Fiskeldi

Mikil tjón hafa hlotist á eldisbúnaði, einkum sjókvíum, sökum erfiðra umhverfisaðstæðna við Ísland. Í því ljósi er verkefninu NORÐURKVÍ hrundið af stað með það að markmiði að hanna og smíða sjókvíar sem uppfylla ýtrustu kröfur um styrk og þol fyrir íslenskar aðstæður.

Þetta eru góðar fréttir, því það er deginum ljósara að fiskeldi og þá sérstaklega þorskeldi mun verða stór atvinnugrein hér á landi og ættu stjórnvöld að standa vel við bakið á þessari atvinnugrein.  Við gætum t.d. lokað heilu fjörðunum og látið loðnuskipin dæla loðnu í þessa firði.  En þetta er fjárfrek grein og þess vegna er opinber stuðningur við hana mikilvægur, því að nokkur ár geta liðið frá því byrjað er og þar til tekjur fara að koma inn.  Samherji hf. er búinn að ná góðum tökum á að ala upp þorskseiði í stöð sinni á Stað við Grindavík og fyrir stuttu kom þangað sérútbúið skip og tók nokkur hundruð þúsund seiði, sem höfðu verið seld til Noregs.  Reynslan hefur kennt okkur að besti árangur næst með því að ala upp seiði í sjókvíum en ekki veiða smáfisk og setja í kvíar.  Þetta er framtíðin en skortur á fjármagni hefur tafið þessa þróun hjá okkur og vonandi verður breyting þar á.

Smíða sjókvíar sem þola íslenskar aðstæður

Athugasemdir

[Rósa Aðalsteinsdóttir, 11.7.2008 kl. 22:46]

Sæll og blessaður.

Líst vel á þessar fréttir. Gott að það ríkir bjartsýni hjá sumum á þessum síðustu og verstu.

Kær kveðja og Guðs blessun/Rósa.

[Sigurður Þórðarson, 12.7.2008 kl. 13:36]

Það hafa fylgt þessu tvo vandamál: Í fyrsta lagi er dýrt að fóðra fiskana og í öðru lagi virðast eldisfiskar vera viðkvæmari fyrir sjúkdómum.

Það hafa komið upp sjúkdómar á eldislaxi fyrir utan Kanada þannig að stofninn hefur hrunið eins og hendi væri veifað.  

[Jakob Falur Kristinsson, 15.7.2008 kl. 11:11]

Ég er ekki fróður um fiskeldi en hef auðvitað heyrt af því að upp hafa komið sjúkdómar.  Eins veit ég að fóðrið er dýrt og fiskurinn er orðinn ansi dýr þegar hann er kominn upp í sláturstærð.  Hitt er líka vitað að hægt er að ala upp þorsk án þess að nota sjóhvíjar.  Það var gerð tilraun vestur í Arnarfirði fyrir nokkrum árum og voru sjókvíarnar hafðar opnar að neðan.  Þannig að þorskurinn gat farið ef hann vildi, það var síðan sett fóður í þessar sjókvíar og það merkilega kom í ljós að þegar vélarhljóð bátsins heyrðist, þá fylltust þessar sjókvíar af þorski.   

Þorskurinn vissi að hljóðið í bátnum táknaði að nú væri kominn fæða á ákveðnu svæði.  Seinna gat þessi sami bátur farið og háfað fiskinn upp.  Því þótt báturinn báturinn væri ekki að koma með fæðu þá hópaðist þorskurinn í sjókvíarnar bar vegna hljóðsins í bátnum  Þess vegna segi ég í minni grein að það mætti loka heilu fjörðunum og ala þar upp þorsk og loðnuskip yrðu fengin til að dæla loðnu inn á þessa firði.   Ef vilji væri fyrir hendi hjá stjórnvöldum þessa lands, þá gæti þessi loðna verið utan kvóta.  Það eru nokkur ár síðan þessu verkefni var hætt, en samt segja mér sjómenn að vestan að alltaf sé miklar lóðningar af fiski á þeim slóðum sem, sjókvíarnar voru.  Allt þetta verkefni var unnið undir stjórn Hafró og þar er til skýrsla um þetta verkefni.  Eins er merkilegt að þegar vinnsluskipin í loðnu eða síld fara inn á þessa firði og því fylgir að alltaf fer eitthvað af loðnu og síld í hafið aftur.  Þetta skeður þegar verið er að stærðaflokka aflann og allir hausar á síldinni fara í hafið.  Þegar viðkomandi skip er farið á veiðar aftur þá fyllist allt af fiski á því svæði sem, vinnsluskipið var statt á. 

[Jón Stefánsson 25.7.2008 kl. 22:09]

Sæll Jakob!

Gaman að sjá fjallað um fiskeldi!

Svo að ég byrji að vitna í færsluna hjá þér þá segir þú eftirfarandi: 

   "Samherji hf. er búinn að ná góðum tökum á að ala upp þorskseiði í stöð sinni á Stað við Grindavík og fyrir stuttu kom þangað sérútbúið skip og tók nokkur hundruð þúsund seiði, sem höfðu verið seld til Noregs."

Eftir því sem ég best veit þá eru framleidd í þessari stöð bleikjuseiði fyrir Silung ehf sem er með stöð á Vatnsleysu og svo laxaseiði sem eru seld m.a. til Noregs þar sem Villa group er einn helsti kaupandi þeirra!En hins vegar er það rétt að stórt sérútbúið eldisflutningaskip kom nú nýverið og tók um 600.000 seiði til Noregs!

En svo getum við hins vegar verið sammála um að nauðsynlegt er að fara að hlúa allverulega að seiðaeldi í þorski og þá sérstaklega í ljósi þess að ekki var aukið við aflaheimildir þetta árið! Ef fer sem horfir verða blessuðu frændur okkar Norðmenn bæði komnir með gífurlegt forskot á okkur í seiða og áframeldi á þorski auk þess sem þeir hirða af okkur þá markaði sem við höfum verið að selja okkar frystu og unnu afurðir á því kvótaúthlutun ríkisstjórnarinnar leyfir ekki að við getum annað eftirspurn og á meðan ekki er farið á fullt skrið í eldi hjálpar eldisframleiðslan ekki til!!

En annars takk fyrir gott blogg:)

 KV Jón Stefánsson Fiskeldisfræðingur!