Baldur

Bæjarstjóra Vesturbyggðar var í gær afhentur undirskriftarlisti með á sjöunda hundrað nöfnum íbúa. Þeir mótmæla fyrirhugaðri fækkun á ferðum Breiðafjarðarferjunnar Baldurs. Heimamenn telja ferðaöryggi stofnað í hættu með þessum fyrirætlunum, enda einnig í farvatninu að fækka snjómokstursdögum.

Það væri brjálæði að fækka ferðum Baldurs, því þetta er eina leiðin fyrir sunnanverða Vestfirði, til að komast á hringveg 1.  Þótt vegir væru sagðir færir  er það oft miðað við velútbúna jeppa.  Að ætla að aka á venjulegum fólksbíl þessa leið er stórhættulegt, þar sem nánast öll byggð frá Barðaströnd og að Króksfjarðanesi er komin í eyði og ef eitthvað kemur fyrir er enga aðstoð hægt að fá.  Farsímasamband á þessari leið er mjög lélegt, svo það nýtist illa.  Einnig má benda á að það þarf að fara yfir marga hálsa og heiðar, sem varla er hægt í blindbil og lélegu skyggni.  Það skeði fyrir nokkrum árum að ungt fólk var á leið til Bíldudals og festi fólksbíl sinn á Kletthálsi og fólkið ætlaði að leita sér aðstoðar og gekk niður í eyðifjörð og komst síðan að bílnum aftur og varð úti þar. Þetta er líka eina leiðin sem vöruflutningabifreiðar geta notað yfir veturinn.

Mótmæla fækkun ferða Baldurs