Kjarasamningar

Stíf fundalota er framundan í Karphúsinu í dag, Starfsgreinasambandið fundaði í morgun með Samtökum atvinnulífsins, en um 42.000 launþegar heyra undir það. Kristján Gunnarsson formaður Starfsgreinasambandsins segir að málinu verði í dag vísað til ríkissáttasemjara, sem tekur þá ákvörðun um vinnulag við samningagerð í kjölfarið. Ríkissáttasemjari segist eiga von á að fleiri geri slíkt hið sama í dag og á næstunni.

Að sögn Kristjáns er nokkur samhljómur milli sambandsins og atvinnurekenda um að hækka beri laun þeirra sem minnst hafa, en að ágreiningur sé um upphæðir.

Landssamböndin sem heyra undir ASÍ ákváðu að fara hvert sína leið við gerð kjarasamninga eftir að ríkisstjórnin hafnaði tillögum um sérstakan persónuafslátt fyrir þá lægst launuðu. Forsvarsmenn ASÍ hafa síðan sagt stjórnvöld ábyrg fyrir því hvernig nú er komið.
Þá munu fleiri félög sem heyra undir ASÍ funda með SA síðar í dag.

Alveg er þetta dæmigerð vitleysa, ríkisstjórnin ætlar að sitja hjá og horfa þegjandi á að gerðir verði verðbólgusamningar í stað þess að liðka aðeins til svo hægt væri að bæta kjör þeirra sem verst eru settir.  Það er eins og það sé orðið lögmál hér á landi að hinir lægustlaunuðu skuli alltaf sitja eftir þegar gera á nýja kjarasamninga.  Ég hefði haldið að ríkisstjórnin bæri ábyrgð á efnahagsstjórn í þessu landi og ætti því að gera allt sem hún gæti til að liðka til fyrir hóflegum kjarasamningum.  En hún ætlar en sé ekki að gera eitt né neitt og horfa á að allt fari hér úr böndunum.  Ráðherrarnir eru auðvitað ánægðir því þeir fengu ásamt öllum æðstu mönnum þjóðarinnar launahækkun um síðustu áramót og fá örugglega aftur ef verulegar hækkanir verða í komandi kjarasamningum.  Hvar eru nú öll markmiðin um litla verðbólgu?  Gleyma ráðherrarnir öllu slíku bara ef þeir fá eitthvað fleiri krónur í eigin vasa?  Hvað er þessi ríkisstjórn eiginlega að hugsa varðandi verðbólguna eða hugsar hún kannski bara alls ekki neitt?

Stíf fundalota framundan

Höfuðhögg

Héraðsdómur Reykjavíkur hefur dæmt karlmann á þrítugsaldri í 10 mánaða fangelsi fyrir líkamsárás en árásarmaðurinn sló hinn manninn m.a. ítrekað í höfuð og líkama með straujárni. Sá sem fyrir árásinni varð hlaut m.a. mar á heila, heilahristing og skurði og aðra áverka á höfði. Þá brotnuðu þrjár tennur og sex losnuðu.

Árásin var gerð í íbúð í Reykjavík í mars árið 2006 en árásarmaðurinn réðist þar inn ásamt tveimur öðrum mönnum og misþyrmdi manni sem þar var gestkomandi.

Í niðurtöðu dómsins segir að árásin hafi verið ofsafengin  og  telja verði að hending ein hafi ráðið að árásin hafi ekki leitt til alvarlegra líkamsmeiðsla og jafnvel varanlegra örkumla.

Árásarmaðurinn hélt því fram að  tilefni árásarinnar hafi verið það að hinn maðurinn hafi stuðlað að því að 14 ára systir hans hafi ánetjast fíkniefnum. Þegar þeir hafi hist umrætt sinn hafi brotist út hjá ákærða skyndileg og sjúkleg ofsareiði, sem honum hætti til að fá.

Dómurinn segir að ekkert  liggi þó fyrir í málinu um að þessi fullyrðing um tilefni árásarinnar hafi átt við rök að styðjast og ekki er heldur fallist á að geðhagir ákærða geti afsakað gerðir hans með einhverjum hætti.

Fram kemur í dómnum, að maðurinn hefur áður verið dæmdur í sektir fyrir fíkniefnabrot. Þá var hann dæmdur í skilorðsbundið fangelsi fyrir að sprengja  rörasprengju í inngangi verslunarhúsnæðis og sekt fyrir líkamsárás.

Dæmigert mál um afleiðingar dópneyslu og örugglega ekki það síðasta.

Sló mann með straujárni í höfuðið

Ferðamálastjóri

Félag háskólamenntaðra ferðamálafræðinga (FHF) telur ráðningu nýs ferðamálastjóra algjörlega á skjön við þróun íslenskra ferðaþjónustu undanfarin ár og ekki í takt við þarfir greinarinnar.

 „Auglýst var eftir einstaklingum með menntun sem nýttist í starfi og þekkingu á Íslandi og íslenskri ferðaþjónustu. Meðal umsækjenda voru a.m.k. 7 umsækjendur með sérhæfða háskólamenntun af sviði ferðamála auk víðtækrar reynslu í atvinnugreininni. Meðal þessara umsækjanda var t.a.m. Ársæll Harðarson, markaðsstjóri Ferðamálastofu.

Undanfarin ár hefur ferðaþjónustu á Íslandi vaxið fiskur um hrygg og aukningin í fjölda ferðamanna og gjaldeyristekna hefur verið mikil.

Þetta þarf engum að koma á óvart, því þessi ráðning er alveg í takt við ráðningu í embætti Héraðsdómara á Austurlandi og ráðningu í embætti Orkumálastjóra og ég skrifaði um í gær.  Það er orðin föst hefð hér á landi að menntun og hæfni í starfið skiptir engu máli, heldur er það flokksskírteinið sem gildir og ekkert þýðir að röfla neitt yfir því.  En eitt vekur þó athygli að Össur var m.a. gagnrýndur þegar hann skipaði nýjan Orkumálastjóra fyrir það að hafa valið karl umfram konu, en núna velur hann þó konu í starfið og ætti það a.m.k. að gleðja þá sem gagnrýndu hann varðandi þá skipun vegna kynjamismunar.  En eins og ég segi þýðir ekkert að vera að röfla neitt yfir svona ráðningum.  Svona hefur þetta alltaf verið og svona verður það áfram, sama hvaða flokkar eru í ríkisstjórn.  Það er farið að pirra mig mikið að aldrei sé hægt að skipa í neina opinbera stöðu án þess að einhverjir hópar séu kvartandi og kveinandi út um allan bæ.

Gagnrýna ráðningu nýs ferðamálastjóra

Írak

Að minnsta kosti sex létust og tuttugu særðust í sjálfsmorðsárás í Bagdad. Tveimur sprengjum var varpað fyrir utan umboðsskrifstofu ríkisins sem sér um mál bænahúss súnníta í Azamiyahhverfinu í Norður-Bagdad.

Fyrri sprengjan sprakk í anddyri skrifstofunnar, en árásarmaðurinn klæddist sprengjuvesti.  Síðari sprengjan sprakk nokkru síðar á götunni fáeinum metrum frá skrifstofunni. 

Á meðal hinna látnu var starfsmaður skrifstofunnar, en hann var einnig í forystu bardagahóps súnníta, sem nýtur stuðnings Bandaríkjamanna.

Það gengur bar nokkuð vel hjá Bush í Írak að koma á friði og ró í landinu.  Auðvitað verða einhverjir að láta lífið, það er bar eðlilegur fórnarkostnaður, sem ekkert þýðir að kvarta yfir.  Þetta vor líka ekki nema sex látnir og tuttugu særðir svo það er nóg eftir af fólki.  Bush veit alveg hvað hann er að gera.  Þetta á að verða lýðræðisríki og til fyrirmyndar um hvað hægt er að gera ef rétt er staðið að málum.  Síðan er ekkert að gera annað en snúa sér næst að Íran og gera það sama þar og þá getur Bush látið stoltur af störfum sem forseti á næsta ári.  Búinn að koma lýðræði á í þessum löndum sem hafa verið alltaf til vandræða og eintómir vitleysingar við völd.

 

 

Sex létust og tugir særðust í sjálfmorðsárás í Bagdad

Hamingja

Bandaríski blaðamaðurinn Eric Weiner segist ekki vera sérlega glaðlyndur og hafi t.d. á æskuárum sínum þótt meira varið í Asnann svartsýna en Bangsímon, sem oftast var í góðu skapi. Hann hefur nú skrifað bók um ferðir sínar um heiminn í leit að hamingjunni og þar kemur Ísland við sögu.

Bandaríska blaðið USA Today fjallar um bókina The Geography of Bliss: One Grump's Search for the Happiest Places in the World  í dag. Weiner, sem er 44 ára og fréttamaður hjá bandaríska almenningsþjónustuútvarpinu, hefur ferðast um heiminn undanfarin 10 ár vegna starfs síns  og segist hafa komist að þeirri niðurstöðu að staðsetning, veðrið og menningin hafi áhrif á skaplyndi manna.

Í bókinni fjallar Weiner um 9 lönd, þar á meðal Bretland, Katar, Indland, Taíland, Ísland og Holland, þar sem býr hamingjusamasta þjóð í heima ef marka má Hamingjugagnabankann. 

USA Today hefur eftir Weiner, að hann hafi ekki búist við að líka jafn vel við Ísland og raun bar vitni. „Ég fór þangað um miðjan janúar, þegar sólin gægist aðeins í stuttan tíma yfir sjóndeildarhringinn á daginn. En þrátt fyrir kuldann og myrkrið eru Íslendingar ótrúlega skapandi og ekki hræddir við mistök."

Þegar Weiner var búinn að fá of mikið af ánægju heimsótti hann niðurdrepandi land: Moldavíu.  „Moldóvar eru í raun og sann niðurdregnir. Þeir eru ekki fátækasta þjóð heims en landið er tiltölulega fátækt í jaðri hinnar ríku Evrópu. Einu sinni voru þeir stoltir af því að vera hluti af Sovétríkjunum, nú tilheyra þeir engu." 

Ekki vei ég hvar þessi maður fann allt þetta hamingjusama fólk á Íslandi.  Hann hefur örugglega ekki farið mikið út á landsbyggðina, þar sem fólk situr í átthagfjötrum í verðlausum eignum sínum og jafnvel atvinnulaust og sér enga framtíð.  Hann hefur líklega ekki hitt marga öryrkja eða ellilífeyrisþega sem fastir eru í fátæktargildru og ómögulegt er að komast úr.  Um þessa speki þessa manns, segi ég bara rugl og aftur rugl.  Am.k. þarf ég ekki að heimsækja Moldavíu vegna þess að ég sé búinn að fá yfir mig nóg af ánægju og hamingju, það eru einfaldlega mörg ár síðan ég man eftir þeim hugtökum.

Hamingja á Íslandi

Umdeildar ráðningar

Tvær ráðninga hjá hinu opinbera nýlega hafa verið mjög umdeildar, annarsvegar ráðning Þorsteins Davíðssonar í stöðu héraðsdómara á Austurland, sem skipaður var í stöðuna af Árna Matthíesen sem settur var dómsmálaráðherra til að skipa í stöðuna.  Hin ráðningin er skipun Guðna A Jóhannessonar í embætti orkumálastjóra sem Össur Skarphéðinsson skipaði fyrir stuttu.  Mbl. sá ástæðu til að fjalla um skipun orkumálastjóra en ekki um skipun héraðsdómarans og skrifaði um það í Staksteinum sl. laugardag að Guðni A. Jóhannesson væri vinur Össurar og þeir hefðu m.a. starfað saman í gamla Alþýðubandalaginu.  Ekki treysti ég mér til að dæma um hvort eitthvað óeðlilegt sé við þessar ráðningar, ég bara trúi því og treysti að ráðherrarnir tveir viti hvað þeir eru að gera.  Þeir eru einfaldlega að fylgja þeirri reglu sem er algeng hér á landi, að ráðning í opinberar stöður byggist mjög oft á einhverjum tengslum eða vináttu viðkomandi umsækjanda og þess ráðherra sem í stöðuna skipar.  Hversvegna Mbl. finnst skipun Össurar eitthvað ólík skipun Árna skil ég ekki.  Ég bar spyr, Þorsteinn Davíðsson er að vísu sonur Davíðs Oddsonar, seðlabankastjóra, en á það eitt að gera hann óhæfan til að vera héraðsdómari?   Og er Guðni A. Jóhannesson eitthvað óhæfari til að vera Orkumálastjóri þótt hann sé kunningi og vinur Össurar?   Ekki veit ég það,  því hvoruga þessara manna þekki ég á nokkur hátt.  Við verðum að átta okkur á einu að í báðar þessar stöður er skipað af ráðherrum og þótt einhverjar nefndir séu látnar meta hæfi umsækjanda þá er það ráðherrann sem á endanum ræður.  Ég held að það ætti að leggja þessar nefndir niður til að forðast að umsækjendum sé raðað í einhverja röð eftir hæfni.  Hæfni umsækjanda hefur ekkert með það að gera hver verður ráðinn, heldur hitt að maður þekki mann.  Ég held að Mbl. hefði átt að sleppa því að vera að hnýta í Össur út af því að hann skipaði Guðna A. Jóhannesson í stöðu Orkumálastjóra, því sú skipan er alveg hliðstæð skipan Árna Matthiesen á Þorsteini Davíðssyni í stöðu héraðsdómara þetta er alveg í stíl og svona hefur þetta verið með flestar stöðuveitingar hjá hinu opinbera og svona verður það.  Það er flokksskírteinið sem gildir en ekki einhver hæfni til að gegna starfinu, það er aukaatriði.  Kona sú sem mest hefur gagnrýnt skipun Orkumálastjóra hefði einfaldlega átt að ganga í Samfylkinguna til að koma til greina og án þess að ég viti í hvaða flokki sú ágæta kona er, getur hún nú sjálfri sér um kennt fyrir sinn klaufaskap.

Hlutabréf

Hlutabréf hafa haldið áfram að lækka í verði í viðskiptum í Kauphöll Íslands í morgun og hefur Úrvalsvísitalan lækkað um 0,42%. Bréf SPRON hafa lækkað um 1,7%, Exista um 1,1% og FL Group um 0,7%.
Mikið er maður nú heppinn að hafa aldrei haft efni á að kaupa hlutabréf og getur þar af leiðandi verið áhyggjulaus um hvert gengi þeirra er á hverjum tíma.

Hlutabréf halda áfram að lækka

Nýtt ár

Þá er það loksins komið árið 2008 og þótt rignt hafi yfir mig góðum ármótakveðjum og blöðin eru yfirfull af slíkum kveðjum og ekki vantaði lofgjörðina hjá öllum helstu ráðamönnum þjóðarinnar í þeirra áramótaávörpum, þá á ég ekki von á því að þetta nýja ár verði hvað mig varðar neitt öðruvísi en það síðasta.  Eftir að ég varð öryrki hafa öll árin verið svipuð og einkennst af fátæktarbasli og ég held að 2008 verði engin undantekning frá því.  Ég sá í Morgunblaðinu í gær að sparisjóðurinn Byr var að óska öllum fjárhagslegs bata á nýju ári.  Ekki held ég að það eigi við mig, því á nýjársdag settist ég við tölvuna og opnaði minn heimabanka til að greiða það sem ekki verður komist hjá að greiða.  Frekar voru nú upphæðirnar litlar inn á mínum reikningi og fljótar að lækka við hverja greiðslu.  Reyndar höfðu skattleysismörkin hækka eitthvað lítilsháttar eða um 1800 krónur , en að öðru leyti voru mínar bætur svipaðar og áður.  Ég sá líka í fréttum að grunnlaun Seðlabankastjóra hefðu verið hækkuð um áramót um 100.000,- og með því væri búið að hækka laun Davíðs Oddsonar frá því hann tók við því embætti um 40%. Eins voru laun allra helstu embættismanna þjóðarinnar hækkuð.   Bara þessi hækkun núna kr. 100.000,- er hærri upphæð en ég fæ í örorkubætur á mánuði.  En ég er því miður ekki Seðlabankastjóri, aðeins aumur öryrki.  En þessar launahækkanir núna eru svolítið skrýtnar í ljósi þess að framundan eru kjarasamningar og mikið rætt um að launahækkanir verðu að vera hóflegar til að verðbólgan fari ekki á fulla ferð.  Hefði nú ekki verið skynsamlegra að þessir æðstu menn þjóðarinnar hefðu beðið með sínar launahækkanir, þar til kjarasamningar hefðu náðst, eða sýnt gott fordæmi og hreinlega afþakkað þær.  Mér er alltaf minnistætt, sem barni, þegar ég spurði eitt sinn ömmu mína á Bíldudal, af hverju hún hlakkaði aldrei til jólanna og hún svaraði mér því til að það eina sem vekti hjá henni tilhlökkun væri það að eftir jólin færi daginn að lengja á ný og ætli sé ekki eins hjá mér hvað varðar árið 2008.  En þó er eitt sem snertir okkur öryrkjana, en það er að um áramótin fluttist sá málaflokkur sem okkur varðar úr heilbrigðismálaráðuneytinu í félagsmálaráðuneytið, þar sem Jóhanna Sigurðardóttir ræður ríkjum og ef það er einhver stjórnmálamaður á Íslandi sem raunverulega vill bæta kjör þeirra sem minna mega sín í þjóðfélaginu þá er það Jóhanna Sigurðardóttir og er það eina vonin sem ég bind við nýtt ár.