Líkamsárás

Héraðsdómur Reykjavíkur hefur dæmt karlmann á þrítugsaldri í 9 mánaða fangelsi fyrir að hóta lögreglu­manni líkamsmeiðingum og slá hann síðan með krepptum hnefa í andlitið. Fram kemur í dómnum, að maðurinn var árið 2005 dæmdur í skilorðsbundið fangelsi fyrir líkamsárás og rauf hann skilorð þess dóms með brotinu.

Það eru þung viðurlög við því að ráðast á lögregluna og ættu menn að hafa það alvarlega í huga þegar þeir finna sig knúna til að berja einhvern.  Þá er vissara að viðkomandi sé ekki lögreglumaður, heldur óbreyttur borgari.  Það er allt í lagi að berja þá sundur og saman og í kærum vegna líkamsárása þar viðkomandi að vera með pottþétta sönnun um að þetta hafi ekki í raun verið honum að kenna.  Þetta snýst algerlega við ef lögreglan á í hlut hún hefur fullt leyfi til að tukta til og fara illa með og taka hressilega á öðru fólki.  Það er allt í lagi og telst bara eðlilegt, eins og löggurnar sem voru í einhverjum bumbuleik á skemmtun hjá lögreglunni og slösuðu konu.  Þeir tóku bara ekkert eftir henni fyrr en þeir sáu að hún steinlá á jörðinni.

9 mánaða fangelsi fyrir að slá lögreglumann

Athugasemdir

[Guðmundur 14.11.2007 kl. 18:33]

Lögreglunni er ekki heimilt að "tukta til og fara illa með" fólk, heldur gilda strangar reglur um valdbeitingu lögreglu.  Það eru heldur ekki þung viðurlög við því að ráðast á lögregluna, ef mig minnir rétt, þá er það sérstök sekt upp á 10.000.- kr, fyrir að hlýða ekki fyrirmælum lögreglu, en annars fer málið í gegnum kerfið eins og aðrar líkamsárásir og oft þurfa lögreglumenn sjálfir að leggja fram kæru ef þeir vilja að málið fái einhvern framgang.  Maðurinn sem fréttin er um, fékk 9 mánaða fangelsi þar sem hann var einnig að rjúfa skilorð!!

[Sveinn 14.11.2007 kl. 18:41]

Þvílíkir fordómar gagnvart lögreglunni, ég segi nú ekki annað. Það myndi nú heyrast eitthvað ef það væru aðrar stéttir sem fengju svona ósanngjarna umfjöllun. Svei!

PS. það er kannski í lagi að vera með fordóma gagnvart þessari stétt eða hvað?

[Jakob Falur Kristinsson, 14.11.2007 kl. 23:25]

Lög eru alltaf lög og eins og þú bendir réttilega á, Páll og það eru þyngri refsingar fyrir árásir á lögreglu en almenna borgara en ekki einhver 10 þúsund króna sekt eins og Guðmundur nefnir hér að ofan.  Hinsvegar hefur oft reynt á það ef einhver telur lögreglu misbeita valdi sínu og leggur fram kæru er oft erfitt fyrir viðkomandi að sanna sitt mál.  Það eru oft bara hans orð gegn nokkrum lögreglumönnum og þá kemur til samstaða innan stéttarinnar, því fáir vilja vitna gegn starfsfélaga sínum.  En varðandi skrif Sveins hér að ofan, vil ég bara segja það, að ég er ekki haldinn neinum fordómum gagnvart lögreglustéttinni.  Ég var aðeins að benda á að árás á lögreglu væri miklu alvarlegri en árás á almennan borgara og eins og ég hef nefnt  þá á hinn almenni borgari miklu erfiðara að sækja sinn rétt gagnvart lögreglu en lögregla gagnvart almennum borgara.  Það er lagaumhverfið sem skapa það.  Ég hef ekki átt nokkurn þátt í lagasetningum hér á landi og vil ekki viðurkenna það sem fordóma að benda á staðreyndir.  T.d. í því máli sem ég nefndi með þessa aumingja konu, þá eru það bara hennar orð gegn fullyrðingum tveggja lögreglumanna.