                                                                               Þessi fyrirsögn blasti við á forsíðu Fréttablaðsins í gær.  Ekki tel ég að öllum sé jafn ljóst hvaða áhrif þetta kemur til með að hafa á framtíð okkar sem fiskveiðiþjóð.  En ástæðan er ósköp skiljanleg því vegna hinnar miklu skerðingar í þorskveiðum hafa laun margra sjómanna lækkað um allt að 50% og því vel skiljanlegt að þeir leiti sér að annarri vinnu, því ekki er gert ráð fyrir að nein aukning verði á þorskveiðum á næsta fiskveiði ári. Það er ekki eingöngu skerðing á þorskkvóta sem þessu veldur, heldur hefur hið háa gengi íslensku krónunnar mikil áhrif.  En þessu háa gengi er haldið uppi með handafli af Seðlabanka Íslands.  Svo gæti farið að þegar við ætlum að auka okkar veiðar aftur verði engir íslenskir sjómenn til staðar og þarf þá væntanlega að manna íslensk fiskiskip að stórum hluta með erlendum sjómönnum.  Hinar svokölluðu mótvægisaðgerðir gera ósköp lítið fyrir sjómenn og allt tal um að þeir geti farið í vinnu við að mála opinberar byggingar er svo fáránlegt að varla er orðum á það eyðandi.  Þeir sjómenn sem enn þrauka búa við mikið vinnuálag og stór aukna slysahættu vegna þess að alltaf er að fjölga á skipunum óvönum mönnum um borð.  Flestar útgerðir boða það nú að fyrirsjáanlegt sé að svokölluð sumarstopp fiskiskipa sem yfirleitt hafa verið 1-2 mánuðir á hverju sumri aukist nú í allt að 4-6 mánuði.  Hvaða starfstétt á Íslandi getur búið við svona ótryggt atvinnuöryggi til viðbótar 50% tekjuskerðingu?   

 

Athugasemdir

[Hafsteinn Viðar Ásgeirsson, 6.11.2007 kl. 11:10]

Mér finnst þú Jakob horfa algerlega framhjá lang stærsta vandamálinu í öllu þessu samanlögðu, en það er aumingaskapur og undirlægjuháttur "sjómannaforustunnar" sálugrar við stórútgerðirnar. Það er ekki nokkurt vandamál að halda góðum mönnum við sjómennsku á Íslandi ef það væri fiskverð sem jafnaðist á við það sem gerist annarsstaðar.

Á Íslandi er lægsta fiskverð við N-Atlandshaf fyrir besta hráefni á svæðinu. Það, eins og þú veist kemur til af því að Stórútgerðum er liðið að taka í sínar verksmiðjur á smánarverði, fiskinn af sínum skipum, allt með blessun "leiðtoganna"

Nú er svo komið að það munar ekki miklu að vera á kvótalausum, selja við hæsta verði og draga leiguna frá fyrir skipti, eða vera á línukláf sem veiðir 4000 tonn á ári inní verksmiðju og selur fyrir smánarverð, ákveðið af "Verðlagsstofu skiptaverðs".

Þetta er það sem er að verða búið að koma íslenskum sjómönnum í þá stöðu að mér er nær að halda að það endi allir á föstu kaupi, Íslendingar sem Pólverja...

4 mánuðir að sumri væri ekkert vandamál, á eðlilegu fiskverði. En hvar ætti þá að stela fyrir kvótakaupunum spyrð þú þá sjálfsagt....????

[Hafsteinn Viðar Ásgeirsson, 6.11.2007 kl. 11:15]

Það þarf svo auðvitað ekki að taka það fram Jakob, að allt byggist þetta auðvitað á afköstum íslenskra sjómanna. Hvergi á byggðu bóli kemur upp annar eins afli per haus en á Íslandi og það ætti að duga til að allir hefðu viðunandi afkomu, jafnvel í þessum samdrætti.

[Sigmar Þór Sveinbjörnsson, 6.11.2007 kl. 20:18]

Þetta er góð grein hjá þér Jakob og ótrúlegt að það skuli nú vera þannig komið að mannskapurinn um borð verði að borga skipin að hluta.

Hafsteinn mikið er ég sammála þér að sjómannaforustan virðist ekki standa sig í þessum kjaramálum, enda kannski erfitt að berjast við þessa peningamenn, sem virðast alltaf hafa ríkisstjórnina með sér. Við sjáum hvernig Guðmundur vinalausi hefur komið  fram við forustumann sjómanna á Akureyri, og það er ekki einu sinni haldinn Sjómannadagur þar. Er þetta ekki neyðarlegt fyrir sjómenn, þurfa sjómenn að fá peninga frá þessum stórútgerðum til að geta haldið upp á Sjómannadag?

[Hafsteinn Viðar Ásgeirsson, 6.11.2007 kl. 20:49]

Það mega náttúrulega aldrei verða nein rök gegn því að berjast, að þessir larfar eigi svo mikla peninga Sigmar. Þá þess heldur að það ætti og þyrfti, að vera hægt að taka á málinu.

Annars er það sem þú nefnir með Guðmund ári gott dæmi, því þarna kemur hann og ætlar að fara að "brjóta" samninga, með nákvæmlega sama hætti og Mái, "eigandi" formannsins á svæðinu er búinn að gera í áraraðir og þá verður allt vitlaust.

Sjómenn þurfa enga peninga frá útgerðarmönnum frekar en þeir vilja, þeir eiga að vera menn til að halda uppá sinn dag, þetta er bara partur af þessari deyfð og atgervisflótta sem brostinn er á í stéttinni, því miður.

[Jakob Falur Kristinsson, 7.11.2007 kl. 08:37]

Ég er algerlega sammála þér Hafsteinn og þetta væri ekkert vandamál ef sjómannaforustan stæði sig í því sem hún á að gera.  Ég hef sjálfur verið á kvótalausum skipum þar sem fiskverð til skipta var miklu hærra en hjá sjómönnum á skipum hinna svokölluðu stórútgerða, þótt kvótaleiga væri dregin frá óskiptu enda öllum fiski landað á fiskmarkað.  Ég er ansi hræddur um að eftir nokkur ár verði svo komið að hlutaskiptakerfið leggist af og allir sjómenn verði á föstum launum því eins og þú bendir á eru afköst íslenskra sjómann ein þau mestu í heiminum.  Þessi laun verða auðvitað að vera talsvert mikil.   Fiskverð verður aldrei í lagi hér á landi fyrr en búið er að aðskilja vinnslu og veiðar og öll fiskiskip verði skyldug að selja allan sinn afla á fiskmarkaði

[Hafsteinn Viðar Ásgeirsson, 7.11.2007 kl. 10:19]

Alveg klárt mál Jakob. Ég held að mesta vandamálið þar sé þessi "Verðlagsungi" þarna á Akureyri, ef ekki kæmi þessi rosalega þvæla þaðan þá færi sjálfkrafa meira inn á markaðina þ.e. ef það verð sem þaðan kæmi væri eitthvað nær raunveruleikanum, færi sjálfkrafa að fara meira inná markaði. Málið er nefnilega að á þeim verðum sem þeir duglegustu í ferska fiskinum eru að vinna á eiga hinir ekki séns, þeir eru svo vanir að fá hráefnið á hálfvirði.