Tryggvi Þór

Tryggvi Þór Herbertsson prófessor er í öðru sæti í prófkjöri Sjálfstæðisflokksins í Norðausturkjördæmi þegar búið er að telja 1.000 atkvæði. Kristján Þór Júlíusson er í fyrsta sæti og Arnbjörg Sveinsdóttir er í þriðja sæti.

Alltaf finnst mér leiðinlegt þegar frambjóðendur í einu kjördæmi, eru búsettir í öðru kjördæmi og geta þar af leiðandi ekki kosið eigin lista.  Ég sé ekki betur en að Tryggvi Þór hafi útilokað þingmennsku Arnbjargar Sveinsdóttur.

Tryggvi Þór í öðru sæti

Rússlandsforseti

Dimitrí Medvedev, forseti Rússlands, hvatti í dag stærstu fyrirtæki landsins til að endurgreiða „siðferðilega skuld“ sína í efnahagskreppunni.

Forsetin segir með réttu að fólk hafi verið að efnast óeðlilega mikið á síðustu árum og nú ætti að greiða til baka þegar kreppti að.

Áuðmenn Íslands ættu að taka Rússa sér til fyrirmyndar hvað þetta varðar.

Hinir ríku borgi siðferðislegar skuldir sínar

Olía

Olíumálaráðherrar OPEC, samtaka olíuframleiðsluríkja, ákváðu á fundi í Vínarborg í dag að halda framleiðslu óbreyttri að minnsta kosti fram í maí. Munu ráðherrarnir halda fund á ný 28. maí og leggja þá nýtt mat á stöðuna á olíumarkaði.

Þá eru líkur á að olíufélögin haldi áfram að lækka eldsneytið öllum til ánægju.

Ekki dregið úr olíuframleiðslu í bili

Hrói höttur

Breskur sagnfræðingur segist hafa fundið vísbendingar um, að Hrói höttur hafi ekki verið jafn vinsæll meðal enskrar alþýðu og þjóðsögur um hann gefi til kynna. Þvert á móti hafi hann verið ótýndur glæpamaður sem hafi farið um rænandi og ruplandi og ekki gefið hinum fátæku það sem hann tók frá þeim ríku.

Þarf nú endilega að draga þetta fram í dagsljósið.  Hrói höttur hefur verið vinsæll hjá börnum og unglingum.  En nú á að gera hann að glæpamanni.  Þótt fundist hafi einhver gömul skjöl frá munki, þá segir það ekkert um þetta því að á þessum tíma voru prestar og munkar hluti af yfirstétt Englands.

Var Hrói höttur ótíndur glæpamaður?

ÍNN

Ingvi Hrafn Jónsson, sjónvarpsstjóri ÍNN, segir að stöðin selji útsendingartíma á 60 þúsund krónur hálftímann fyrir utan virðisaukaskatt. Dögg Pálsdóttir, frambjóðandi Sjálfstæðisflokks í Reykjavík, upplýsti í gærkvöldi að hún hefði greitt ÍNN 74.700 krónur fyrir viðtal og Útvarpi Sögu 53.535 krónur, einnig fyrir viðtal.

Hann á eftir að hala inn dágóðar tekjur á þessu hann Ingvi Hrafn Jónsson.

Ég horfi stundum á þessa stöð og annan eins pólitískan áróður hef ég hvergi séð í opinberum fjölmiðlum.  Þarna kemur stundum saman svokölluð "Heimastjórn,"sem í eiga sæti Ingvi Hrafn, Hallur Hallsson, Ármann Ólafsson alþm. og Jón Snæhólm.  Reyndar er Ingvi ekki alltaf viðstaddur heldur er rætt við hann í gegnum gervihnött þegar hann er að baða sig í sólinni á Flórída, en þar dvelur hann hluta úr árinu.  Það sem þessir menn gera er að níða niður þá aðila sem ekki eru sjálfstæðismenn.   Þarna er líka svokallað "Hrafnaþing", en þá er það Ingvi Hrafn að ryðja út úr sér skömmum og svívirðingum yfir þá sem eru honum ekki að skapi.

Þannig að ég tel að frambjóðendur annarra flokka en Sjálfstæðisflokkinn munu lítið nota sér þessa þjónustu.

ÍNN er áróðursmaskína Sjálfstæðisfkokksins

ÍNN selur útsendingartíma

Hvað gerir Kristinn H. Gunnarsson nú?

Kristinn H. Gunnarsson sagði sig úr Frjálslynda flokknum og gekk í annað sinn í Framsóknarflokkinn, eftir að hafa stoppað í einn dag í Samfylkingunni. Hann tók þátt í prófkjöri Framsóknar og sóttist eftir 2. sæti á lista flokksins í Norðvesturkjördæmi.  Hann lenti hinsvegar í 8. sæti svo vonir um að komast á Alþingi á þessum lista eru engar.  Hinsvegar hefur heyrst að hann hafi verið að ræða við Bjarna Harðarson um að verða með á L-listanum.  Ekki held ég að það komi honum á þing og virðis því að þessi mesta flokkamella síðustu ára ljúka þingmennsku eftir næstu kosningar.  Nema að hann bjóði sig fram utan flokka og kæmist þannig á þing. 

Hver veit?

Agnes segir................

Þetta er fyrirsögn á ýmsum greinum sem Agnes Bragadóttir , blaðamaður á Morgunblaðinu, notar.  Í Morgunblaðinu í morgun var hún að skrifa um skort á leiðtogum fyrir stjórnmálaflokkana.  Hún gat ekki fundið neinn sem væri sterkur leiðtogi, nema helst Bjarni Benediktsson ef hann yrði næsti formaður Sjálfstæðisflokksins.  Aðra afgreiddi hún sem lítilmenni og fullyrti að enginn alvöru leiðtogi hefði komið fram síðan Davíð Oddsson var formaður Sjálfstæðisflokksins.  Að vísu viðurkenndi hún að Steingrímur J. Sigfússon hefði talsverða forustuhæfileika, en hann væri bara ekki í réttum flokki til að teljast með.

Þess skal sérstaklega getið að Agnes segist vera alveg hlutlaus í sínum skrifum og blandi pólitík þar aldrei inní og ritstjórar blaðsins skipti sér ekki af því hvað hún skrifar.  Hún segist leggja mikla rannsóknarvinnu í málin áður en hún fer að skrifa um þau.  Ef hún hefur gert það áður en hún skrifaði þessa grein gæti hún hugsanlega hafa rekist á nöfn eins og Ólafur Thors,  Bjarni Benediktsson, eldri,  Hermann Jónasson, Eysteinn Jónsson og Lúðvík Jósepsson ofl.  En kannski voru sumir þessara manna bara ekki í réttum flokki til að teljast með.

Eins og áður sagði er Agnes algerlega hlutlaus í sínum skrifum og blandar ekki pólitík þar inní.

Agnes segir...... Sjálfstæðisflokkurinn er ekki pólitískur flokkur.

Ósáttir

Háttsettur liðsmaður stjórnar Baracks Obama í Bandaríkjunum segir að undrun ríki í Washington yfir þeirri ákvörðun Breta að ræða við pólitískan arm Hizbollah-samtakanna herskáu í Líbanon. Bandaríkin og Ísrael líta á samtökin sem hermdarverkasamtök.

Óánægja Obama er vel skiljanleg því þessi skæruliðasamtök eru mjög sterk í suðurhluta Líbanon og fær bæði fjárstuðning og vopn frá Íran til að ráðast á Ísrael.

Ósáttir við Breta

Eva María

Mikil gagnrýni hefur komið fram á Evu Maríu sem spyrils í þáttunum "Gettu betur" í Velvakanda Morgunblaðsins, en þetta er spurningarkeppni framhaldsskólanna.   Það má segja að hún sé þar lögð í einelti.  Reyndar fannst mér fyrsti þátturinn slæmur því að í hraðaspurningunum spurði hún svo hratt að ég náði aldrei að heyra spurningarnar og byggist áðurnefnd gagnrýni á því.

En eftir þann þátt hefur mér fundist hún standa sig mjög vel og er mjög skýrmælt þegar hún spyr og hefur góða stjórn á áhorfendum í salnum.  Þar sem þessar spurningar eru aðeins í 100 mínútur er eðlilegt að reynt sé að komast yfir sem flestar spurningar í þessum lið þáttarins.  Hún er líka hress og skemmtileg og að mínu mati stendur hún sig mjög vel eða 100%.

Auglýsing

Neytendastofa mælist til þess við Símann að fyrirtækið stöðvi birtingar á auglýsingum sínum sem nú eru í gangi. Vodafone og Nova hafa kært birtingu auglýsinganna og telja að hún brjóti gegn lögum um eftirlit með viðskiptaháttum og markaðssetningu.

Hvað er eiginlega að þessari auglýsingu, ég sé ekki að hún vegi neitt að Vodafone eða Nova.  Eða má Síminn aldrei auglýsa neitt.

Neytendastofa vill Hilmi Snæ af skjánum