Tombólur

Börn hafa löngum verið dugleg við að styrkja Rauða Krossinn með því að halda tombólur. Oft má sjá þau við stórmarkaði eða á götum úti þegar veður er gott og bjóða þá ýmsan varning til sölu eða eru með tombólu. Rauði Krossinn lætur ágóðann renna til fátækra barna svo þarna eru börn að safna fyrir börn.

Ég dáist alltaf að þegar börnin eru að að halda þessar tombólur og virðingarvert af Morgunblaðinu að birta alltaf myndir og nöfn barnanna þegar þau afhenda peningana sem þau hafa safnað.  Börnin eru svo einlæg í þessu starfi sínu og ég hef þann sið að versla alltaf á tombólum hjá börnum.  Ég kalla það ekki minna afrek að börn skuli í sumar hafa látið Rauða-krossinn hafa kr. 70.000,- en þótt einn auðmaður gefi nokkur hundruð milljónir.  Sá ríki er að kaupa sér ímynd en börnin ekki.

Tombóla tombóla

Radowan Karadizic

Radovan Karadzic, sem er sakaður um þjóðarmorð og glæpi gegn mannkyninu, hyggst verja sig sjálfur þegar stríðsglæpadómstóllinn í Haag mun rétta í máli hans. Frá þessu greindi lögmaður Karadzic í dag.

Hann klárar það örugglega karlgreyið enda skipta varnir engu máli hjá þessum dómstól.  Það er löngu búið að ákveða niðurstöðuna áður en réttarhöld hefjast.  Hefur fólk virkilega trú á að heimurinn batni þótt eitt gamalmenni verði líflátið, það er þá ekki mikið að.  Það eina sem upp úr þessu hefst er að nú blossa upp aftur deilur þjóðarbrota í fyrrum Júkóslavíu þar sem sæmilegur friður var þó komin á.  Þessi réttarhöld eiga eftir að kosta mörg saklaus mannslíf.

Hyggst verja sig sjálfur

Hús rifið

Hafist var handa í dag við að rífa hús Stálsmiðjunnar við Mýrargötu í Reykjavík. Framkvæmdir við endurnýjun götunnar hófust í lok mars. M.a. er gert ráð fyrir að timburkirkja í rússneskum stíl rísi við götuna á vegum rússnesku rétttrúnaðarkirkjunnar hér á landi.

Þá eru horfin öll þau mannvirki sem aldarmótamennirnir byggðu upp við Reykjavíkurhöfn af stórhug, reyndar er slippurinn sjálfur eftir en hann mun eiga að fara upp á Grundartanga.  Einnig tókst að bjarga gamla Alliace húsinu en þá varð að hafa þar verslun.  Það  má helst ekkert sjást við Reykjavíkurhöfn sem minnir á sjósókn eða fisk nema í formi safna.  Var nú ekki hægt að finna aðra lóð fyrir timburkirkju í rússneskum stíl en einmitt þarna.  Síðan er Laugavegurinn heilagur þar má ekki hreyfa við neinum kofa og verðlaunatillagan um nýtt hús fyrir Listaháskóla Íslands sem byggja á við Laugaveg er ekki nógu ljót og gamaldags svo hægt verði að nota hana.

Hvað er eiginlega að í Reykjavík er fólk búið að gleyma að hún byggðist upp vegna öflugrar útgerðar og fiskvinnslu.  Verður kannski það næsta að banna að fiskiskip komi í þessa höfn, það kæmi ekki á óvart.

Hús Stálsmiðjunnar rifið

Grandi hf.

Guðmundur A. Birgisson, hefur selt nær allan hlut sinn í Granda, eða rúmlega 2,7 milljónir hluta á genginu 10,5 og fær þá tæpar 29 milljónir króna fyrir söluna.

 Það er betra að eiga 29 milljónir í peningum en smá hlut í einum af risunum í íslenskum sjávarútvegi.  Þar sem Guðmundur átti aðeins 2,7 milljónir í félaginu gat hann í mesta lagi vænst að fá 10% arð og arður er alltaf reiknaður af nafnverði þetta hefði því orðið 270 þúsund en nú bjóða sumir bankar 15% innlánsvexti á ákveðnum reikningum og ef hann leggur inn á einn slíkan fær hann 435 þúsund í vexti á ári.  Skynsamur maður hann Guðmundur A. Birgisson.

Selur nær allan hlut sinn í HB Granda

Lopapeysur

Sala á lopapeysum hefur rokið upp úr öllu valdi vegna lágs gengis íslensku krónunnar. Prjónakonur landsins keppast við en samt er svo komið að skortur er á lopapeysum í algengum stærðum.

Það er mjög ánægjulegt að fá svona jákvæðar fréttir í öllu krepputalinu.  Látum alla hagfræðinganna fara að prjóna lopapeysur þar myndu þeir gera mest gagn fyrir íslenskt efnahagslíf.

Krónan niður ullin upp

Icelandair Express

Iceland Express mun í september taka í notkun tvær Boeing 737-700 flugvélar. Það er Astreus Airlines, systurfélag Iceland Express, sem á og rekur vélarnar sem koma í stað MD90 vélanna sem flogið hafa fyrir Iceland Express.

Það er enga uppgjöf að sjá á þessu félagi og þessi vélaskipti er vegna hækkandi eldsneytisverðs en nýju vélarnar eyða mun minna en þær eldri.  Þar sem félagið er ekki með flugrekstrarleyfi á Íslandi þarf annað félag með slíkt leyfi að reka vélarnar að nafninu til.

Til hamingju Icelandair Express.

Iceland Express fær tvær Boeing 737 vélar

Gömul skip

Tvö af af elstu skipum Samherja komu nýlega úr sinni síðustu veiðiferð eftir langan og farsælan feril hjá félaginu. Eru þetta Norma Mary, áður Akureyrin EA-110, og Víðir, áður Apríl HF. Skipin stunduðu bæði bolfiskveiðar og ár eftir ár hafa þau verið meðal þeirra íslensku skipa sem skilað hafa mestu aflaverðmæti.

Þetta eru að verða örlög okkar skuttogaraflota sem eitt sinn taldi yfir 100 skip eitt af öðru fara þau í brotajárn en sem betur fer hefur Samherji hf. verið kraftmikill í að endurnýja sinn flota og þetta mun vera liður í því.  Síðan eru margir aðrir togarar bundnir við bryggju vegna kvótaleysis og hins háa olíuverðs.  Ég held að þetta háa olíuverð leiði til þess að skuttogaraútgerð leggst af á Íslandi. á komandi árum.

Síðasta veiðiferðin

Grásleppuveiðar

Mig hefur oft dreymt um að vera ríkur og gert margar tilraunir til þess.  1975 var ég að vinna í fyrirtækinu Matvælaiðjan hf. á Bíldudal en þá hafði dregið mjög úr rekstri þess fyrirtækis og aðeins unnin rækja.  Föðurbróðir minn,  Kristján Ásgeirsson var þarna framkvæmdastjóri og einnig annar frændi minn Jörundur að nafni að vinna þarna.  Um vorið gengum við þá hugmynd að fara í grásleppuútgerð og verkun og allt benti til að þetta yrði stórgróða fyrirtæki.  Kristján pantaði öll veiðarfæri frá SÍS og hrognatunnur og allt var þetta tekið út í reikning sem yrði síðan gerður upp með væntanlegri sölu á grásleppuhrognunum.  Þegar vinnu lauk í rækjuvinnslunni á daginn fórum við félagar að setja upp netin og unnum oft fram á kvöld.  Svo kom að því að allt var klárt.  Matvælaiðjan átti á þessum tíma 3 báta og völdum við minnsta bátinn Hólmaröst BA-37  11 brl. til veiðanna.  Það var ákveðið að Jörundur yrði skipstóri, ég vélstjóri og Kristján óbreyttur háseti.

Svo rann stóra stundin upp að farið var á sjó til að leggja netin og fórum við yst í Arnarfirðinum og lögðum fram af Selárdal einnig lögðum við nokkrar trossur norðan megin við Lokinhamra og fórum síðan í Geirþjófsfjörð með tvær trossur.  Við létum þetta liggja í 2-3 daga en þá var farið á sjó til að draga.  Við byrjuðum að draga við Selárdal og var þokkalegur afli þar.  Ekki höfð'um við neitt spil til að draga netin og drógum við Kristján þetta á höndum en Jörundur var við stjórn í stýrishúsinu og andæfði bátnum.Þegar við höfðum lokið við að draga og leggja aftur við Selárdal var farið yfir að Lokinhömrum og dregið þar en afli var lítill svo við ákváðum að leggja þær trossur við Selárdal.  Þá áttum við eftir trossurnar í Geirþjófsfirði og þar sem þangað var talsvert stím sagðist Kristján að hann ætlaði að fara niður í lúkar og laga kaffi og eftir smástund sá ég að vel rauk úr reykháfnum, en eftir smástund kallar Kristján á mig og réttir mér fötu og biður mig að setja sjó í hana.  Ég spurði undrandi hvað ætlar þú að gera, ekki ferðu að laga kaffið með sjó.  Nein,nei sagði hann það eru smávandræði það er kviknað í lúkarnum og ég sá reyk leggja upp á dekkið.  Ég rétti honum fötuna og spurði hvort þetta væri nóg.  Já, já sagði hann ég er líka með vatn til að skvetta á eldinn.  Svo kom að því að Kristján kallaði á mig í kaffið og fór ég niður og sátum þar og spjölluðum lengi saman.  Eftir góa stund heyrðist kallað úr stýrishúsinu með valdsmannslegri röddu; "Á dekk strákar við erum að verða komnir".  Þá fórum við upp og vorum þá að sigla inn Geirþjófsfjörðinn.  Jörundur skipaði okkur að svipast eftir baujum svo hægt væri að byrja að draga.  En allt í einu er eins og högg komi á bátinn og hann stoppar og við Kristján duttum flatir á dekkið.  Hvað er nú að ske sagði skipstjórinn?  Kristján leit út fyrir borðstokkinn og sá þá að báturinn var strandaður.  Við höfðum sem sagt lagt netin á flóði en nú var háfjara og það fellur mikið út í þessum firði og við sáum í kíkir okkar baujur sem lágu flatar á þurrum botni. Það var sama hvað við reyndum að losa bátinn að ekkert gekk og urðum við því að bíða eftir flóði og gátum þá dregið netin og ákváðum við að leggja ekki  þarna aftur heldur fórum heim og næst þegar við fórum að Selárdal lögðum við þessar trossur þar líka og vorum nú með öll netin á sama svæði.  Hrognin verkuðum við sjálfir og í vinnslusal Matvælaiðjunnar. 

Þegar við höfðum verið við þetta í um 2 mánuði og búnit að fá á milli 20-30 tunnur gerði mikið hvassviðri af NA og næst þegar við fórum að draga voru netin full af þara og drullu.  Urðum við því að taka þau öll í land til að láta þetta þorna svo betra væri að hrista þarann úr.  En það dróst stöðugt að við byrjuðum á því verki.  Þegar netin höfðu hangið utan á hjalli yst í þorpinuí um 2 mánuði fréttum við að nokkrar rollur hefðu flækt sig í netunum og drepist.   Eigandi hafði þeirra skorið allt í tætlur.  Var því lokaverkefnið hjá okkur í þessari útgerð að aka leifarnar af netunum og fara með til brennslu á sorphaugum Bíldudals.  Við urðum að greiða bætur fyrir rollurnar sem drápust og þegar öll hrognin höfðu verið seld og lokauppgjör kom frá SÍS vorum við í skuld sem enn er ógreidd.

Ég hef aldrei síðan reynt við grásleppuútgerð eða verkun og aldrei orðið ríkur maður hvað peninga varðar.

Ekki bara Mest

að var ekki bara fyrirtækið Mest sem Glitnir hirti bestu molana frá upp í skuldir.  Nú hefur verið byrjað að hrærara í eignasafni Hannesar Smárasonar og Landsbankinn hefur tekið Oddaflug ehf. sem nú heitir EO-fjárfestingarfélag en aðaleign þess félags er í félaginu Stoðum sem aftur á stóran hluti í Baugi.  Þá hefur Byr-sparisjóður tekið frá Hannesi félagið Prímus sem nú heitir FI-fjárfesting en helstu eignir þess félags eru stór hlutur í Húsasmiðjunni, stór hlutur í  Apple-umboðinu, og í Hótel Búðum og talsverður hlutur í Byr.  Er því búið að hirða af Hannesi mest af hans eignum í fyrirtækjum.

Því er spáð að slíkum atburðum eigi eftir að fjölga mjög á næstu mánuðum að bankar hirði bestu molana úr hverju fyrirtækinu á eftir öðru og þeir sem fyrir nokkrum síðan voru taldir vera moldríkir menn, sem gætu gleypt allt það sem þá langaði í, séu nú fátæklingar.

Það hefur verið í fréttum að talsverður samdráttur hefur orðið í smásöluversluninni en stórmarkaðirnir ætli að bíða fram yfir verslanamannahelgi með hópuppsagnir.  Enda væri það álitshnekkir fyrir alla verslun ef hópuppsagnir væru rétt fyrir verslunarmannahelgi.

Húsbyggingar

Nú er kominn upp furðuleg staða á fasteignamarkaðnum.  Vegna hárra vaxta og gengislækkunar er byggingarkostnaður á nýjum íbúðum orðinn hærri en mögulegt söluverð þeirra.  Þannig að fjöldi verktaka situr uppi með nýjar búðir sem aldrei seljast og enda hjá bönkunum sem eign um leið og viðkomandi verktaki verður gerður gjaldþrota.  Talið sé að þetta séu á milli 3.000 til 4.000 íbúðir og rað- og einbýlishús.