Spakmæli dagsins

Eitt bros-getur dimmu í dagsljós breytt,

sem dropi breytir veig heillar skálar,

Þel getur snúist við atorð eitt.

Aðgát skal höfð í nærveru sálar.

(Einar Benediktsson)

Siðlaust

Fjórir stærstu bankar Svíþjóðar greiddu starfsmönnum sínum 5,7 milljarða sænskra króna (sem samsvarar um 85 milljörðum íslenskra kr.) í kaupaukagreiðslur í fyrra. Þetta var gert þrátt fyrir að verðmæti eigna bankanna hafi skroppið verulega saman. Þetta kemur fram í sænska dagblaðinu Dagens Nyheter.

Hvernig er þetta eiginlega með þá menn sem verða bankastarfsmenn, verða þeir algerlega siðlausir og skynja ekki lengur verðgildi peninga.  Við vitum öll hvernig þetta var hér á landi.  En svo varð ég alveg steinhissa þegar fréttist um laun hjá þeim sem eru í skilanefndum bankanna og gagnrýna fyrrverandi bankastjóra fyrir bruðl og fá svo sjálfir þrjár milljónir á mánuði.  Þannig að tími ofurlauna er ekki liðinn á Íslandi.

85 milljarðar í kaupaukagreiðslur

ASÍ

Miðstjórn ASÍ telur nauðsynlegt að settar verði siðareglur um fjárfestingar lífeyrissjóða og fyrirmyndareglur um daglega starfsemi þeirra, þ.m.t. starfskjör, gjafir, risnu og ferðalög, og þær verði kynntar fyrir ársfundi lífeyrissjóðanna. Miðstjórnin segist harma þann fréttaflutning og framsetningu sem fjölmiðlar hafi kosið að nota í umfjöllun um málefni lífeyrissjóðanna, þar sem stjórnir og starfsmenn þeirra séu ómaklega ásökuð um refsiverða framsetningu ársreikninga og réttinda sjóðsfélaga.

Komin tími til að hreins aðeins til í þessu kerfi.  Það þýðir lítið fyrir þessa höfðingja að harma fréttaflutning af málefnum lífeyrissjóðanna.  Þessar fréttir eru bara um hvernig menn hafa hagað sér, sem stjórna þessum sjóðum.  Eða finnst þeim ekki neitt fréttnæmt við að laun forstjóra sjóðanna séu tugir milljóna á ári auk ýmissa hlunninda.

ASÍ vill siðareglur um lífeyrissjóði

Sparnaður

Svandís Svavarsdóttir borgarfulltrúi VG segir borgaryfirvöld hygla byggingaverktökum á kostnað skólabarna. Borgin ætli að hækka leikskólagjöld og draga úr kennslu meðan verktakar fái fimmhundruð milljónir í verðbætur vegna kreppunnar. Formaður borgarráðs segir borginni forðað frá málaferlum.

Alltaf finnur íhaldið leið til að hygla að sínum, svo eru að koma kosningar þá er auðvitað ekki hægt að láta þessa kalla vera peningalausa.  Kosningarsjóðirnir þurfa sitt.  Fólk getur auðveldlega sloppið við að greiða leikskólagjöld með því að hætta að eignast börn.  Annars var ég að lesa viðtal við Kjartan Magnússon (D) varðandi leikskólagjöldin og hann sagði að þetta væri alveg í samræmi við áætlanir sem gerðar hefðu verið.

Hvernig geta verktakar krafist aukagreiðslu frá borginni vegna kreppunnar, gerðu þessir verktakar ekki ákveðin tilboð sem þeir verða að standa við eða var samið bak við tjöldin um þessar aukagreiðslur.  Það hefur aldrei verið hagstæðara en í dag að fá verktaka til að bjóða í verk og útboð Vegagerðarinnar sýna að slegist er um hvert útboð.  Þannig að þetta er nú frekar ódýr afsökun hjá Óskari Bergssyni.

Verktakar fram fyrir skólabörn

Mótmæli

Röskva, samtök félagshyggjufólks við Háskóla Íslands, hefur blásið til setuverkfalls stúdenta á skrifstofu rektors á morgun. Stúdentar krefjast þess að teknar verði upp sumarannir þar sem margir þeirra sjá fram á atvinnuleysi í sumar.

Þetta finnst mér gott hjá Röskvu, því námsmenn verða í miklum erfiðleikum í sumar.  Enga vinnu að fá og þeir eiga fæstir rétt á atvinnuleysisbótum, sem mér finnst reyndar talsvert skrýtið því nám er jú hörku vinna.  Sem betur fer eigum við mjög góðan menntamálaráðherra, sem mun hafa fullan skilning á þessu vandamáli og engum væri treystandi betur en Katrínu Jakobsdóttur til að leysa þennan vanda.

Blása til setuverkfalls á skrifstofu rektors

1. aprílgabb

Heldur óvenjulegar tilkynningar heyrðust lesnar upp á Rás 2 rétt fyrir kl. 14 í dag þar sem m.a. írskir þrælar og leðurhommar komu við sögu. Ólafur Páll Gunnarsson, umsjónarmaður Popplands, segir að um gamlar upptökur úr safni Ríkisútvarpsins hafi verið að ræða.

Það er best að kaupa nokkur stykki af kvenkyni og verðið skiptir ekki máli því ég á enn töskuna góðu með öllum peningunum.

Írskir þrælar til sölu

Landhelgisgæslan

Nú berast fréttir af því að Landhelgisgæslan sé í viðræðum við Norðmenn um leigu á hinu nýja varðskipi sem er verið að smíða í Chile.  Svo aumur er fjárhagurinn hjá þessari stofnun að aðeins er hægt að kaupa olíu á annað varðskipið í einu og verður hitt þá að liggja í höfn á meðan eða í um einn mánuð í einu..  Þessari stofnun eru falin mikilvæg hlutverk sem þarf að sinna og hvernig á það að vera hægt með aðeins einu varðskipi í 200 sjómílna lögsögu.  Gæsla hefur eftirlit með að ekki sé veitt á ákveðnum svæðum og fer reglulega um borð í fiskiskip til að athuga hvort löglega sé lögskráð á skipin og skoðar veiðarfæri ofl. eftirlit.  Gæslan á líka von á nýrri flugvél og ætli hún verði ekki leigð líka, því nú hefur verið ákveðið að draga stórlega úr öllu flugi.  Til hvers þarf Gæslan nýja flugvél, þegar ekki eru til peningar til að fljúga þeirri eldri?  Við núverandi tekjur er Landhelgisgæslunni ómögulegt að sinna því sem henni er falið.  Svo erum við með Varnarmálastofnun sem mun víst kosta einhverja milljarða á ári að reka.  Allt það sem Varnarmálastofnun gerir gæti Gæslan auðveldlega sinnt.  Væri því ekki upplagt að sameina þessar stofnanir og nýta fjármunina betur.  Þá væri kannski hægt að halda báðum núverandi varðskipum í rekstri samtímis og við gætum stoltir tekið við hinu nýja varðskipi og nýrri flugvél.  Landhelgin eru okkar landamæri og varðskipin og flugvélarnar okkar landamæraverðir.

Það þætti skrýtið hjá sjálfstæðri þjóð ef hún gæti ekki sinnt landamæraeftirliti nema annan hvern dag eða annan hvern mánuð og svo væri allt galopið þar á milli.  Eins væri það ef tollgæslan sinnti bara tollgæslu annan hvern mánuð og sjúkrahús tækju ekki við sjúklingum nema annan hver mánuð.  Þetta er staðan hjá Landhelgisgæslu Íslands í dag.  Ég er einn af þeim sem hef notið þjónustu hjá þyrlu Gæslunnar eftir alvarlegt slys á sjó og veit því hve mikilvægt þetta er fyrir öryggi sjómanna.  Hvað ætli fólk segði ef einhver slasaðist alvarlega út á sjó eða inn á örævum og óskað væri eftir þyrlu til aðstoðar og fengi eftirfarandi svar;

Því miður er þetta ekki hægt, því við eigum ekki eldsneyti á eina þyrlu.

Niðurskurður

„Það er okkar mat að öryggi íbúa á Þórshöfn og í Þistilfirði sé ógnað. Það eru 64 kílómetrar í næsta sjúkrabíl á Raufarhöfn og þessi leið er oft illfær. Það eru því að lágmarki 40 til 45 mínútur í sjúkrabíl,“ segir Konráð Jóhannsson, fyrrverandi sjúkraflutningamaður á Þórshöfn.

Það er eins og þessi möppudýr í ráðuneytunum líti bara á landakortið og mæli vegalengdir út frá því og reikna svo með að þessir vegir séu alltaf færir og jafn greiðfærir og t.d. Reykjanesbrautin.  Þetta mun víst vera sparnaður fyrir kr: 1.600 þúsund á ári og vegur því mjög lítið í öllum þeim niðurskurði sem þarf að fara fram í heilbrigðiskerfinu.  Nú er ekki lengur hægt að treysta á þyrlur því það þarf að spara svo mikið hjá Landhelgisgæslunni.  Hvers virði er eitt mannslíf í augum þeirra sem leggja fram svona tillögur.

Öryggi íbúa ógnað

Hvalaskoðun

Hvalaskoðunarsamtök Íslands hafna alfarið þeim tillögum sem starfsmenn Hafrannsóknarstofnunar hafa sett fram afmörkun svæða til hvalaskoðunar. Segja samtökin að tillagan beri þess ríkulega merki að Hafrannsóknastofnun hafi frá upphafi verið málpípa hvalveiðimanna og hvalveiðistefnu stjórnvalda hverju sinni.

Hverskonar andskotans frekja er þetta hjá þessum hvalaskoðunarfyrirtækjum.  Telja þeir sig hafa einkarétt á að sigla um ákveðin hafsvæði við Ísland.  Það á ekki að hlusta á svona rugl.  Hvalveiðar og hvalaskoðun geta ágætlega farið saman, en þá má annar aðilinn ekki heimta að hinn sé útilokaður frá sinni starfsemi.  Ég held að þegar hvalveiðarnar hefjast fyrir alvöru verði ferðamönnum mest seldar ferðir upp í Hvalfjörð til að skoða hvalina.  Það er sú samkeppni sem þessir aðilar eru hræddir við.

Hafna tillögum um hvalaskoðunarsvæði

Hvað á ég að gera?

Í morgun þurfti ég að fara til Reykjavíkur og á hringtorginu sem skiptir leiðum til Flugstöðvarinnar, Reykjavíkur og Voga, lá í vegkanntinum svört skjalataska og virtist hafa verið hennt út úr bíl.  Ég stoppaði og tók töskuna og hélt síðan áfram og skömmu seinna mætti ég lögreglubíl með blikkandi ljósum.  Þegar ég var kominn til Reykjavíkur fór ég á Kaffivagninn við Grandagarð og hafði töskuna fínu með mér.  Þegar ég var búinn að drekka kaffi fór ég að athuga hvað væri í töskunni og var auðvelt að opna hana.  Þegar ég sá innihaldið þá var næstum því liðið yfir mig.  Í töskunni voru hvorki meira né minna en 500 þúsund dollarar eða 575 milljónir íslenskra króna.  Ég fór síðan heim aftur og setti töskuna inn í skáp og í allan dag hef ég verið að brjóta heilan um hvað ég ætti að gera.  Á ég bara að hirða þessa peninga eða vera góður borgari og fara til lögreglunnar og skila töskunni.  Ef ég fer til lögreglunnar er ég hræddur um að lenda í miklum yfirheyrslum og jafnvel settur í fangelsi, því ég get á engan hátt gert grein fyrir þessum peningum og ekki víst að lögreglan trúi því að ég hafi bara fundið þá.  Það hefur hvarlað að mér að fara á einhvern stað og brenna þessa peninga, en samt væri gott að eiga þá.  Ég er viss um að einhver útrásarvíkingurinn hefur átt þessa tösku og ætlað úr landi með þessa peninga en frétt að lögreglan væri á eftir honum og því ekki þorað að taka hana með sér og því hennt henni út úr bílnum.

Nú verð ég að biðja ykkur mínu kæru bloggvinir um ráð;

Hvað á ég að gera?