Rétt eða rangt

Lið Fljótsdalshéraðs tapaði sem kunnugt er fyrir liði Kópavogs í lokaþætti Útsvars sl. föstudag. Munaði fimm stigum á liðunum. En margir velta nú fyrir sér hvort það hafi verið rétt ákvörðun hjá dómaranum að gefa rangt fyrir svar Héraðsbúa við spurningu um berserkina Halla og Leikni sem hraunið á Snæfellsnesi er kennt við.

Það skiptir engu máli hvort dómarinn gaf rétt eða rangt í keppninni.  Til að svona keppni standi undir nafni verður dómarinn að hafa allsherjarvald og hans úrskurður á að gilda, hvort sem hann er réttur eða rangur.  Enda hefur lið Fljótsdalshéraðs ákveðið að gera ekkert í málinu og er því þar með lokið.

Var Víga-Styrs saga rétt svar?

Bolungarvík

Fulltrúar í velferðarráði Bolungarvíkur samþykktu fyrir helgi að afsala sér launum fyrir nefndarstörf. „Það voru allir sammála um að afsala sér launum og kom tillagan að frumvæði fulltrúa minnihlutans í ráðinu,“ segir Einar Guðmundsson, formaður velferðarráðs í samtali við Bæjarins besta.

Þetta ættu margir að taka sér til fyrirmyndar sem sitja í hinum ýmsu nefndum og ráðum á vegum ríkisins og sveitarfélaga.

Afsala sér launum

Sjóræningjar

Ekki hefur enn verið gripið til harðari refsinga gegn sjóræningjum úti fyrir ströndum Sómalíu en að afvopna þá og senda þá heim. Herskip frá nokkrum löndum eru á svæðinu til að stemma stigu við sjóránum. Þetta kemur fram á fréttavef Jyllands-Posten.

Hvers vegna er verið að sleppa þessum mönnum.  Þetta eru glæpamenn , sem á að meðhöndla sem slíka.  Ævilangt fangelsi væri lámark, en best væri þó að skjóta þá á staðnum þegar þeir eru teknir.

Sjóræningjum sleppt við Sómalíu

Sálræn skyndihjálp

Útgáfa klíniskra leiðbeininga um sálræna skyndihjálp, viðurkennt verklag á vettvangi, verða kynntar á blaðamannafundi í dag. Leiðbeiningarnar hafa verið þýddar og staðfærðar af Dr. Berglindi Guðmundsdóttur, sálfræðingi og Þórunni Finnsdóttur, sérfræðingi í klíniskri sálfræði.

Þetta er sjálfsagt hið besta mál, þegar nær öll þjóðin er í sjokki eftir allt hrunið að undanförnu.  En ég tel að sá sem á við geðræn vandamál að stríða gagnist lítið skyndihjálp á því sviði. 

Ég þekki þetta vel þar sem ég hef glímt við alvarlet þunglyndi í nokkur mörg ár eftir mikið áfall.

Leiðbeiningar um sálræna skyndihjálp gefnar út

Facebook

Íslendingabók, ættfræðiforrit Íslenskrar erfðagreiningar, er nú komin á samskiptavefinn Facebook, eða Fésbókina eins og margir Frónbúar kalla hana. Forritið rekur ættir notenda saman við alla vini þeirra á Fésbók, sem á annað borð er að finna í gagnagrunni Íslenskrar erfðagreiningar.

Þessi vefur Feacebook virðist vera orðinn mjög vinsæll.  Ég hætti mér einu sinni þarna inn en kunni auðvitað ekkert og gat ekkert gert.  En ég ætla að reyna að læra á þennan vinsæla vef.

Íslendingabók mætt á Fésbókina

Nýr Háskóli

Með samkomulagi milli Blönduósbæjar og Háskólans á Hólum verður byggt upp háskólasetur á Blönduósi. Samkomulagið undirrituðu þeir Skúli Skúlason rektor á Hólum og Arnar Þór Sævarsson bæjarstjóri á Blönduósi nýverið.

Ég ætla ekki að gera lítið úr gildi menntunar, en mér finnst samt vera komið full mikið af öllum þessum háskólum.  Það fer varla að verða til það starf, sem ekki er krafist háskólamenntun til.  Það má engin passa lítil börn á leikskólum eða kenna í barnaskóla án háskólaprófs.  Allt er þetta á kostnað verkmenntunar í landinu sem alltof fáir sækja í.

Verður kannski næst að krafist verður háskólamenntunar til að vera öryrki

Kvennaskólinn verður gerður að háskólasetri

Framboðslisti VG

Framboðslisti V-lista í Norðausturkjördæmi var samþykktur á kjördæmisþingi VG í Norðausturkjördæmi í gær.

Auðvitað bar Steingrímur J. Sigfússon höfuð og herðar yfir aðra frambjóðendur og skipar 1. sæti listans.  Þarna er líka mikið af góðu og hæfu fólki, sem ég ætla ekki að fara að telja upp hér.

Til hamingju Steingrímur.

Framboðslisti VG í NA-kjördæmi birtur

Lét bíða eftir sér

Það er óhætt að segja að nýafstaðið prófkjör Samfylkingarinnar í Reykjavík verði Skúla Helgasyni eftirminnilegt, en auk þess að hafna í fimmta sæti í prófkjörinu fæddist honum og eiginkonunni, Önnu Lind Pétursdóttur, sonur aðfaranótt sunnudags.

Það er ástæða til að óska Skúla Helgasyni til hamingju með soninn og góðan árangur í prófkjörinu í Reykjavík.

Lét bíða eftir sér fram yfir prófkjör

Prófkjör

Þá liggja fyrir niðurstöður úr prófkjörum flokkanna í hinum ýmsu kjördæmum.  Það vekur athygli að frekar lítið er af nýju fólki í efstu sætum.  Einnig að frekar fáir tóku þátt í þessum prófkjörum.  Það hafði verið krafa hins almenna kjósanda að uppstokkun yrði á listum flokkanna.  En það varð því miður ekki.  Þetta segir okkur það að hinir svokölluðu fjórflokkar eru búnir að byggja sitt kerfi þannig upp, að nýir frambjóðendur hafa litla möguleika.  Frambjóðandi þarf nánast að hafa alist upp í viðkomandi flokki og bíða síðan í goggunarröðinni þar til að honum kemur.  Þótt vitaskuld séu undantekningar á því, en þá er um að ræða þjóðþekkta einstaklinga.

Aflaverðmæti

Aflaverðmæti íslenskra skipa nam 99 milljörðum króna á árinu 2008 samanborið við 80 milljarða yfir árið 2007. Aflaverðmæti hefur því aukist um 18,8 milljarða eða 23,5% á milli ára. Aflaverðmæti í desember nam tæpum 8 milljörðum miðað við rúma 5 milljarða í desember 2007. Þetta kemur fram á vef Hagstofunnar.

Þetta er að sjálfsögðu mjög gott.  En hafa ber í huga að skuldir sjávarútvegsins eru yfir 500 milljarðar og mest vegna kvótakaupa.

Ég geri mér fulla grein fyrir því að þarna er verið að birta tölur um aflaverðmæti skipa.  En miðum við að það tvöfaldist við vinnslu í landi, þá eru heildar tekjur sjávarútvegsins um 200 milljarðar á móti 500 milljörðum í skuldir.

Það hefur lengi verið þumalputtaregla að skuldir mættu ekki verða hærri en heildartekjur til að um eðlilegan rekstur væri að ræða.  Þannig að talsvert vantar upp á þá viðmiðun og mörg gjaldþrot líkleg á næstu mánuðum.

Það er margt sem hjálpast að við að gera tekjurnar ekki meiri.  Þar má nefna að sýking varð í síldinni í haust, sem örsakaði það að minna var unnið til manneldis og síðan kom engin loðna.

Aflaverðmæti 99 milljarðar króna