Bernskuminningar

Ég var sex ára þegar Rússar réðust inn í Ungverjaland og auðvitað stóð ég með Ungverjum, en ekki var minn heimur stærri á þessum tíma en svo að ég fór að leita að samanburði á Bíldudal og komst að þeirri niðurstöðu að þetta væri álíka og 90% íbúa Bíldudals réðust á hin 10% og sá strax að það yrði ansi ójafn leikur.  En svo fast sat þetta í barnssálinni að síðan hef ég aldrei geta litið Rússa réttum augum og hef ég átt þó nokkur viðskipti við þá og kynnst því að í raun eru þetta hinir bestu menn.  Ég fór að rifja þetta upp þegar ég las frétt um að hópur af unglingum og börnum væru búnir að setja upp heimasíðu til áróðurs gegn Pólverjum á Íslandi.  Ég tek heilshugar undir með Bubba Morthens um að svona lagað á ekki að líða og verður að stoppa strax.  Við verðum að gæta okkar á því að vera ekki að ala á fordómum í garð ákveðinna þjóðfélagshópa sem hér eru búsettir.  Þá gæti farið eins fyrir mörgum og mér forðum.  Í dag er Ísland alveg eins og smáþorpið Bíldudalur ef við lítum yfir heiminn.  Hvað hafa svo Pólverjar gert okkur?  Þeir eru að stórum hluta að vinna störf sem Íslendingar vilja ekki  eða nenna ekki að vinna.  Sem betur fer mun nú vera búið að loka þessari síðu, en allir þeir sem að henni stóðu ættu að skammast sín.