Tap samkvæmt áætlun

Nú er FL Group farið að tapa peningum og þá spyr maður auðvitað er hinum nýja Súpermann Hannesi Smárasyni að fatast flugið.  Nei aldeilis ekki ef marka má tilkynningu frá félaginu, þetta voru ekki nema 27,1 milljarður og er bara af því að nú skráir félagið eignir sínar á markaðsvirði.  Ég hefði nú haldið að sú leið að skrá eignir á markaðsvirði kæmi félaginu til tekna en ekki öfugt því yfirleitt er reglan sú að bókfært verð eigna er mun lægra en markaðsverð þeirra en ef svo er ekki þá hafa viðkomandi eignir verið keyptar á allof dýru verði.  En þetta er nú bara smáatriði því að nú er búið að gera allan reksturinn straumlínulagaðan og þessir smáaurar sem töpuðust eru bara vegna þess að kostnaður var miklu hærri en tekjur og því kom tap og kostnaðurinn varð svona mikill vegna þess að vöxtur félagsins var svo mikill.  Þessi afkomutilkynning FL Group er einstök hvað það varðar að villa um fyrir hluthöfum hið gríðarlega tap og í raun var ekki um neitt tap að ræða heldur varð afkoma félagsins neikvæð.  Ekki vildi ég eiga hlutabréf í þessu fyrirtæki sem sendir frá sér svona kjaftæði.  Rekstur félagsins var ekki betri en það að félagið tapaði 27,1 milljarði og skiptir engu máli hvort félagið sé á eftir straumlínulagað, ferkantað eða kringlótt.  Þegar tekjur duga ekki fyrir útgjöldum verður einfaldlega TAP hvort sem Hannes Smárason á hlut að máli eða ekki.