Ný tillaga um aflakvóta

Þar sem það virðist vera brostinn á flótti úr sjómannastéttinni tel ég að réttast væri að hætta allri útgerð í stað þess að reyna að manna skipin með erlendu vinnuafli.  Við getum auðveldlega hætt að gera út og farið að fordæmi Grænlendinga og leigt ESB allan okkar aflakvóta a.m..k. á meðan ekki má veiða meiri þorsk en 130.000 tonn á næstu árum.  Hægt væri að hjálpa eigendum fiskiskipa að borga af sínum lánum, og einnig að greiða sjómönnum laun því svo miklir peningar fengjust fyrir leigu á aflakvótanum.  Ekki þurfti að hugsa mikið um fiskvinnslufólk því það er í dag um 90% af því erlent fólk sem færi auðvitað heim til sín aftur.  Við þyrftum ekki að hafa neinar áhyggjur af okkar mörkuðum erlendis, því auðvelt væri að semja við fiskvinnslur í ESB um að sinna því fyrir okkur í nokkur ár.  Svo má líka spyrja sig að því hvort þetta sé ekki úreltur atvinnuvegur sem ekki getur lengur greitt sómasamleg laun.  Ég veit ekki um neina útgerð sem telur sig hafa yfir að ráða nægum aflaheimildum og eru því aumingja útgerðarmennirnir í tómu basli með sinn rekstur og væri nánast góðverk að losa þá undan þessari kvöð að basla með vonlausa útgerð ár eftir ár.  Ég skora á ríkisstjórnina að létta þessari kvöð af aumingja útgerðarmönnunum og leigja allar aflaheimildi á Íslandsmiðum til ESB fyrir góðan pening svo fengjum við góðan blóraböggul til að kenna um þegar í ljós kemur að Haró hefur verið á villigötum í rúm 20 ár.