Seðlabankinn

Norskir fjármálasérfræðingar hrósa íslenskum stjórnvöldum fyrir valið á seðlabankastjóra en í morgun var tilkynnt að Svein Harald Øygard hefði verið settur í embættið til bráðabirgða. Er Øygard sagður skilja vandamál Íslands betur en margir Íslendingar.

Það er gott að til skuli vera maður í heiminum sem skilur alla þá hringavitleysu sem hér hefur verið í efnahagsmálum undanfarið.

Skilur vandamál Íslands

Barnslát

Talið er að nýfætt stúlkubarn í Bretlandi hafi látist eftir að móðir hennar kyssti hana. Stúlkan var aðeins 11 daga gömul þegar líffæri hennar hættu að starfa síðla árs 2006. Talið að hún hafi smitast af herpesvírus frá móður sinni gegnum kossa eða brjóstagjöf.

Gæti hún ekki alveg eins hafa smitast á meðgöngutímanum eins og af einum kossi.

Lést eftir koss frá móður sinni

Versta embættið á Vesturlöndum

Fær versta seðlabankastjóraembætti á Vesturlöndum. Þetta er fyrirsögn á frétt sem Sigurd Bjørnestad, blaðamaður norska blaðsins Aftenposten, skrifar á viðskiptavefinn E24. Bjørnestad sat blaðamannafund landa síns Svein Harald Øygard, sem í Seðlabanka Íslands en Øygard var í morgun settur tímabundið í embætti seðlabankastjóra.

Eigum við íslendingar ekki nóg af hæfum mönnum til að gegna þessu embætti til bráðabirgða.  Það er frekar aumingjalegt að þurfa að leita út fyrir landsteinana eftir Seðlabankastjóra.

Versta seðlabankastjóraembætti á Vesturlöndum

Afsvar

,,Hann gaf okkur afsvar í morgun," segir Þorgils Torfi Jónsson, Sjálfstæðismaður á Suðurlandi. Torfi, ásamt fleiri sjálfstæðismönnum, stóð fyrir undirskriftasöfnun til stuðnings við framboð Davíðs Oddssonar til þings fyrir Suðurkjördæmi. Davíð fékk listann afhentan í gærkvöldi en svaraði í morgun.

Auðvitað gaf Davíð Oddsson afsvar við því að fara í framboð fyrir Sjálfstæðisflokkinn.  Því eins og ég skrifaði um í morgun er hann á fullu við að stofna nýjan flokk með Birni Bjarnasyni og fleiri ESB-andstæðingum í Sjálfstæðisflokknum.

Davíð svaf á hugmynd um framboð

Seðlabankinn

Svein Harald Øygard, sem í morgun var settur seðlabankastjóri til bráðabirgða, hefur beðið á hóteli í Reykjavík frá því á mánudag eftir að Alþingi afgreiddi ný lög um Seðlabankann. Ríkisstjórnin leitaði víða að bráðabirgðabankastjóra. Eftir ábendingu Kristínar Halvorsen, fjármálaráðherra Noregs til Steingríms J. Sigfússonar, var ákveðið að ræða við Øygard. Þrír fyrrverandi bankastjórar eiga rétt á biðlaunum í 6 og 12 mánuði og nema biðlaunagreiðslur 44 milljónum króna.

Eitthvað er nú skrýtið við þetta því samkvæmt því sem Sigurður Líndal segir í blöðunum í dag má ekki setja í þetta embætti nema íslenskan ríkisborgara, annað væri brot á stjórnarskránni.  En auðvitað skiptir það ekki máli, það er hvort sem er alltaf verið að brjóta stjórnarskrána.  Þannig að eitt brot í viðbót getur varla skipt máli.

Bankastjórinn beið átekta á hóteli

Árvakur hf.

Þegar Íslandsbanki hóf söluferlið á Árvakri hf. útgáfufélagi Morgunblaðsins,lýsti Birna Einarsdóttir bankastjóri því yfir að allt söluferlið yrði gegnsætt og væri til marks um ný vinnubrögð í bankanum.  En þegar gengið var að tilboði fjárfestahóps undir forustu Óskars Magnússonar var ekki einu sinni hægt að fá uppgefið hvað tilboðið væri hátt.  Þó hefur lekið út úr bankanum að Íslandsbanki muni við þessa sölu afskrifa a.m.k. einn milljarð.  Nú er þessi banki að fullu í eigu ríkisins svo það verða skattgreiðendur sem koma til með að borga þessar afskriftir.

Athygli vekur að í þessum hópi eru nokkrir útgerðarmenn, t.d. Þorsteinn Már Baldvinsson einn aðaleigandi Samherja hf. og fv. stjórnarformaður Glitnis, Guðbjörg Matthíasdóttir aðaleigandi Ísfélags Vestmannaeyja hf. og Pétur H. Pálsson sem er stór eigandi í Vísir hf. í Grindavík.  Nú hef ég ekkert við það að athuga að útgerðarmenn kaupi dagblað ef þeir hafa efni á því.  Það er ekki langt síðan að útgerðarmenn kröfðust að fá niðurfellingu á erlendum skuldum sínum eða að fá að greiða þær á því gengi sem var fyrir bankahrunið.  Nú vaknar sú spurning hvar þessir aðilar fá peninga til að kaupa þetta blað.  Er enn verið að veðsetja aflaheimildir til að taka þátt í fyrirtækjabraski?  Hvernig verður þá hægt að réttlæta það að útgerðarmönnum verði rétt hjálparhönd við sinn rekstur.  Á að velta meiri skuldum á íslenska skattgreiðendur?, sem flestir eru í bullandi vandræðum með sín fjármál.

Frjálslyndi flokkurinn

Mikið þykir mér leitt hvernig komið er fyrir hjá mínum ágæta flokki.  Fólk virðist ekki skilja um hvað stjórnmál snúast.  Þannig segir Þóra Guðmundsdóttir fyrrverandi formaður kjördæmisráðs flokksins í Reykjavík Suður í Fréttablaðinu í dag;  "Frá fyrsta degi var litið á okkur sem vildum búa til stóran og öflugan flokk, sem óvini af Vestfjarðaklíkunni.  Klíkan vildi bara að flokkurinn væri lítill klúbbur sem reddaði örfáum vinum vinnu og því fór sem fór.  Við gáfumst bara upp."  Einnig sagði sig úr flokknum  Tryggvi Agnarsson kollegi Þóru í Reykjavík norður.  ásamt varaformönnum og riturum ráðanna.  Þóra fullyrðir að óstjórn ríki í yfirstjórn flokksins og spilling og einkavinavæðing ráði þar ríkjum.  Hún segir að á nýlegum miðstjórnarafundi hafi komið fram að Guðjón Arnar Kristjánsson væri kvótaeigandi.  Þetta held ég að sé mikill misskilningur hjá Þóru, það er Kristján sonur Guðjóns sem er útgerðarmaður á Ísafirði og á kvóta.  Þóra segir að margir sem hafi sagt sig úr flokknum á síðustu vikum stefni á að stofna nýjan flokk.  Þetta er nú meira andskotans kjaftæðið og greinilegt að þetta fólk er heilaþvegið af Jóni Magnússyni.  Ég held að þetta lið ætti bara að elta Jón í Sjálfstæðisflokkinn og spara sér að stofna nýjan flokk.  Öllu bulli um einhverja Vestfjarðaklíku vísa ég út í hafsauga.  En það sem þetta fólk verður að átta sig á að flokkurinn hefur frá stofnun verið sterkastur á Vestfjörðum og mun verða það áfram.  Sannleikurinn er hinsvegar sá að fólk í Reykjavík vildi efla flokkinn á kostnað landsbyggðarinnar en tókst ekki.

En mest varð ég hissa þegar Kristinn H. Gunnarsson sagði sig úr flokknum og sagði ástæðuna vera eftirfarandi;   "Mér fannst vera orðið fullreynt að mér tækist að ná fram breytingum á flokknum og í forustusveit og trúnaðarbrestur hafi orðið á milli hans og forustu flokksins."  Ég hafði heyrt af miklum deilum á milli Kristins og Jóns Magnússonar en nú er Jón farinn úr flokknum og ætlar Kristinn kannski að elta hann í Sjálfstæðisflokkinn svo þeir geti haldið áfram að rífast.  Hitt er líka fyrir neðan allar hellur og vanvirðing við kjósendur þegar þingmenn hætta í ákveðnum flokki og ætla að sitja áfram á Alþingi.  Þeir eiga að hafa þann manndóm að bera að segja hreinlega af sér þingmennsku svo varamenn geti komið í staðinn.

Ég tek heilshugar undir þau orð Guðjóns Arnars Kristjánssonar um að maður kemur í manns stað og nú ætlar Magnús Þór Hafsteinsson að gefa kost á sér í 2. sætið í Norðvesturkjördæmi í stað Kristins og verða það góð skipti.  Þessi flótti úr flokknum er ekkert annað en kjarkleysi og minnir mest á rottur sem flýja sökkvandi skip.  Í stað þess að berjast fyrir sínu innan flokksins þá er kjarkurinn ekki meiri en komið hefur í ljós.

Bankahrunið

Það ætlar að leika okkur íslendinga grátt þetta bankahrun þegar búið verður að púsla öllu saman og hætt við því að þjóðarbúið rísi ekki undir öllum þessum skuldum sem eru að falla á ríkissjóð.  Því má með réttu segja að Ísland sé gjaldþrota og hvað gera bændur þá?

200 milljarða útgjöld vegna bankahrunsins

Minnihlutastjórnin komin með meirihluta fylgi

Samkvæmt síðustu skoðanakönnun eru VG og Samfylkingin kominn með hreinan meirihluta á þingi ef kosið yrði nú og fengju samtals 35 þingmenn.  Er því nokkuð ljóst hvaða stjórn verður eftir næstu kosningar ef þetta gengur eftir.

Flokkur að klofna

Ég var að ræða við einn þingmann Sjálfstæðisflokksins fyrir stuttu og hann sagði mér að flokkurinn væri að klofna.  Bjarni Benediktsson verður sennilega kosinn formaður á næsta landsfundi.  Hinsvegar eru gömlu haukarnir í flokknum að ræða sama um stofnun á nýjum flokki sem berðist gegn umræðum um aðild Íslands að ESB.  Þar færi fremstir Davíð Oddsson, Björn Bjarnason og Styrmir Gunnarsson.  Samkvæmt nýjustu skoðanakönnun fengi Sjálfstæðislokkurinn í dag 19 þingmenn en ef þessi nýi flokkur verður stofnaður má reikna með að hann sæki allt sitt fylgi til Sjálfstæðisflokksins og þá fengi sá flokkur í mesta lagi 10 þingmenn.