Nýr kirkljugarður

Stefnt er að því að taka nýjan kirkjugarð í hlíðum Úlfarsfells í notkun á árunum 2018 til 2020.

Mér skilst að í þessum garði sé pláss fyrir tug þúsunda kistna og er greinilegt að Kirkjugarðar Reykjavíkur ætla að vera vel undirbúnir þegar fólk þarf að fara að herða sultarólina of mikið, eins og allt stefnir í.

Pláss fyrir á þriðja tug þúsunda kistna

Sjúkrahús

Rekstur Sjúkrahússins á Akureyri var neikvæður um 75,6 milljónir á fyrri hluta þessa árs. Rekstrarhallinn er 3,8 prósent umfram áætlun. Langstærstu orsakaþættir hallans eru gengishækkanir og hækkandi verðlag.

Þetta er alltaf sama sagan með nær alla heilbrigðisþjónustu á Íslandi, að aldrei fá þessar stofnanir nægjanleg fé á fjárlögum hvers árs.  Heldur er komin upp sú venja að bæta úr þessu með viðaukafjárlögum árlega.  Tilgangurinn með þessu er sá að fá fjárlögin til að líta nógu vel út þegar þau eru samþykkt, en fólk tekur minna eftir fjáraukalögunum þótt þau séu í raun hluti fjárlaga.

Halli upp á 75 milljónir króna

Eimskip

Andrúmsloftið innan Eimskips (Eimskipafélags Íslands hf.) í stjórnartíð Baldurs Guðnasonar, sem hætti sem forstjóri í apríl, var spennuþrungið í nokkra mánuði fyrir aðalfund félagsins í mars á þessu ári samkvæmt heimildum 24 stunda. Baldur jós „fúkyrðum“ yfir aðra stjórnendur fyrirtækisins, eins og einn viðmælenda komst að orði, og voru samskipti æðstu stjórnenda stirð af þeim sökum.

Þá kvörtuðu stjórnarmenn yfir því að vera ekki upplýstir um fjárfestingar félagsins nema að litlu leyti. Aðrir stjórnarmenn deildu hart á Magnús Þorsteinsson, þáverandi stjórnarformann, fyrir að skýra ekki nægilega nákvæmlega frá fjárfestingum félagsins er tengdar voru flugrekstrareiningum og ferðaþjónustu. Voru fundir stjórnar, mánuði fyrir aðalfundinn í mars, spennuþrungnir af þeim sökum.

Auðvitað myndast spenna þegar allt er að fara fjandans til.  En svona framkoma er ekki til að bæta ástandið.  En hluthafar Eimskips ættu núna að anda léttara þegar ljóst er að þeir Björgólfsfeðgar ætla að bjarga Eimskip.

Fúkyrði flugu á Eimskipsfundi

Ljósmæður

Fimm börn komu í heiminn á fæðingadeild Landspítalans í Reykjavík í nótt, og gekk allt að óskum þrátt fyrir verkfall ljósmæðra, sem hófst í gærkvöldi. Undanþága var fengin fyrir þrjár ljósmæður til viðbótar þeim fjórum sem voru á vaktinni.

Það er greinilegt af þessari frétt að ráða, að ljósmæður gera allt sem þær geta til að ekki skapist neyðarástand vegna barnsfæðinga. 

Hvers vegna í ósköpunum semur ríkið ekki við þessa stétt, svo eðlilegt ástand verði komið á aftur.  Í gær var samþykkt á Alþingi frumvarp um sjúkratryggingar og í þeim lögum er beinlínis bannað að semja við stéttarfélög.  Aðeins má semja við verktaka og samkvæmt því verða allar ljósmæður að gerast verktakar, þótt augljóst sé að það mun verða dýrara fyrir ríkið.  Ég ætlaði ekki að trúa mínum eigin eyrum þegar ég hlustaði á þingmenn Samfylkingar verja þetta frumvarp og samþykkja síðan.  Hér er brotið blað í samskiptum ríkisins og stéttarfélaga þegar öðrum aðilanum er bannað með lögum að semja við hinn.  Nú er búið að festa í lög að það verður aldrei samið við ljósmæður sem stéttarfélag.  Hvað kemur næst, ætli það verði ekki bara alfarið bannað að semja um kaup og kjör við öll stéttarfélög.

Fimm börn í nótt

Landbúnaður

Fjármagnskostnaður ætlar allt lifandi að drepa, sagði Einar K. Guðfinnsson landbúnaðarráðherra í utandagskrárumræðum á Alþingi í gær og taldi hvorki landbúnað né annað atvinnulíf geta þrifist við þessar aðstæður.

Þetta eru stór orð hjá Einari K. Guðfinnssyni, en mun hann hafa þessa sömu skoðun við ríkisstjórnarborðið, það efa ég.

Landbúnaður í kröggum

Sjálfsvíg

Á Alþjóðadegi sjálfsvígsforvarna 10. september beindist athyglin sérstaklega að því sem verða má til að draga úr sjálfsvígum. Að sögn Salbjargar Bjarnadóttur verkefnastjóra hjá Landlækni er þjálfun fagfólks í að greina áhættumerki hjá fólki í tæka tíð mikilvægt áhersluatriði en auk þess þarf að hlúa með réttum hætti að aðstandendum þeirra sem falla fyrir eigin hendi.

Þetta er skuggaleg þróun hér á landi hvað sjálfsvíg eru algeng og mikið af ungu fólki.  Ástæðurnar geta verið margar og því erfitt að glíma við þetta vandamál.  Þegar svona hlutir gerast þá hrynja oft heilu fjölskyldurnar saman.  Ef mögulegt er að greina áhættuþætti þá verður að grípa strax inní.

Gífurleg áhrif sjálfsvíga

Rafmagn

Sérfræðingar telja víst, að bilun, sem varð þegar Sultartangavirkjun var gangsett á mánudagskvöld, megi rekja til annars af spennum virkjunarinnar. Er því ljóst, að engin raforkuframleiðsla verður í stöðinni á næstunni.

Hvernig er þetta eiginlega hjá Landsvirkjun, það eru alltaf að koma upp bilanir í kerfinu og nú síðast er upplýst að Sultartangavirkjun framleiðir ekki rafmagn á næstunni.  Notar Landsvirkjun ekki ný tæki ofl. í sínum virkjunum eða er þetta bara gamalt drasl.

Enn varð bilun í spenni

Impregilo

Impregilo fer fram á ríflega 1,2 milljarða króna greiðslu frá ríkinu vegna oftekinna skatta, að viðbættum vöxtum og málskostnaði. Þetta kom fram í svari Árna M. Mathiessen, fjármálaráðherra, við fyrirspurn Steingríms J. Sigfússonar á Alþingi í gær.

Hvaða rugl er nú þetta, var ekki gengið frá öllum atriðum við þetta fyrirtæki áður en þeir byrjuðu á Kárahnjúkavirkjun.

Ósamið við Impregilo

Árekstur

Harður árekstur varð á langtímabílastæðinu á Keflavíkurflugvelli um hálf tólfleytið í gærkvöldi, samkvæmt upplýsingum lögreglunnar á Suðurnesjum. Sjúkrabíll var kvaddur á vettvang en ekki munu hafa orðið alvarleg meiðsl á fólki. Bílarnir voru aftur á móti óökufærir eftir og dregnir á brott með kranabifreið.

Þessir ökumenn hafa verið að flýta sér einum of mikið.

Harður árekstur á Keflavíkurflugvelli

Bátur á Rifi

Íbúar á Rifi eru lítið að stressa sig þótt einn bátur sé á aðalbraut bæjarins gengur umferðinni sinn vanagang. Vélbáturinn Kristinn var í viðgerð í vélsmiðju Árna Jóns á Rifi og að viðgerð lokinni, var báturinn dreginn eftir Hafnargötunni að uppsátrinu og sjósettur.

Þetta er alvanalegt á hinum smærri stöðum, en ef þetta væri í Reykjavík færi örugglega öll umferð í flækju og árekstur á árekstur ofan.

Bátur á aðalgötunni