Loðnan

Rannsóknarskip Hafrannsóknarstofnunar, Árni Friðriksson, lagði af stað í loðnu- og sjórannsóknaleiðangur í gærkvöldi. Rannsóknasvæðið mun spanna allt frá Vesturlandi að Norðausturlandi og djúpmið (Grænlandssund og Íslandshaf). Markmið leiðangursins eru að leita ungloðnu og einnig kynþroska loðnu sem verður uppistaða veiða á komandi ári.

Er þetta nú það nauðsynlegasta verkefnið hjá Hafrannsóknarstofnun?  Reyna að finna hana sem fyrst svo hægt verði að auka aflakvóta í loðnu og drepa sem mest af henni sem allra fyrst.  Á sama tíma og þorskstofninn er að hruni kominn vegna hungurs þá er um að gera að taka frá honum fæðuna því öllu skal til kostað svo kenningar Hafró um lélegt ástand þorskstofnsins standist og allir sætti sig við minni þorskveiðar á næsta fiskveiðiári.  Þetta skip sem liggur í höfn um það bil hálft árið vegna fjárskorts.  En þegar um er að ræða loðnuleit vantar ekki peninga svo skipið geti loksins látið úr höfn.  Ég er farinn að trúa því að það sé markmið Hafró að útrýma þorskstofninum og þegar hann svo endanlega er hruninn þá verður bara sagt "Það komu upp aðstæður sem við gátum ekki séð fyrir og svo hefur líka verið veitt meira í rúm 20 ár en við lögðum til".  Við þær aðstæður sem nú eru í hafinu er það hreinn glæpur að leyfa loðnuveiðar.

Árni Friðriksson í loðnurannsóknir