Bitruvirkjun

Ansi finnst mér Sjálfstæðisflokkurinn í Reykjavík leggjast lágt til að halda núverandi meirihluta saman.  Stjórn Orkuveitu Reykjavíkur var búin að samþykkja að hætta við Bitruvirkjun.  En svo kemur yfirlýsing frá stjórnarformanni Orkuveitunnar, Kjartani Magnússyni að þessi virkjunarkostur verði skoðaður síðar og sama segir Hjörleifur Kvaran forstjóri.  En þá lýsir Ólafur Magnússon því yfir að þessi virkjun hafi verið slegin út af borðinu.  Kjartan Magnússon fer þá skríðandi til Ólafs til að útskýra að hann hefði meint að þessi virkjun yrði kannski skoðuð einhvern tíman í framtíðinni og undir þetta tekur Hanna Birna Kristjánsdóttir.  Þá lýsir Ólafur borgarstjóri því yfir að þetta verði ekki skoðað á meðan málefnasamningur sem þessi meirihluti byggir á, sé í gildi og verði ekki um neina virkjun að ræða þarna á þessu kjörtímabili.  Því er kominn upp sú staða í borgarstjórn að einn maður með ekkert fylgi á bak við sig lætur Sjálfstæðisflokkinn bugta sig og beygja eftir sínu höfði.  Sjálfstæðismenn eru sem sagt í algerri gíslungu Ólafs F. Magnússonar borgarstjóra og eru bara sáttir við sitt hlutskipti.  Ef þau samþykkja ekki allt sem Ólafur vill er meirihlutinn fallinn.