Kjarasamningar

Stíf fundalota er framundan í Karphúsinu í dag, Starfsgreinasambandið fundaði í morgun með Samtökum atvinnulífsins, en um 42.000 launþegar heyra undir það. Kristján Gunnarsson formaður Starfsgreinasambandsins segir að málinu verði í dag vísað til ríkissáttasemjara, sem tekur þá ákvörðun um vinnulag við samningagerð í kjölfarið. Ríkissáttasemjari segist eiga von á að fleiri geri slíkt hið sama í dag og á næstunni.

Að sögn Kristjáns er nokkur samhljómur milli sambandsins og atvinnurekenda um að hækka beri laun þeirra sem minnst hafa, en að ágreiningur sé um upphæðir.

Landssamböndin sem heyra undir ASÍ ákváðu að fara hvert sína leið við gerð kjarasamninga eftir að ríkisstjórnin hafnaði tillögum um sérstakan persónuafslátt fyrir þá lægst launuðu. Forsvarsmenn ASÍ hafa síðan sagt stjórnvöld ábyrg fyrir því hvernig nú er komið.
Þá munu fleiri félög sem heyra undir ASÍ funda með SA síðar í dag.

Alveg er þetta dæmigerð vitleysa, ríkisstjórnin ætlar að sitja hjá og horfa þegjandi á að gerðir verði verðbólgusamningar í stað þess að liðka aðeins til svo hægt væri að bæta kjör þeirra sem verst eru settir.  Það er eins og það sé orðið lögmál hér á landi að hinir lægustlaunuðu skuli alltaf sitja eftir þegar gera á nýja kjarasamninga.  Ég hefði haldið að ríkisstjórnin bæri ábyrgð á efnahagsstjórn í þessu landi og ætti því að gera allt sem hún gæti til að liðka til fyrir hóflegum kjarasamningum.  En hún ætlar en sé ekki að gera eitt né neitt og horfa á að allt fari hér úr böndunum.  Ráðherrarnir eru auðvitað ánægðir því þeir fengu ásamt öllum æðstu mönnum þjóðarinnar launahækkun um síðustu áramót og fá örugglega aftur ef verulegar hækkanir verða í komandi kjarasamningum.  Hvar eru nú öll markmiðin um litla verðbólgu?  Gleyma ráðherrarnir öllu slíku bara ef þeir fá eitthvað fleiri krónur í eigin vasa?  Hvað er þessi ríkisstjórn eiginlega að hugsa varðandi verðbólguna eða hugsar hún kannski bara alls ekki neitt?

Stíf fundalota framundan

Athugasemdir

[Ingunn Jóna Gísladóttir, 10.1.2008 kl. 11:51]

Þetta er fáránlegt, ríkistjórnin hefur engan áhuga á að hjálpa til við að minnka fátækt. Mér finnst vera kominn tími á að Árni Matt  láti sig hverfa, hann er verstur af þeim öllum.  Hann skrifaði undir sem stjórnarmaður hjá Lífeyrissjóðunum um að lækka greiðslurnar til öryrkja og er algerlega á móti skattaþrepi fyrir þá lægstlaunuðu. Eigðu góðan dag, kær kveðja Ingunn

[Guðrún Emilía Guðnadóttir, 10.1.2008 kl. 13:06]

Það kemur manni ekkert á óvart, þetta verður eins og allt er búið að vera allar götur síðan ég fór fyrst að hugsa um pólitík.
Áfram  felum við verkalýðsforustunni að semja um okkar kjör,
það er aldrei samið eins og vera skyldi, og við nennum ekki orðið að mæta á fundum til að andmæla. Við segjum: ,,það tekur því ekki þessu verður ekki breitt"
Ríkisstjórnin gerir ekki neitt og ef hún gerir eitthvað þá tekur hún það strax af okkur aftur.
Og svo er alltaf sagt Æ. þeir gerðu nú þetta og hitt.
Ég hef aldrei orðið vör við þetta eða hitt.
þeir eiga bara að skammast sín þessir árans menn.
                    Kveðja. Milla.

[Marta smarta, 10.1.2008 kl. 15:24]

Sammála.

Úðabrúsann á Árna Matt og þá sem hann dregur dám af  ( aðalgaurinn situr í makindum í Seðlabankanum og stýrir sínum strengjabrúðum sem aldrei fyrr og hlær að okkur hinum  )

Verkalýðsforystan er ekki að vinna fyrir okkur, heldur að skara eld að eigin köku eins og fyrr.

Semsagt skammist þeir sín bara og hana nú.

Kv Marta

[Jakob Falur Kristinsson, 11.1.2008 kl. 11:40]

Það er nú alltaf passað uppá suma t.d. fékk Davíð Oddsson hækkun á sínum grunnlaunum um kr. 100 þúsund um síðustu áramót og auk þess heldur hann sínum eftirlaunum óskertum sem ráðherra, þótt hann sé kominn í vel launað starf hjá ríkinu sem Seðlabankastjóri.  Ég er hræddur um að Samfylkingin fari illa út úr þessari afstöðu ríkisstjórnarinnar núna, því margir af forustumönnum verkalýðshreyfingarinnar eru einmitt í þeim flokki.  En auðvitað er Sjálfstæðismönnum sama þótt fylgið fari niður hjá Samfylkingunni, það styrkir bara þeirra stöðu.