Nú er mál að linni

Undanfarna mánuði hefur allt starf Alþingis einkennst af skotgrafahernaði milli stjórnarliða og stjórnarandstöðu og allur málflutningur hefur snúist um aukaatriði og einstakar persónur í þessu andskotans Icesave-máli.  Með slíkum vinnubrögðum minnkar virðing almennings fyrir Alþingi og við komumst ekkert áfram með málið.  Það er eins og allir vilji vera sigurvegarar í þessu máli.

Nú held ég að sé komið nóg af innihaldslausu kjaftæði um Icesave og hvað sem hver segir fer þetta vandræðamál ekkert frá okkur og þarf að leysa.  Er því tími til komin og stjórn og stjórnarandstaða snúi bökum saman og fari að vinna að lausn málsins og vinna eins og siðað fólk, en ekki eins og börn í sandkassaleik.  Sennilega væri best að fá erlendan utanaðkomandi aðila til að miðla málum á milli Íslands annars vegar og Breta og Hollendinga hins vegar.  En lausnin verður aldrei að veruleika nema að Alþingi taki upp önnur vinnubrögð en verið hafa hingað til.  Þegar við áttum í þorskastríðunum við Breta og Þjóðverja stóð Alþingi allt saman heilshugar á bak við þá ríkisstjórn, sem var við völd á hverjum tíma of samstaða ríkti meðal þjóðarinnar.  Það nákvæmlega þarf að gerast í Icesave-málinu ef ásættanleg lausn á að nást.

Sameinuð stöndum við en sundruð föllum við.