Vandi í Eyjum

Bæjarstjórn Vestmannaeyja lýsir yfir þungum áhyggjum vegna stöðu mála í sjávarútvegi í Vestmannaeyjum og hvetur ríkisstjórnina til að grípa til aðgerða tafarlaust. Þetta kemur fram í ályktun sem bæjarstjórn Vestmannaeyja samþykkti á fundi sínum í kvöld.

Ekki ætla ég að gera lítið úr vandamálum í Vestmannaeyjum vegna banns við loðnuveiðum en fyrirtækin þar eru sterk og þola smá mótvind.  Það sýnir best hve öflug fyrirtæki þeir eiga í Eyjum að ekkert byggðalag á landinu, kemst með tærnar þar sem þeir hafa hælanna varðandi endurnýjun í sínum skipaflota.  Auðvitað á að koma til móts við þau byggðalög sem glíma nú við mikinn vanda vegna skerðingar á þorski og sum fá líka á sig aukinn vanda vegna loðnuveiðibanns og við blasir að byggðalögin hreinlega leggist niður.  Það er engin hætta á slíku með Vestmannaeyjar og mörg byggðalög verr sett en Vestmannaeyjar.  Nú hefur bæjarstjórn sett fram kröfur á hendur ríkisvaldinu í sex liðum:

1.   Sjávarútvegurinn verði styrktur með því að aflétta íþyngjandi álögum.  Þarna mun vera átt við Auðlindagjaldið.  Þetta gjald er tengt afkomu útgerðar svo að ef tap er á útgerð fellur það sjálfkrafa niður og ef hagnaður verður þá greiðist auðvitað gjaldið, svo ekki þarf neinar sérstakar aðgerðir þess vegna.

2.  Látið verði með öllu af handaflstýrðum aðgerðum í sjávarútvegi.  Þarna mun vera átt við Byggðakvótann, ég verð nú að segja fyrir mig að ansi er nú langt gengið þegar öflugustu sjávarútvegsfyrirtæki landsins vilja láta rífa af litlum sjávarbyggðum þennan byggðakvóta sem á mörgum stöðum er þeirra eina lífsvon.

3.   Opinber umræða um sjávarútvegi verði af meiri ábyrgð en hingað til.  Þarna skil ég nú ekki alveg hvað bæjarstjórnin er að meina.  Mér dettur helst í hug að þeir vilji láta banna alla gagnrýni á flottrollsveiðum á síld og loðnu.  Á ég virkilega að trúa því að þeir vilji koma upp hér ritskoðun og takmörkunum á málfrelsi fólks, þetta er rugl.

4.   Fræðslusvið sjávarútvegs verði styrkt og hafrannsóknir efldar.  Þessu er ég sammála.

5.   Hafnaraðstaða verði bætt.  Þetta skil ég ekki og sem fyrrverandi sjómaður hef ég ekki komið í betri höfn en er í Eyjum í dag og veit ekki hverju þarf þar við að bæta.

6.   Hvalveiðar verðir hafnar af auknum þunga.  Þessu er ég innilega sammála.

Mér finnst þessar tillögur vera þess eðlis að verið sé að óska eftir að hinn mikli hagnaður sem hefur verið af loðnuveiðum og vinnslu loðnu verði bættur, þeir eru ekki að óttast tap heldur minni hagnað. Hvar halda menn að þetta myndi enda ef ríkisvaldið tæki að sér að bæta fyrirtækjum skertan hagnað, við værum komin í slíka lönguvitleysu að ekki þarf að ræða það.  Ég sá í sjónvarpsfréttum í gær viðtal við fiskverkakonu varðandi loðnustoppið og hún sagði;  "Þetta er gífurlegt áfall og sem dæmi að við sem erum í vinnslunni förum úr svona rúmum 400 hundruð þúsund í tekjur á mánuði niður í 140-150 þúsund og bætti svo við, þetta er hræðilegt."   Ekki kom fram hjá þessari konu að hún óttaðist atvinnuleysi, aðeins lækkandi tekjur.  Ég get alveg skilið að fólk sé ekki ánægt að lækka í tekjum úr 400 þúsund í 140-150 þúsund.  En það eru nú þær tekjur sem verkafólk í fiskvinnslu víða á landsbyggðinni verður að sætta sig við og ekkert atvinnuöryggi heldur.  Svo eru líka staðir þar sem enginn atvinna hefur verið jafnvel í nokkur ár og fólk aðeins haft rúmar 100 þúsund á mánuði í atvinnuleysisbætur og býr í verðlausum eignum og kemst hvergi í burtu.  Þannig að bænaskjal bæjarstjórnar er bull frá upphafi til enda, því það er enginn alvarlegur vandi í Vestmannaeyjum, þetta loðnuveiðibann er tímabundið og hún mun skila sér og allt fer á fulla ferð aftur í Eyjum.  Ef loðnan kemur ekki þá er aðeins minni hagnaður hjá fyrirtækjum og lægri laun verkafólks. 

Það er ekkert hrun fram undan nema síður sé í Vestmannaeyjum.

Stjórnvöld grípi til aðgerða tafarlaust

Loðnan

Ég hlustaði á hádegisviðtalið á Stöð 2 í gær og þar sat fyrir svörum Friðrik J. Arngrímsson framkvæmdastjóri LÍÚ og var verið að ræða um stöðvun loðnuveiðanna.  Aldrei þessu vant var hann nú bara kurteis og prúður og svaraði bæði vel og útskýrði málið vel, svo að allir gætu skilið.  Hann sagði að útgerðir sem nú væru að tapa miklum vermætum ætluðu ekki að biðja ríkisvaldið um neina aðstoð.  Hver útgerð tækist á sínum vanda með sínum viðskiptabanka, en það eina sem þeir vildu að ríkið gerði væri að leggja ekki á sjávarútveginn gjöld umfram aðrar atvinnugreinar )Auðlindagjaldið) og útgerðarmenn fengju staðfest að þeir  "ÆTTU SÍNAR VEIÐIHEIMILDIR OG ÞÆR YRÐU ALDREI AF ÞEIM TEKNAR"   þá væru þeir mjög sáttir  þótt ekki mætti veiða loðnu á þessari vertíð og var þetta viðtal mjög fróðlegt og gott.

Þótt Friðrik hafi sagt að engar kröfur yrðu gerðar til ríkisins og væri mjög hófsamur í viðtalinu, tókst honum nú samt að koma því á framfæri að vegna loðnuveiðibanns þá ætti ríkið að gera bara pínulítið fyrir útgerðina, sem í huga flestra er stórmál það er að staðfesta eignarrétt útgerða á veiðiheimildum, sem eru samkvæmt lögum í dag sameign íslensku þjóðarinnar og útgerðirnar hafa nýtingarrétt af og eiga að greiða gjald fyrir sem kallast Auðlindagjald, sem í dag er ekki hátt og er tengt afkomu útgerðarinnar.  Þannig að þessar litla aðstoð, sem ríkisvaldið á að gera núna er bara ekki neitt lítil, aðstoðin er bæði mikil og stór.  Þannig að mér finnst nú LÍÚ leggjast ansi lágt núna.  Að ætla að nota sér tímabundna stöðvun á loðnuveiðum til að fá samþykkt að afnema Auðlindagjaldið og staðfesta eignarrétt útgerða á aflaheimildum, er ekkert nema frekja og yfirgangur og þar sýnir LÍÚ sitt rétta andlit.  Hinn prúði og hógværi framkvæmdarstjóri varð að skrímsli í lok viðtalsins svo ekki sé meira sagt.

Það kom einnig fram í þessu viðtali að hvalir og hrefna eru að éta árlega á Íslandsmiðum á milli 1-2 milljónir tonna af loðnu.  Það er til viðbótar því sem Hafró hefur áætlað að hrefnan ein og sér éti 40-50 þúsund tonn af þorski árlega og hvalurinn er að éta upp nánast allt æti fyrir fiskistofnana við Ísland.  Hvenær ætlum við að þora að leyfa hvalveiðar á ný og þá á ekkert að vera að hugsa um hvort markaður er fyrir afurðir af þessum skepnum eða ekki.  Það á að hefja ríkisstyrktar veiðar á hval og hrefnu í stórum stíl.  Við tökum erlend skip í landhelgi ef þau koma hingað til veiða í leyfisleysi.  Hvers vegna eigum við þá að láta hvali í friði sem eru að ræna frá okkur auðlyndum hafsins.  Þessar skepnur myndu gera sitt gagn dauðar á hafsbotni fyrir lífríkið.  Við byggjum aldrei upp neinn fiskistofn hér við land meðan hvalurinn stóreykst á hverju ári.  Okkar fiskveiðar munu aldrei ganga frá fiskistofnunum hvað mikið sem við veiðum, heldur verða það hvalastofnarnir og þá sérstaklega hrefnan sem eyða fiskimiðunum.  Að reyna að byggja upp sterka fiskistofna er vonlaus í samkeppni við hvalinn.

 

 

 

 

 

Grímseyjarferjan

Það er alveg með eindæmum öll vitleysan í kringum ferjuna Sæfara.  Vélsmiðja Orms og Víglundar í Hafnarfirði kláruðu ekki allan frágang og enn á ný var leitað til ráðgjafarfyrirtækisins Navis ehf. um að gera nýtt tilboð í lokafrágang ferjunnar.  Lægsta tilboð var frá Slippstöðinn á Akureyri eða kr. 125 milljónir.  Ferjunni var þá siglt frá Hafnarfirði til Akureyrar, bilaði reyndar á leiðinni en komst samt alla leið að lokum.  Til að vera nú alveg öruggir þá gerði Navis ráð fyrir kr.25 milljónum vega atriða sem gætu komið upp og til að hafa nú allt öruggara en öruggt var líka gert ráð fyrir kr. 7 milljónum í óvænt atriði.  Slippstöðin hóf verkið og var áætlað að það tæki 21 dag og þá yrði ferjan tilbúinn til notkunar.  En fljótlega kom uppa að Navís hafði gleymt nokkrum þáttum, m.a. hurð á hlið ferjunnar en áður höfðu verið smíðaðar nýjar lunningar á skipið í Hafnarfirði og þær sandblásnar og málaðar.  Á Þetta nýja stál varð þá að skera gat til að koma fyrir hurð sem landgöngudyrum.  Þá hafði líka verið í Hafnarfirði skipt um tuttugu fermetra af byrðingsplötum í neðri lest skipsins, síða sandblásið og málað báðum megin, þrátt fyrir að vita væri að skipta þyrfti um þetta aftur.  Síðan varð að brjóta upp öll klósett og ný snyrtiaðstaða sett upp.  Einnig þurfti að sjóða festingar á þilfar í lestum skipsins þrátt fyrir að búið væri að sandblása og mála lestarnar og var því að gera það aftur.  Ekkert af þessu var hvorki í fyrra né seinna útboðinu.  Nú stefnir í að reikningur Slippstöðvarinnar fari í 300 milljónir og samkvæmt upplýsingum frá Vegagerðinni eru nefndar þrjár ástæður fyrir þessari hækkun:

          1.   Verkþættir sem ekki var lokið í Hafnarfirði.

          2.   Ábendingar frá fyrri verktaka.

          3.   Viðbætur vegna ábendinga frá Grímseyingum, rekstraraðila (Samskip) og áhafnar.

Mér er ómögulegt að skilja hvers vegna Navís ehf. tók ekki inn í seinna útboðið þá þætti sem voru þegar ljósir meðan skipið var í Hafnarfirði, eins og liði nr. 1 og 2 hér að ofan.  Það sama á líka við um klósettin, því vitað var að þeim þyrfti að breyta vegna þess að þau voru staðsett í stefni skipsins sem getur auðvitað aldrei gengið þegar siglt er á móti öldu og því alger óþarfi að láta ganga frá þeim þar í Hafnarfirði.  Það sama á líka við um borðstokka og plötuskipti í lest til hvers að vinna það í Hafnarfirði og vera vitandi um að breyta þyrfti öllu aftur.  Eins var vitað að það yrði að vera á skipinu einhver hurð fyrir andgöngubrú og hefði þá ekki átt að láta gera ráð fyrir því þegar hinir nýju borðstokkar voru smíðaðir í Hafnarfirði eða þá að sleppa þeim alveg.  Nú er ljóst að skipið var komið í 500-600 milljónir þegar það fór frá Hafnarfirði og nú bætast a.m.k. 300 milljónir við.  Sl. sumar var Navís ehf. búið að fá greitt fyrir tilboðsgerð og eftirlit um 25 milljónir og eitthvað fá þeir fyrir eftirlitið á Akureyri.  Það kæmi mér ekki á óvart þótt að heildarkostnaður við ferjuna þegar hún kemst loksins í rekstur yrðu um einn milljarður en á sínum tíma var áætlað að nýsmíði kostaði 900 milljónir og þótti brjálæði að ætla í svo dýra framkvæmd.  Skipið átti að hefja siglingar fyrir jólin 2007 en það má þakka fyrir ef það telst að koma því í rekstur fyrir sumarið 2008.  Það vill til í þessu dæmi að nógu ríkur er reiðarinn eins og oft var sagt forðum.  Þetta er stórhneyksli og enginn ber ábyrgðina.  Ég ætla að enda þetta á því að votta öllum íbúum í Grímsey samúð mína vegna þessa máls.  Það hefði verið betra að láta hreppsnefndina í Grímsey eða einhvern útgerðarmanninn þar sjá um þetta ferjumál frá upphafi og sleppa þessum sérfræðingum hjá Navís ehf.  Það hefði sparað ríkissjóði nokkur hundruð milljónir.

Breyttar aðstæður

Geir H. Haarde, forsætisráðherra, segir að almennar mótvægisaðgerðir vegna þorskaflaniðurskurðar séu að koma til framkvæmda á þessu ári. Ljóst sé, að ef engar frekari loðnuveiðar verði eins og nú er útlit fyrir, verði stjórnvöld að taka það inn í myndina enda væru gjörbreyttar aðstæður víða.

Já aðstæður hafa heldur betur breyst nú þegar loðnuveiðar eru stöðvaðar, reyndar tímabundið og vonandi að hún skili sér seinna.  En sjávarútvegsráðherra gat ekki gert neitt annað í stöðunni í dag.  Því hvaða vit er í því að moka upp smáloðnu og þorskseiðum við þessar aðstæður og setja í bræðslu.  Bæði værum við að ganga endanlega frá loðnustofninum og auk þess að takmarka verulega nýliðun í þorskstofninum.  Hvað ætli margir einstakir fiskar séu í nokkur hundruð tonnum af þorskseiðum.  Það eru örugglega nokkur hundruð milljónir fiska og þótt ekki kæmust upp nema 1-2% af þessum seiðum og næðu 4-5 kílóa þyngd væri verið að bætast við þorskstofninn nokkur hundruð þúsund tonn.  Er ekki komin skýringin á lélegri nýliðun hjá þorskinum ár eftir ár að seiðunum hefur verið landað í bræðslu sem loðnu.

Í dag er fallandi verð á mjöli og lýsi svo að ekkert vit er í því að vera að veiða hana til bræðslu, reyndar segja loðnusjómenn að það sé til nóg af loðnu í hafinu, leitarskipin hafi bara ekki verið á réttum svæðum.  Þetta er líka sagt um þorskinn, en við höfum ákveðnar veiðireglur og eftir þeim verður að fara hvort sem um er að ræða þorsk eða loðnu.  Eins og staðan er í dag gat sjávarútvegsráðherra ekki annað en stöðvað veiðarnar.  Telja loðnusjómenn sig eitthvað meira metna en þá sjómenn sem veiða þorsk, það mætti halda það miðað við yfirlýsingar margra þeirra.

Gerbreyttar aðstæður víða

Glitnir

Hann byrjaði með stæl nýi stjórnarformaðurinn hjá Glitnir, hann Þorsteinn Már Baldvinsson forstjóri Samherja hf. á Akureyri.  Hann flutti eina tillögu á ný afstöðnum aðalfundi sem var um að lækka laun stjórnar og stjórnarformanns og boðaði aðhald í rekstri bankans.  Þorsteinn Már er þekktur fyrir að sýna mikið aðhald í rekstri sinna fyrirtækja og er mjög ákveðinn maður má jafnvel kalla hann frekjuhund, en hann er jarðbundin og veit á hverju þessi þjóð er orðin eins vel sett og hún er í dag.   Það er nokkuð víst er að hann á eftir að láta að sér kveða í rekstri þessa banka og skera á allt bruðl og snobb.  Hann er sú manngerð sem lætur verkin tala, ekki eilíf fundarhöld um ekkert, hann á eftir að hrista rækilega upp í íslensku fjármálalífi. 

Enda heyrist nú úr fjármálalífinu að margir séu farnir að skjálfa af hræðslu, því það sem gert verður í Glitnir mun síðan smitast inn hjá öðrum fjármálastofnunum.  Háskólastrákarnir í fínu jakkafötunum, með allar klukkurnar á veggjunum, fínu skjalatöskurnar og á ofurlaunum munu víst vera verulega skelkaðir og vita að nú verða þeir að fara að vinna fyrir þeim launum sem Þorsteini þykir hæfileg miðað við vinnuframlag.

Þorsteinn Már Baldvinsson hefur oft verið umdeildur maður og oft hef ég gagnrýnt hann.  En i þessu máli á hann mikið hrós skilið.

Vatnsmýrin

Alveg er ég hjartanlega sammála Hrafni Gunnlaugssyni varðandi þessar nýju skipulagstillögur um byggð í Vatnsmýrinni.  Þetta virði eiga að vera 4 hæða kassar sem allir eru eins og verður forljótt og útsýnið verður ekkert, bara næsti steinveggur.   Ef taka á Vatnsmýrina undir byggð verður að byggja þar myndarlega eins og Hrafn bendir á með réttu.   Af hverju má ekki byggja háhýsi í Reykjavík og byggja þar hús af ýmsum stærðum og gerðum.  Þarna myndi sóma sér vel nokkur hús uppá 50-100 hæðir og önnur minni inn á milli eða blönduð byggð.  Stjórnendur Reykjavíkur ættu að taka Kópavog sér til fyrirmyndar, þar þora menn að byggja myndarlega og markmið Reykjavíkur ætti auðvitað að gera aðeins betur og byggja mun hærri hús.  Þessir húskubbar sem nú er verið að setja á skipulag og verða allir eins, munu minna á rússneskan byggingarstíl frá tímum kommúnismans, þar sem allt var byggt eftir sömu teikningu burt séð frá því til hvers ætti að nota húsin.  Þetta er sóun á dýrmætu byggingarlandi og ætla síðan að gera tjörn nánast við hliðina á Reykjavíkurtjörn get ég ekki skilið og skil ekki heldur hvaða tilgangi hún á að þjóna.  Þótt ég sé ekki íbúi í Reykjavík þá er hún samt höfuðborg landsins og þess vegna er þetta í raun mál allra íslendinga.  Nei, þessu verður að breyta svo við eignumst glæsilega höfuðborg.

Ætlar að reyna að bjarga íhaldinu

Ef einhver getur fyllt menn eldmóði og þjappað saman liði, er það Guðjón Þórðarson, þjálfari Skagamanna í knattspyrnu. Enda hefur nú Stjórnmálaskóli Sjálfstæðisflokksins fengið Guðjón til að flytja fyrirlestur um hvernig skuli byggja upp liðsheild.

Ekki veiti nú af að reyna eitthvað til að laga ástandið í flokknum, þar sem hver höndin er upp á móti annarri og hver klíkan að rekast á aðra.  Framtíð flokksins er 0 ef þetta heldur svona áfram lengur.

Byggir upp liðsheild íhaldsins

Meira um íslenskt málfar

Það er fróðlegt að skoða hvernig talað er víða um land og ég er ekki að telja slíkt mál rangt, heldur aðeins að sjá skoplegu hliðina.  Það má segja að nær allstaðar á landinu sé rætt um að fara "Suður" hvar sem viðkomandi býr og ætlar til Reykjavíkur.  Það segir sig sjálft að ekki getur aðeins ein átt legið til Reykjavíkur.  Í Reykjavík og víðar er talað um að fara "Vestur"  á firði þegar fólk ætlar til Vestfjarða, þetta er líka notað ef fólk ætlar á Snæfellsnes.  Þótt í báðum tilfellum sé farið í Norð-Vestur samkvæmt áttavita.  Í Reykjavík og fleiri bæjum er talað um að fara  "Niður"  í bæ ef fólk ætlar í miðbæinn.  Er þá fólkið að grafa holu til að komast niður í viðkomandi bæ.  Eins er sagt á mörgum stöðum að fara  "Niður"  á höfn. þótt augljóst sé að niður á höfn fer enginn nema í kafarabúningi.  Á Vestfjörðum segir fólk að það sé að fara  "Norður"  á Akureyri, þótt stefnan sé eitthvað nálægt því að vera Austur.  Á Vestfjörðum er orðið skúr, kvenkyns og sagt hún skúrinn en það er nú líka eins og margt annað í gömlu vestfirsku máli og í dag einungis notað af eldra fólki.  T.d. talar Jón Baldvin alveg þetta ekta vestfirska mál og Ólafur bróðir hans, einnig bregður því stundum við hjá Guðjóni Arnari alþingismanni.  Fyrir stuttu síðan var ég að horfa á veðurfréttir í sjónvarpi og þar var ung kona örugglega háskólamenntuð, að lýsa veðri næstu daga og gerði það mjög vel en í lokin sagðist hún ætla að sýna veðrið á morgun og benti síðan á ákveði svæði á kortinu og sagði á þessu svæði má reikna með að verði nokkuð  "Skúrað"  á morgun.  Ef ég hefði nú verið t.d. pólverji og rétt að komast inn í íslenskuna, þá hefði ég talið að á þessu svæði ættu allir að skúra daginn eftir.  Eins verð ég oft mjög undrandi þegar háskólamenntað fólk getur varla talað íslensku svo að allir skilji.  Sum orð verða til fyrir tilviljun og festast í málinu og mörg þeirra verða einskonar tískufyrirbæri og eru þá ofnotuð.  Þessi orð er mjög oft styttingar eins og notað er mikið í Bandaríkjunum.  Þar ætla ég að nefna setninguna  "Verðum í bandi",  sem fólk notar oft þegar það er að kveðjast.  Fyrst þegar ég heyrði þetta skeði svolítið spaugilegt, en þá var ég að kaupa mér nýjan bíl og eldri bíllinn átti að ganga uppí þann nýja.  Ég mætti hjá sölumanni nýrra bíla og þar reiknaði hann út hvað ég ætti að borga mikið á milli og miðaði hann þá verðmæti gamla bílsins við ákveðinn verðlista en þó með þeim fyrirvara að bílinn stæðist svokallaða ástandsskoðun.  Ég undirritaði alla pappíra og greiddi það sem ætti að greiða á milli og síðan sagði hann mér hvert ég ætti að fara með bílinn í skoðun og svo yrði nýi bílinn tilbúinn daginn eftir.  Ég var alveg öruggur á því hvert ég ætti að fara með bílinn og gekk að útihurðinni, þá kallar sölumaðurinn á eftir mér við verðum svo í bandi.  Ég brást reiður við og gekk til baka og sagði reiðilega "Hvað er einginlega að þér maður heldu þú að ég sé að ljúga að þér um ástand bílsins, ég get alveg ekið honum í skoðun þú þarft ekkert að draga bílinn og mér er skapi næst að hætta bara við þessi kaup."  Sölumaðurinn varð skelfingu lostinn og stamaði út úr sér;  "Éggg varrr ekkiiiiiii að  meinaaa þaðððð, heldur að vera í símasambandi." Mikið lifandis ósköp fannst mér ég þá vera mikill sveitamaður enda þá búsettur á Bíldudal.

Svo eru það heimsborgararnir, sem sletta stöðugt hinum ýmsu erlendum slanguryrðum í málfar sitt svo venjulegt fólk veit ekkert um hvað þeir eru að tala.

Að lokum er það kaffið:  Á sínum tíma var ég yfirvélstjóri á bát þar sem var mjög gamansamur kokkur og í eitt skipti sitjum við skipshöfnin í borðsalnum og erum að spjalla saman, drekka kaffi og fá okkur að reykja, en skipið var á stími á milli netatrossa.  Þegar einn hásetinn ætlar að fá sér meira kaffi þá var kaffikannan tóm.  Hann kallar á kokkinn og segir; "Lagaðu kaffi"  kokkurinn kom hlaupandi og stillti sér upp hjá manninum með miklum undrunarsvip og spurði; "Hvað er að á ég að laga kaffið þitt er eitthvað að því?"  Nei, nei sagði hásetinn kaffið er búið og þú verður að laga nýtt.  "Ég get það ekki svaraði kokkurinn, kaffið verður alltaf eins því það er bara til ein tegund af kaffi um borð".  "Ég er að meina að kaffið er búið" sagði þá hásetinn og var orðinn rauður í framan af reiði.  "Nú ertu að meina það"  sagði, Þá kokkurinn, viltu bara meira af eins kaffi, elsku kallinn minn og fór og setti vatn og kaffi í kaffikönnuna og ég sá að hann gat vart varist hlátri.

Íslenskt málfar

Mikið rosalega getur farið í taugarnar á mér hvernig sumir nota móðurmálið okkar.  Það er mikið rætt og deilt um staðsetningu Reykjavíkurflugvallar og þá talar fólk oftast um hvert eigi að "FLYTJA" flugvöllinn.  Það vita flestir að ekki er hægt að flytja þennan flugvöll eitt né neitt.  Annað hvort verður hann notaður þar sem hann er eða nýr völlur verður gerður á öðrum stað.  Svo er það Icelandair sem auglýsir mikið að það fljúgi Á hinar og þessar borgir ekki vildi ég vera farþegi í flugvél sem flýgur á borgir sem þær gera auðvita ekki heldur fljúga til hinna ýmsu borga.  Ég hlustaði líka á viðtal við nýjan forstjóra FL-Croup sem fékk eitthvað um 140 milljónir í árangurstengd laun á síðasta ári sem einn af stjórnendum þess fyrirtækis þótt, félagið hafi tapað 70-80 milljörðum á síðasta ári.  Einnig sagði hann aðspurður um hin mikla ósundurliðaðan kostnað við stjórn fyrirtækisins, en það var um 6 milljarðar, að það þyrfti að taka tillit til undirliggjandi starfsemi  FL-Croup þegar verið væri að gagnrýna þennan mikla kostnað.  Hvað er undirliggjandi starfsemi?  Ekki veit ég það.

Auglýsingin frá Nova

Ekki skil ég hvað bloggarar eru að kvarta yfir þessari auglýsingu frá Nova sem, birtist hér á blogginu, ekki pirrar hún mig og er ég nú þegar búinn að panta mér svona síma, sem ég á að fá afhentan þegar þeirra kerfið verður orðið virkt hér í Sandgerði.  En núna er verið að vinna í því að setja uppbúnað hér og ætti þetta að verða orðið virkt eftir 1-2 vikur.  Bíð ég nú bara spenntur og finnst ósköp notalegt að sjá þessa auglýsingu þegar maður er að lesa bloggið.  Þetta er bara nöldur til að geta nöldrað yfir einhverju.