Kom á óvart

Á borgarafundinum sem sjónvarpað var frá Selfossi, má segja að flestir frambjóðendur hafi þulið upp sömu rulluna og áður.  Sjálfstæðismenn telja styrki og spillingu eðlilega og vilja einbeita sér að því að dæla peningum til fyrirtækja, aðrir verða bara að bjarga sér sjálfir og frjáls markaður muni leysa öll mál.  Framsókn heldur sig við sína 18 liða efnahagsáætlun, þar sem meðal annars á að framkvæma kraftaverk, sem er að afskrifa 20% af öllum skuldum án tillits hvort viðkomandi aðilar þurfi þess eða ekki og á ekki að kosta krónu fyrir ríkið eða stofnanir þess.  Samfylkingin hélt á lofti inngöngu í ESB,  Frjálslyndi flokkurinn talaði fyrir stóriðju og aukningu þorskkvóta, Lýðræðishreyfingin ræddi um að kjósendur greiddu atkvæði um nánast flest mál.  En ein ung kona kom virkilega á óvart en það var fulltrúi Borgarahreyfingarinnar, sem rökstuddi sínar skoðanir vel og komst best frá þessum fundi.  Borgarahreyfingin sem sprottin er upp úr Búsáhaldabyltingunni, svokölluðu og allt bendir til þess að þeir fái fjóra menn á þing.  Ég er viss um að málflutningur þessarar ungu konu hefur hrifið fleiri en mig og ég gæti vel hugsað mér að kjósa þann flokk.