Sverðin reidd til höggs

Á næstu vikum munu hinar nýju skattatillögur ríkisstjórnarinnar koma fyrir Alþingi og þá fyrst kemur í ljós hvað gengið verður nærri fjárhag flestra heimila í landinu.  En aumingja ríkisstjórnin verður að hafa það í huga, að það eru viss þolmörk, sem ekki má fara yfir án þess að rústa öllu atvinnulífi og fjárhag flestra heimila.  Ef gengið er of langt í skattlagningu brestur á landflótti og þá sitja þeir sem eftir eru með enn þyngri byrgðar og atvinna dregst saman, tekjur fólks munu lækka og að lokum skila skattahækkanir engu í ríkissjóð.  Það þýðir lítið að bera fyrir sig rökum Alþjóða Gjaldeyrissjóðsins, því þar á bæ er mönnum nákvæmlega sama þótt að hér fari allt fjandans til og reyndar er það þeirra vilji.  Og til að bæta gráu ofan á svart ætlar ríkisstjórnin að keyra Icesave-frumvarpið í gegn á Alþingi án þess að láta á það reyna hvort Íslandi beri nokkur lagaleg skylda til að greiða þessa skuld einkafyrirtækis, sem Landsbankinn vissulega var.

Vissulega verður að óbreyttu mikill halli á fjárlögum fyrir 2009 og 2010, en þann halla er auðvelt að laga með því að auka veiðiheimildir í þorski um 40-50 þúsund tonn, sem ríkið leigði til útgerðafyrirtækja gegn hógværu gjaldi.  Það þyrfti ekki að vera hærra en 50 krónur á kíló til að brúa fjárlagahallann.  Slík aukning myndi ekki stefna þorstofninum í neina hættu, enda er spurning hvaða tilgangi það á að þjóna að byggja upp sterka fiskistofna á Íslandsmiðum og enginn verður eftir til að veiða fiskinn þegar stofnarnir hafa náð hámarkstærð.  Því útgerðarfyrirtækin verða flest öll farinn á hausinn og þar með nýju bankarnir líka.  Skattahækkanir nú eru aðeins tilraun til að fresta vandanum og valda því að sú kreppa sem nú er glímt við verður hér næstu áratugi.

Sverðin reidd til höggs