Hreindýr

                                                                                                                                                   Þrettán hreindýr drápust þegar þau hlupu í veg fyrir pallbifreið á Fljótsdalsheiði um kl. átta í morgun. Að sögn lögreglu sakaði ökumann og farþega ekki. Mikið myrkur var heiðinni og hálka sömuleiðis þegar áreksturinn varð.

 

Að sögn lögreglunnar á Seyðisfirði brá ökumanni mjög þegar hópurinn hljóp í veg fyrir bifreiðina. Hún segir að atburðarrásin hafi verið hröð og að ökumaðurinn hafi lítið getað gert til að afstýra slysi. Þá segir lögregla að það sé mesta furða hve bifreiðin skemmdist lítið.

Það er ekki óalgengt að hreindýrahópur hlaupi þvert yfir vegi á þessu svæði að sögn lögreglu.

Nú er beðið eftir því að dýrin verði sótt til urðunar.

 Þetta hefur verið hörkuárekstur, en ég skil ekki hvers vegna urða þarf dýrin.  Má ekki alveg nýta af þeim kjötið til matar, fyrst þau eru dauð á annað borð?  Fyrir nokkrum árum var ég á leið frá Bíldudal til Reykjavíkur ásamt syni mínum og vorum við einmitt á pallbíl eins og þeir þarna fyrir austan.  Í Kjálkafirði flaug allt í einu upp hópur af gæsum og yfir veginn og þar sem við vorum á talsvert mikilli ferð skullu tvær gæsir á bílnum.  Við stoppuðum og sáum að þessa tvær gæsir voru að haltra yfir veginn og eltum við þær og vorum fljótir að ná þeim og snerum þær úr hálsliðnum og héldu svo ferðinni áfram.  Þessar tvær gæsir voru seinna báðar borðaðar með bestu lyst og án alls samviskubits.  Því þetta var ekkert annað en óhapp og ekki með vilja gert.  Eru þetta einu gæsirnar sem ég hef drepið á ævinni.

 

Ók á 13 hreindýr

Athugasemdir

[Davíð 13.12.2007 kl. 13:12]

Maður hefði haldið það. En það stangast sennilega á við einhverjar heilbrigðisreglugerðir. Það má ekkert kjöt selja nema að allt uppfylli einhverja staðla og vesen. Sama með dýrin í húsdýragarðinum, lömbin og grísirnir sem þar fæðast. Því er svo bara slátrað og hent því ekki má selja kjötið.

[Guðrún Þóra Hjaltadóttir, 13.12.2007 kl. 14:35]

Já ég held það sé rétt að þetta er einhver spurning um staðla. Trúlega hefur þetta verið gert, það er að borða dýr sem hafa lent í slysi og eflaust engan sakað. Svona eru reglurnar og þarna er greinilega farið eftir þeim. Það væri betra ef reglum væri alls staðar fylgt svona vel eftir.

[Neddi, 13.12.2007 kl. 15:58]

En hvaða munur er á þessu kjöti og kjötinu af hreindýrunum sem að eru skotin á fjalli?

Er eitthvað meira að nýta þessi dýr frekar en þau? 

[Jakob Falur Kristinsson, 14.12.2007 kl. 11:34]

Það á bara ekkert að fara eftir einhverjum stöðlum eða reglugerðum, sem einhverjir embættismenn búa til af vanþekkingu.  Ekki hlusta á neitt svoleiðis kjaftæði og ég tek undir með honum Nedda, hvað það varðar að enginn munur er á þessu kjöti og af þeim dýrum sem eru skotin á fjalli.