Vöruverð

Verð á matvælum á Íslandi mun hækka í framtíðinni. Um þetta voru fundarmenn sammála á morgunverðarfundi Bændasamtakanna, sem bar yfirskriftina Hvað kostar maturinn minn á morgun? Bretinn Martin Haworth, yfirmaður stefnumótunar bresku bændasamtakanna ræddi á fundinum um þróun landbúnaðarframleiðslu og sagði hann að offramleiðsla á landbúnaðarvörum hefði verið viðvarandi í vestrænum ríkjum fram undir þetta sem hefði leitt af sér verðlækkanir á heimsmarkaði.

Þurfti virkilega að fá hingað til lands Bretann Martin Haworth til að segja okkur að matarverð færi hækkandi.  Er búið að berja svo á íslenskum bændasamtökum að þau þora ekki að skýra sjálf frá þessum staðreyndum?  Það hefur verið vitað lengi að kaupmáttur í hinum svokölluðu þróunarríkjum fer vaxandi sérstaklega á þetta við um Suðaustur-Asíu og þá aðallega Indland og Kína og höfum við nú þegar orðið þess vör í sambandi við hækkun á eldsneyti og auðvitað hlaut að koma að því að matvælin og þá sérstaklega landbúnaðarvörur myndu hækka í verði.  Þetta ætti að kenna okkur þá lexíu að hætta öllu nöldri um greiðslur til landbúnaðar á Íslandi og telja íslenska bændur vera stétt sem mætti alveg hverfa úr íslensku samfélagi og allt ætti að flytja inn erlendis frá.  Það er eitt af grundvallar atriðum hverrar þjóðar sem ætlar að vera sjálfstæð að hún geti verið sjálfum sér nóg með framleiðslu matvæla.  Að vera algerlega öðrum háður í þeim efnum er verið að bjóða heim þeirri hættu að glata sínu sjálfstæði. 

Maturinn dýrari á morgun

Athugasemdir

[Þórir Kjartansson, 7.11.2007 kl. 09:46]

Innilega sammála Jakob.

[Kári Harðarson, 7.11.2007 kl. 09:53]

Það er ekki rökrétt að álykta að ef við leyfum einhverja samkeppni verðum við þess vegna algerlega öðrum háð um matvöru.

Ég vil  heldur ekki að bændur hverfi með öllu.  Ég vil einmitt hag þeirra sem  bestan, þess vegna vil ég að þeir fari að standa í báða fætur eins og menn.

Ég bý í Frakklandi þessa dagana og mér finnst neyðarlegt að sjá hversu mikið íslensk landbúnaðarvara stendur þeirri frönsku að baki.  Unnar kjötvörur og ostar á Íslandi bera þess merki að hafa verið í einangrun, rétt eins og Trabant bíllinn fyrir austan járntjald.  Mál er að linni.

[Jakob Falur Kristinsson, 7.11.2007 kl. 10:44]

Ég er ekki að tala gegn samkeppni eða innflutningi á landbúnaðarvörum.  Ég er einungis að benda á að við eigum aldrei að ganga svo langt að verða algerlega háðir innflutningi, því þá er samkeppnin líka farinn.  Íslenskir bændur geta haft það miklu betra en í dag með því að sjá sjálfir um sölu eigin framleiðslu of losna við allan þennan milliliðakostnað sem þeir þurfa að greiða í dag.  Það má benda á hið nýja átak sem kallast "frá haga til maga" sem á örugglega eftir að reynast bændum vel.  Það er alveg rétt hjá þér Kári að ákveðinn hluti af íslenskri landbúnaðarvöru hefur verið í einangrun og það stafar af þessum milliliðum sem ég nefndi og bændur verða að losna við.