ÁTVR

Landlæknisembættið segir, að niðurstöður rannsókna bendi eindregið til þess, að einkasala ríkisins á áfengi dragi úr neyslu og tjóni sem af henni hlýst og ef einkasölunni sé aflétt aukist heildarneysla áfengis. Alþingi fjallar nú um frumvarp um að einkasala ÁTVR verði aflögð á öðru áfengi en því sem er með meiri vínandastyrk en 22%. Einnig er í frumvarpinu lagt til að áfengisgjald verði lækkað.

Ekki ætla ég að gagnrýna þá sem vilja afnema einkasölu ÁTVR á sölu léttvíns og bjór og jafnvel sterkum drykkjum líka.  Ég notaði þetta mikið og oft alltof mikið en er nú svo lánssamur að hafa getað hætt þessari neyslu minni, en þrátt fyrir það tel ég ekkert athugavert við að þeir sem vilja kaupa þessa vöru geti gert það hvar sem þeir vilja.  Það er staðreynd og ég þekki það best út frá eigin neyslu að sá sem ætlar sér að nálgast áfengi finnur alltaf leiðir til þess og jafnvel þótt áfengissala yrði bönnuð með öllu, yrði það ekki til að gera Ísland áfengislaust.  Á meðan eftirspurn er eftir ákveðinni vöru verða alltaf einhverjir til að fullnægja þeirri eftirspurn.  Hvort sem það er löglegt eða ólöglegt.  Núverandi fyrirkomulag stuðlar að frekari drykkju en ella.  Bara það eitt að þurfa að gera sér sérstaka ferð í áfengisverslun verður til þess að fólk kaupir mun meira en það myndi gera ef hægt væri að nálgast þessa vöru í næstu matvöruverslun.  Víða á landsbyggðinni hefur ÁTVR farið þá leið að opna áfengisútsölur í samstarfi við verslanir og jafnvel bensínstöðvar, en auðvitað er vínbúðin aðskilin frá annarri verslun og hygg ég að svo verði einnig gert þótt þetta fari í matvöruverslanir, sjoppur og fleiri staði.  Það vita sjálfsagt margir að áfengissala á svörtum markaði er nú stunduð í stórum stíl af leigubílstjórum og fleiri aðilum t.d. veit ég um eina sjoppu í Reykjavík sem selur bjór til þeirra sem eru þar fastakúnnar.  Eins og ég sagði áður, að þótt ég hafi hætt neyslu á þessari vöru, finnst mér ósköp eðlilegt að þeir sem vilja nota slíka vöru fái að gera það og versla þar sem þeim finnst þægilegast.

Landlæknir: Afnám einkasölu ÁTVR mun auka áfengisneyslu

Athugasemdir

[FS 19.10.2007 kl. 09:54]

Ekki gleyma þeim sem hafa ekki aldur til að versla í ÁTVR.

Það að troða þessu í verslanir þýðir einfaldlega aukningu á drykkju ungmenna. Ég veit það af eigin reynslu, enda var vinahópur minn oft í bölvuðum vandræðum með að redda sér áfengi um helgar vegna þess að það þurfti að fá einhvern til að fara fyrir sig í ríkið.

Ég þarf engar rannsóknir til að vita að það skerti drykkju hjá mínum vinum, því ég sá það sjálfur.

Það er bara endalaus vitleysa og græðgi að hálfu kaupmanna að reyna opna fyrir þetta. Punktur.

[Jakob Falur Kristinsson, 19.10.2007 kl. 10:06]

Þeir sem ekki hafa aldur til að versla í ÁTVR munu heldur ekki hafa leyfi til að versla áfengi þótt það sé selt í verslunum.  Þessi tillaga sem nú er verið að ræða á Alþingi er ekki um að lækka aldur til að getað verslað áfengi.  Unmenni hafa fram til þessa ekki verið í neinum vandræðum hingað til að ná sér í áfengi, því eins og ég segi í minni grein munu þeir sem ætla sér að nálgast áfengi, alltaf finna leið til þess.  Svo má ekki gleyma því að unmenni eru stæðsti kaupendur að svokölluðum "Landa" sem er bæði ólöglegur og stórhættulegur.

[Jóhann Elíasson, 19.10.2007 kl. 21:36]

Svo er annað sem vantar í umræðuna, þeir sem eru fylgjandi því að léttvín og bjór verði í matvöruverslunum bera því við að þannig sé þetta í Frakklandi, Ítalíu og víðar jú það er alveg rétt, þar erum við líka að tala um þjóðir sem telja milljónir og miljónatugi og hafa ráð á því að reka tvöfalt kerfi í áfengissölu en hér á landi er íbúafjöldinn rétt um 300 þúsund og það gefur auga leið að með þessu væri rekstrargrundvellinum fyrir því að reka áfengsverslanir úr sögunni.  Svo bendi ég á færslu á blogginu mínu um þessi mál hérna.