Eitt metið enn

Greiningardeild Kaupþings bendir á það í sérriti sínu um vísitölu neysluverðs að verðbólgan hafi ekki mælst jafn há í nóvember og nú í 17 ár. Tólf mánaða verðbólga fer hækkandi og mælist nú 5,2% samanborið við 4,5% í október. Sé hins vegar litið framhjá skattalækkunum í upphafi árs mælist verðbólgan 7%.

Nokkur umræða hefur verið undanfarið að til að ná verðbólgunni niður væri rétt að taka húsnæðiskostnaðinn út úr vísitölunni og jafnvel bensín og olíu.  Ekki tel ég rétt að taka þessa liði út, því þá væri í raun verið að falsa hina raunverulegu vísitölu og að sama skapi er jafn vitlaust að líta framhjá skattalækkunum.  Vísitalan á að vera tæki til að mæla raunverulegt verðlag í landinu og hvað kostar að lifa í þessu landi.  Það þurfa allir einhverstaðar að búa og greiða því húsnæðiskostnað og flestir eiga bíl og þurfa þess vegna að greiða fyrir bensín og olíur.  Og þótt fólk eigi ekki bíl þá hefur verð á bensíni og olíum áhrif á allan ferðakostnað, hvort sem ferðast er með bifreiðum, flugvélum eða skipum.  Ef ríkisstjórnin vill hinsvegar taka út hina ýmsu liði er einkar auðvelt að ráða því hvað verðbólgan mælist á hverjum tíma, með því að kippa út öllum þeim liðum sem virka til hækkunar og ákveða þannig verðbólguna á hverjum tíma.  En eftir stendur þó alltaf að sú verðbólgumæling er fölsk og kannski er það bara allt í lagi ef allir eru ánægðir með það.

Verðbólga ekki meiri í nóvember í 17 ár