Lausn á fjárhagsvanda ríkissjóðs

Það er til mjög einföld lausn á fjárhagsvanda ríkissjóðs.  Í stað þess að fara svokallaða fyrningarleið á 20 árum eins og boðað hefur verið á nú þegar að leggja kvótakerfið niður í núverandi mynd.  Þann 1. september 2009 verði allar aflaheimildir á Íslandsmiðum boðnar til leigu á kr. 50,- á hvert kíló, sem rynni inn í Auðlindasjóð sem stofnaður yrði.  Þannig að nýtt kvótaár byrjaði með nýjum aðferðum og allt það fé sem kæmi inn í Auðlindasjóðinn yrði skipt á milli ríkissjóðs, sveitarfélaganna, Hafrannsóknastofnunnar og Landhelgisgæslunnar.  Þetta myndi þýða að hver aðili fengi 40-50 milljarða í sinn hlut.  Ef einhver útgerð er svo illa stödd að hún geti ekki greitt þessa leigu verður hún bara að fara í gjaldþrot.  Það eru mörg útgerðarfélög þannig stödd í dag að þau eru að drukkna í skuldum.  Ekki vegna reksturs, heldur glannalegrar fjárfestinga eigenda þeirra í ýmiskonar braski og ævintýramennsku.  Það er ekkert vit í að eyða fjármunum til að rétta þessi fyrirtæki af og best væri að skilja þeirra skuldir eftir í gömlu bönkunum.  Allt tal um að útgerð leggist af við breytingar á þessu kerfi eru ekkert nema kjaftæði.  Við höfum dæmið úr Grundarfirði sem segir okkur hvernig mörg útgerðarfélög hafa hagað sér undanfarin ár.  Þeir aðilar sem hafa alla tíð rekið sína útgerð af skynsemi, þurfa ekkert að óttast því þeirra rekstur hlýtur að ráða við svona hóflega leigu á aflaheimildum.  Í stað þeirra félaga sem fara í gjaldþrot koma bara nýir aðilar og veiða fiskinn.  Allt tal um annað er einhliða áróður frá LÍÚ.  Fiskur verður áfram veiddur á Íslandsmiðum af íslendingum um ókomna tíð.  Það sem gerist að reksturinn verður heilbrigðari á eftir og ævintýramennirnir fara út úr greininni.  Það mætti einnig hugsa sér að handhafar núverandi veiðiheimilda og eru með sinn rekstur í lagi fengu ákveðin forgang til að leigja sama magn og þeir hafa í dag.  Þannig yrði engin breyting hjá stórum hluta útgerða.