Staksteinar

Það hefur verið skemmtilegt að fylgjast með Staksteinum Morgunblaðsins undanfarið, en ég held að þessi dálkur sé skrifaður af ritstjóra blaðsins.  Lengi vel fjallaði þessi dálkur mest um eina persónu, sem, var Ingibjörg Sólrún Gísladóttir en nú er nær eingöngu skrifað um aðra konu sem einnig er öflugur stjórnmálamaður en það er Svandís Svavarsdóttir.  Suma dagana er Svandís lofuð fyrir allt sem hún segir eða gerir en næsta dag er kannski allt ómögulegt hjá Svandísi.  Ekki veit ég hvað Morgunblaðinu gengur til með þessum skrifum sínum en greinilegt er að í gegnum skrifin skín mikil öfund vegna þess að sjálfstæðismenn eiga ekki svona öflugan stjórnmálamann eins og Svandís er.  Morgunblaðinu er með þessu að takast að skrá nafn Svandísar svo rækilega í sögu stjórnmála á Íslandi að ekki verður það afmáð á næstu árum.  Því hefur oft verið haldið fram að Ingibjörg Sólrún Gísladóttir væri eina konan sem kæmi til greina að verða forsætisráðherra Íslands, en nú hefur Mogganum tekist að breyta því viðhorfi fólks með því að benda á það dag eftir dag hversu mikilhæfur stjórnmálamaður Svandís Svavarsdóttir er og þar með að Svandís yrði örugglega fyrsta konan til að verða forsætisráðherra á Íslandi þegar hennar tími kemur, sem verður örugglega ekki langt að bíða eftir.