Suðurlandsvegur

Vegagerðin hefur tilkynnt frummatsskýrslu um 31 kílómetra kafla Suðurlandsvegar, frá Hólmsá ofan Reykjavíkur að Hveragerði. Jákvæð áhrif á samgöngur, útivist og vatnsvernd eru talin vega þyngra en þau neikvæðu áhrif sem verða á gróður, jarðfræði og náttúruminjar. Breikkun vegarins mun hafa verulega jákvæð áhrif á umferðaröryggi og afköst vegarins í heild.

Það er merkilegt við þessa skýrslu að 2+2 vegur hefur meiri neikvæð áhrif á umhverfið en 2+1 vegur.  2+1 vegur er betri að því leiti að þá er hægt að leggja nýjan veg lengri leið.  2+1 vegir eru algengir víða erlendis t.d. í Lúxemborg en auðvitað verða ökumenn að vera þess meðvitaðir að þriðja akreinin er einungis ætluð fyrir framúr akstur.

Umferðaröryggi og afköst aukast

Loðnuleit

Áhöfnin á Faxa RE er nú við loðnuleit á svæðinu vestur og norðvestur af Snæfellsnesi. Loðnuleitin fer fram í samvinnu við Hafrannsóknastofnunina er Sveinn Sveinbjörnsson fiskifræðingur um borð í skipinu.

Ég held að það sé útséð með að það verður engin loðnuveiði í vetur.  Nú er kominn mars og spákellingin í Vestmannaeyjum var búinn að fullyrða að loðnan kæmi í lok febrúar.  En þetta er ekki alslæmt því nú fær loðnan að ganga vestur í Breiðafjörð og kemur sér vel fyrir þorskinn.  Nú ætti að auka þorskkvótann um 150 þúsund tonn, þá myndi loðnan í raun skila einhverjum verðmætum í þjóðarbúið.  Hinsvegar verður þetta mikið áfall hjá fyrirtækjum sem eru mest í uppsjávarveiðum.

Leita loðnu við Snæfellsnes

Pizza Jut

Fyrirtækið, sem rekið hefur þrjá Pizza Hut staði í Danmörku, ætlar að hætta því og verða staðirnir þrír því lagðir niður. Segir forsvarsmaður félagsins, að danskur veitingahúsarekstur gangi illa, einkum þó pítsustaðir.

Það er víðar en á Íslandi sem fólk hefur lítið af peningum.  Það er eins og mig minni að einhverjir íslendingar hafi komið þessum rekstri af stað á sínum tíma.

Pizza Hut hættir rekstri í Danmörku

Afsökun

Ásta Möller, þingkona Sjálfstæðisflokksins, baðst í kvöldfréttum Ríkissjónvarpsins afsökunar á því að hafa ekki staðið sig betur sem kjörinn fulltrúi, þegar bankakerfið stækkaði ört og að lokum hrundi. Ásta sagði gagnrýni á flokkinn eiga rétt á sér.

Það var mikið að einhver biðst afsökunar á störfum sínum og mættu fleiri taka Ástu sér til fyrirmyndar.  Þetta kemur reyndar í kjölfar mikillar gagnrýni á forustumenn Sjálfstæðisflokksins, sem fram kemur í drögum að skýrslu um starf flokksins.  Hinsvegar sá Geir H. Haarde ekki ástæði til að biðjast afsökunar í fréttum í kvöld.  Heldur gagnrýndi hann nefndarmenn og sagði að þeir ættu að líta til framtíðar en ekki velta sér upp úr fortíðinni.  En mistök fortíðarinnar hljóta að verða að skoðast til að hægt sé að móta framtíðina.

Baðst afsökunar á mistökum

Afskriftir

Það virðist engin takmörk sett hvað leggja á miklar birgðar á íslenska þjóð.  Þegar Íslandsbanki tók besta tilboðinu í Árvakur hf. útgáfufélag Morgunblaðsins sem var frá félaginu Þórsmörk en það félag er í eigu nokkurra auðmanna á Íslandi, þá var upplýst að bankinn þyrfti að afskrifa einn milljarð.  En nú hefur verið upplýst að Íslandsbanki hf. og Nýi Landsbankinn munu afskrifa tæpa þrjá milljarða af skuldum Árvakurs.  Samt var þetta talið vera besta tilboðið.  Ástralski fjárfestirinn sem líka gerði tilboð er mjög ósáttur og telur sitt tilboð hafa verið betra.  Þar sem þessar afskriftir lenda á skattgreiðendum finnst mér það vera lámarkskrafa að Íslandsbankinn upplýsi um bæði þessi tilboð.  Sérstaklega þegar það var fullyrt að allt þetta söluferli ætti að vera gegnsætt.  Ég bara spyr hvað réttlætir að skattgreiðendur þurfi að greiða þrjá milljarða til að nokkrir auðmenn geti eignast dagblað?  Í þessum hópi eru nokkrir útgerðamenn og handhafar mikilla veiðiheimilda.  Getur verið að þær veiðiheimildir í eigu þjóðarinnar séu nú notaðar sem veð til að fá lán í svona brask.  Hvernig má það vera að allt í lagi er að afskrifa þrjá milljarða til að bjarga Árvakri hf. á meðan bankarnir eru að bjóða upp íbúðir hjá fólki og hirða af því bifreiðar og gera fólk gjaldþrota.  Árvakur hf. var gjaldþrota og var það bara ekki allt í lagi og réttast hefði verið að taka félagið til gjaldþrotaskipta.  Þetta er ekkert nema pólitísk ákvörðun því Sjálfstæðisflokkurinn þurfti nauðsynlega á þessu blaði að halda nú þegar prófkjör og kosningar eru að nálgast.  Þannig að það virðist ekkert lát vera á spillingunni hér á landi, nema síður sé.

Nýliðun á Alþingi

Mikið er rætt um nauðsyn þess að mikil nýliðun verði á Alþingi eftir næstu kosningar.  Einn af þeim sem gala hæðst er Jón Baldvin Hannibalsson, sem vill verða formaður Samfylkingarinnar og ætlar að bjóða sig fram gegn Ingibjörgu Sólrúnu á næsta landsfundi.  Ég er alveg sammála því að gott væri að fá nýja þingmenn með nýja hugsun á Alþingi.  En Jón Baldvin er nú orðin 70 ára og honum fylgir enginn ný hugsun.  Það verður skrautlegt Alþingi ef öll endurnýjun verður með því að láta yngra fólkið víkja og fá ellilífeyrisÞega í staðinn.  Það er nauðsynlegt að hafa þetta blandað ungt fólk með nýja hugsun og þingmenn með reynslu.  Ég vona að þetta brölt Jóns Baldvins renni út í sandinn.  Hann er ekki alveg saklaus af því ástandi sem nú er, því það var Jón Baldvin sem leiddi Davíð Oddsson til valda á Íslandi með Viðeyjarstjórninni frægu og undirbjó jarðveginn fyrir Framsókn að komast til valda og frá 1991 þegar Viðeyjarstjórnin var stofnuð hefur spilling verið hér landlæg.  Ég horfði í gærkvöld á þáttinn um bandaríska fyrirtækið ENRON og þá áttaði maður sig á því hvar útrásarvíkingarnir okkar lærðu sín fræði.  Það var margt líkt með ENRONog mörgum íslenskum fyrirtækjum.  Framtíðar hagnaður var bókfærður strax og viðskiptavild (goodwill) var orðin hjá sumum ein helsta eignin.  En Jón Baldvin á þing núna.  Nei takk.

Grenivík

„Það eru mjög slæmar horfur í markaðsmálum fyrir þær vörur sem við höfum framleitt á Grenivík og því grípum við til þessa ráðs,“ segir Ágúst Torfi Hauksson, framkvæmdastjóri Brims á Akureyri. Þrettán starfsmönnum af sextán hjá landvinnslu Brims á Grenivík var sagt upp fyrir helgi en Þar hafa verið framleiddar saltaðar afurðir.

Alltaf er ráðist á garðinn þar sem hann er lægstur.  Ég get ekki ímyndað mér að þetta geti skipt sköpum fyrir jafn stórt fyrirtæki og Brim er.  En aftur á móti skipti þetta gífurlega miklu máli fyrir íbúa á Grenivík.

Undirbúa lokun landvinnslu á Grenivík

Bronsstyttur

Kínverskur maður, sem átti hæstu boð í tvær kínverskar bronsstyttur á uppboði í París í síðustu viku, segist ekki ætla að greiða fyrir þær enda séu þær í raun í eigu kínversku þjóðarinnar. Styttunum var rænt í Peking árið 1860.

Hvernig ætlar aumingja maðurinn að sanna rán sem átti að hafa skeð fyrir um 150 árum.  Það er hreinlega ekki hægt og því er nokkuð öruggt að hann mun ekki fá þessar styttur.

Ætlar ekki að borga

Fréttamenn

Mun fleiri fréttamenn hafa verið myrtir það sem af er ári heldur en í fyrra. Alls hafa 26 fréttamenn verið myrtir í ár en 16 á sama tíma í fyrra, samkvæmt upplýsingum frá Alþjóðasamtökum fréttamanna.

Flest þessi morð hafa verið í Miðausturlöndum þar sem allt logar í ófriði.  Hvað eru fréttamenn að þvælast á þessum svæðum þar sem þeir eru ekki öryggir um líf sitt?  Eða er fréttaþorstinn slíkur að menn eru tilbúnir að leggja líf sitt að veði til að ná í  fréttir.

26 fréttamenn myrtir í ár

Uppsagnir

Stjórn trésmiðjunnar Stígandi á Blönduósi hefur ákveðið að segja upp öllum starfsmönnum fyrirtækisins, alls fimmtán manns. Að sögn Einars Kolbeinssonar, framkvæmdastjóra Stíganda, er um varúðarráðstöfun að ræða vegna óvissu um verkefnastöðu félagsins. Flestir starfsmanna fyrirtækisins eru með þriggja mánaða uppsagnarfrest.

Enn fjölgar þeim atvinnulausu og ekki búið enn.

Stígandi segir öllum upp