Dauður fiskur

Tonnum af dauðum fiski hefur skolað upp á bakka Manaquiriár í Brasilíu. Rotnandi fiskurinn í ánni gerir það að verkum að íbúar á svæðinu eru án drykkjarvatns. Líffræðingar segja að miklir hitar og þurrkar hafi valdið fiskadauðanum.

Þetta er sennilega til komið vegna loftlagsbreytinga á jörðinni.  En það er líka fullt af dauðum fiski á Íslandsmiðum, sem er af mannavöldum og þar á ég við hið mikla brottkast af fiski, sem núverandi kvótakerfi hefur leitt af sér, sem enginn vill kannast við og Hafró metur aðeins 2-3% af heildaraflanum, en er í raun miklu meira.  Í dag kemur enginn netabátur með dauðblóðgaðan fisk að landi, þótt netin hafi legið í sjó í nokkra daga áður en þau eru dregin.  Frystitogarar henda öllum fiski sem ekki hentar í vinnsluna hjá þeim, bæði stórum og smáum fiski.  Ég veit dæmi um að frystitogari fór í veiðiferð með eftirlitsmann frá Hafró um borð og á þessu skipi hafði öllum steinbít verið kastað í hafið aftur, en nú var það ekki þorandi vegna eftirlitsmannsins.  Þá kom það fyrir að talsvert af steinbít kom í trollið og þar sem ekki voru til umbúðir um borð fyrir steinbít eða nein aðstaða til að flaka hann var honum safnað saman í kör og eftirlitsmanni Hafró tilkynnt að hann yrði unnin seinna.  En á meðan eftirlitsmaðurinn svaf var öllum þessum steinbít lætt í hafið aftur og þegar hann kom á vakt aftur var sagt að búið væri að vinna allan steinbítinn.  En ekki var nú eftirlitið meira en það að þegar þessi frystitogari landaði sínum afla var eingöngu landað þorski og ýsu en engum steinbít.  Auðvitað voru engar athugasemdir gerðar við það, því lönduðum afla bar alveg saman við veiðiskýrslur skipstjórans.

Full á af dauðum fiski