Hreindýr

Hreindýrahjörð þessi er að kroppa í svörðinn við gömlu heykögglaverksmiðjuna í Flatey á Mýrum. Ef myndin er nægilega skýr sést að einn tarfurinn er með krónu af öðru hreindýri fasta í sínum eigin hornum ásamt margra metra dræsu af rafmagnsgirðingarvír.

Þetta er til skammar að fara svona með dýr og ættu þeir, sem til þess hafa vald og getu, að gera eitthvað til að hjálpa vesalings dýrunum.  Hreindýr tengjast á vissan hátt jólunum, því í ævintýramyndum eru það hreindýr sem draga vagna jólasveinanna.  Ég ætla rétt að vona að þessi dýr þurfi ekki að vera að draga á eftir sér leifar af rafmagnsgirðingu um næstu jól.

Með allt á hornum sér

Kattarþvottur

Það mætti halda að hinn ágæti maður Árni Sigfússon, bæjarstjóri Reykjanesbæjar, væri í raun tvær persónur.   Í Morgunblaðinu í gær birtist frá honum yfirlýsing sem hann kallar "Þeir sögðu ósatt" en þar segir; "Í ræðum á Alþingi, sem útvarp- og sjónvarpað var fyrir alþjóð, létu alþingismennirnir Atli Gíslason og Bjarni Harðarson falla ummæli í minn garð sem eru alger ósannindi.  Atli Gíslason sagði m.a. að Reykjanesbær væri eigandi í Háskólavöllum, sem keypt hafi 1.700 íbúðir og ég væri þar stjórnarformaður.  Þar væri ég að gæta hagsmuna báðum megin við borðið.  Þetta eru ósannindi.  Reykjanesbær er ekki eigandi að Háskólavöllum.  "Ég er þar hvorki stjórnarformaður, né í stjórn þess félags og á engra hlut í því félagi.  Bjarni Harðarson fullyrti í ræðu fyrir alþjóð að ég ætti persónulega hluti í Þróunarfélagi Keflavíkurflugvallar  og skólafélaginu Keili, sem stofnað var til að byggja upp vísindasamfélag á fyrrum varnarsvæði.  Þetta kom einnig fram í Mbl. í morgun (föstudag).  Þetta eru einnig hrein ósannindi.  Ég á engra persónulegra hagsmuna að gæta í báðum þessum félögum.  Ég á enga hluti í þessum félögum.  Ég mun starfa að uppbyggingarverkefnunum á Vallarheiði en svæðið er m.a. að hluti af Reykjanesbæ.  Ég starfa þar sem fulltrúi sveitarfélaga á Suðurnesjum og Reykjanesbæjar.

Netþjónabú, kvikmyndaver, flugakademía, orkusetur, nemendagarðar og menntafélög eru afurðir uppbyggingar á Vallarheiði.  Ég mun hvergi gefa eftir í því hlutverki til að skapa öflugt og nýstárlegt atvinnulíf með heiðarlegum hætti, þrátt fyrir ósannindi og fortölur þessara manna.  Ég krefst þess að þingmennirnir leiðrétti ósannindi í minn garð.  Árni Sigfússon, bæjarstjóri Reykjanesbæjar.  Svo mörg voru þau orð og ekki ætla ég að draga orð Árna í efa, en læt þess þó getið að Bjarni Harðarson alþm. mun vera búinn að leiðrétta ummæli sín, en ekki Atli Gíslason hefur ekki gert það.  Er þetta þá ekki bara allt hið besta mál?  En bíðum nú aðeins við því á sömu blaðsíðu í sama blaði er birt önnur yfirlýsing sem nefnd er; "Fagna úttekt á starfsemi Þróunarfélagsins"  Þar segir; "Stjórn Þróunarfélags Keflavíkurflugvallar telur mikilvæga þá ákvörðun Ríkisendurskoðunar að ráðast í úttekt á starfsemi félagsins eins og stjórn Þróunarfélagsins óskaði eftir fyrr á þessu ári.  Stjórn Þróunarfélags Keflavíkurflugvallar er þess fullviss að úttekt Ríkisendurskoðunar leiði í ljós að við sölu fasteigna á Keflavíkurflugvelli hafi í einu og öllu verið farið eftir lögum um Þróunarfélag Keflavíkurflugvallar.  Ennfremur að unnið hafi verið samkvæmt þeim skilyrðum og fyrirmælum sem félaginu voru sett.  Tilgangurinn með stofnun Þróunarfélagsins var meðal annars að koma fasteignum í eigu ríkisins á Keflavíkurflugvelli sem fyrst í arðbær borgaraleg not með það markmið að jákvæð samfélagsleg áhrif verði sem mest og neikvæð áhrif á nærsamfélagið verði haldið í lámarki.  ´

Í þjónustusamningi Þróunarfélagsins við ríkið er kveðið á um markmið, umboð og heimildir Þróunarfélagsins.  Félagið var stofnað 24. október 2006 og hefur starfað faglega samkvæmt þjónustusamningi sem undirritaður var 9. desember sama ár.  Þróunarfélagið hefur frá upphafi kallað eftir áhugasömum aðilum með hugmyndir um nýtingu eigna á svæðinu, meðal annars með áberandi auglýsingum með vísandi í upplýsandi vef félagsins, þar sem allar óseldar eignir ríkisins á svæðinu eru kynntar og söluskilmálar tíundaðir."                                                                                             

Stjórn Þróunarfélags Keflavíkurflugvallar                                                                                  

Magnús Gunnarsson

Árni Sigfússon

Stefán Þórarinsson

Mál þetta snýst ekki um hvort farið hefur verið að lögum eða ekki, heldur er deilt um hverjir fengu að kaupa þessar eignir langt undir eðlilegu markaðsvirði og svo hitt sem ég tel auðvita vera algera tilviljun að flestir kaupendur eru tengdir Sjálfstæðisflokknum.  Það er nokkuð vitað fyrirfram hver verður niðurstaða Ríkisendurskoðunar enda er sjálfur ríkisendurskoðandi líka endurskoðandi Þróunarfélags Keflavíkurflugvallar.  Ég tek undir með Árna Sigfússyni að best sé fyrir alla að fá allt þetta mál upp á borðið og spara stóryrði áður en það er gert.  Það var eitt sinn sagt; "Að sá sem ekki kann að fela.  Hann skal ekki stela."  Með þessum orðum mínum er ég ekki að ásaka einn né neinn, aðeins að benda á, að þar sem orðið hafa miklar deilur um þetta mál er best að skoða það vandlega og fá allar staðreyndir málsins upp á borðið , ekki vera að fela neitt.  Ég þykist vita að þeir menn sem skipa stjórn Þróunarfélags Keflavíkurflugvallar eru heiðarlegir og traustir menn og þeir hafa unnið á þann hátt sem þeir hafa talið á hverjum tíma að væri best.

 

 

 

 

Fuglaflensa

Alþjóða heilbrigðisstofnunin, WHO, sagði í dag að tveir úr sömu kínversku fjölskyldunni hefðu smitast af fuglaflensuveirunni H5N1 og óttast væri, að smit hefði borist að milli þeirra. Sonurinn lést á sunnudag en faðirinn byrjaði að sýna einkenni á mánudag og er nú á sjúkrahúsi.

Nú fer málið að verða alvarlegt ef þetta er farið að smitast á milli manna.  Þá er hætt við miklum faraldri, sem gæti haft hræðilegar afleiðingar og hundruð þúsund ef ekki milljónir manna látist.  Þetta er hræðileg frétt.

Óttast að fuglaflensa hafi smitast milli manna

Bátur hvarf

Undirbúningur var hafinn fyrr í morgun að eftirgrennslan eftir bát sem ekki svaraði kalli og var horfinn af sjálfvirka tilkynningakerfinu. Þyrla landhelgisgæslunnar var undirbúin undir leit, en báturinn birtist svo á tilkynningakerfinu og hefur því líklega verið um einhvers konar bilun að ræða.

Þetta er mjög algengt en þar sem símar eru um borð í nær flestum bátum á að vera auðvelt að hafa samband, en það hefur kannski verið bilað líka.  Annars þarf ekki alltaf að koma bilun til, því víða á svæðinu sem hið sjálfvirka tilkynningakerfi nær yfir eru svokallaðir dauðir blettir og dettur þá viðkomandi bátur úr sambandi.

Bátur sem hvarf af tilkynningakerfi kom í leitirnar

Á að láta gamla fólkið þræla sér út

Ég fagnaði mikið við þær fréttir, að nú loksins ætti að bæta kjör aldraðra og öryrkja.  En þegar betur er skoðað finnst mér ósköp lítið bæta kjör hjá flestum.  Að vísu geta nú þeir sem eru á aldrinum 67-70 ára haft tekjur kr. 1.200.000,- á ári án þess að bætur þeirra skerðist en áður var búið að samþykkja lög um að þeir sem væru orðnir 70 ára mættu hafa eins miklar tekjur og þeir gætu án skerðingu bóta.  Líka er fellt úr gildi að tekjur maka skerða ekki bætur, en ekki það gagnast neitt þeim sem ekki eiga maka eins og t.d. ég.  Hefði nú ekki verið nær að lagfæra bæturnar svo gamla fólkið þyrfti ekki að fara út á vinnumarkaðinn á svipuðum aldri og fólk er yfirleitt að draga sig í hlé frá störfum.  Hefði ekki verið nær að við sem yngri erum fengjum að fara líka út á vinnumarkaðinn og gamla fólkinu væri gert kleyft að vera heima og lifa af sínum bótum.  Það má ekki gleyma að þetta eru ekki eingöngu útgjöld hjá ríkissjóði, því af allri vinnu hvort sem fólk er öryrkjar eða ekki er greidd staðgreiðsla skatta 35,72% sem að stórum hluta fer aftur í ríkissjóð.  Einnig er rétt að benda á að eftir því sem öryrkinn er yngri á hann meiri möguleika á að fá vinnu en fólk sem orðið er um 70 ára.  En þetta er kynnt sem byrjunin á bættum kjörum og vonandi kemur eitthvað skárra í ljós seinna, er því ekkert annað að gera en að bíða og vona og reyna að bjarga sér.  Ég t.d. er menntaður á sviði bókhalds, fjármála og tölvuvinnslu og get því auðveldlega unnið flest skrifstofustörf.  Ég hef sótt um mjög mörg störf en alltaf þegar ég segist vera fatlaður öryrki, er mér hafnað.  Það vantar einhverja stofnun sem sérhæfði sig í atvinnumiðlun fyrir öryrkja, en á meðan ég bíð eftir einhverjum meiri breytingum, verð ég bara að halda áfram að færa bókhald fyrir hina ýmsu aðila og vinna það SVART.

Skutu bónda til bana

Ísraelskir hermenn skutu palestínskan bónda til bana í dag nærri bænum Khan Yunis á Gasa-svæðinu, þá særðist annar. Ísraelski herinn segist ætla að kanna atvikið en í gær bárust fregnir af því að eldflaugum hefði verið skotið í átt að Ísrael á þessum slóðum.

Þessi bændur hafa sjálfsagt verið stórhættulegir og réttdræpir, til að verja Ísrael.

Ísraelskir hermenn skutu bónda til bana

Vina-brask

Nú er að koma í ljós að sjálfstæðismenn hafa heldur betur matað krókinn með kaupum á eignum á Keflavíkurflugvelli.  Meira að segja bæjarfulltrúar í Reykjanesbæ, sem kjörnir eru til að gæta hag sinna íbúa, nýta tækifærið og kaupa eignir á þessu svæði og eru þar bæði í hlutverki kaupenda og seljanda.  Og til að bæta gráu ofan á svart á svo að fá Ríkisendurskoðun til að endurskoða sín eigin verk og blessa þetta allt saman.  Því miður eru þeir alþingismenn sem gagnrýna þetta sem mest ekki með íbúa Reykjanesbæjar í huga aðeins upphlaup til að vekja athygli á sjálfum sér.  Þeir meina ekki eitt einasta orð í sinni gagnrýni og enginn tekur lengur mark á VG, sem hafa hæst, því allir eru fyrir löngu orðnir hundleiðir á þeirra málflutningi því þeir eru alltaf á móti öllu sem gert er.  Árni fjármálaráðherra má þó eiga það að hann hugsar um sína ættingja og sitt fólk. 

Bush

George W. Bush, forseti Bandaríkjanna hefur sent Kim Jong-il, þjóðarleiðtoga N-Kóreu bréf. Cristopher Hill, erindreki Bandaríkjamanna afhenti bréfið, en hann hefur lokið þriggja daga heimsókn í landinu.

Tilgangur heimsóknar Hill var að kanna niðurrif kjarnakljúfsins í Yongbyon.            N-Kóreumenn hafa samþykkt að hætta kjarnavopnaáætlun sinni í skiptum fyrir aðstoð og ýmsar tilslakanir á refsiaðgerðum. 

Hvað ætli hafi nú staðið í bréfinu frá Bush?  Varla hefur hann sagt, elsku vinur og félagi.  Það væri fróðlegt að vita meira um innihald þessa bréfs.  Ég efast um að Bus hafi verið að bjóða einhverjar, að'stoð, miklu líklegra að hann hafi verið að hóta stríði.  En manngreyið hann Bush er stríðsóður og er á góðri leið með að slá þeim við, Hitler og félögum hans.   

Kim Jong-il fékk bréf frá Bush

Íbúafjöldi

Samkvæmt nýrri spá um mannfjölda á Íslandi verða landsmenn 437.844 árið 2050 en íbúafjöldi var 307.672 við upphaf spátímabils hinn 1. janúar 2007. Árleg fólksfjölgun verður 0,8% á spátímabilinu sem er heldur minni fjölgun en var á 20. öld.

 

Að því er kemur fram á vef Hagstofunnar geta íslenskir karlar vænst þess við lok spátímabilsins að vera 84,6 ára en meðalævilengd kvenna verður 87,1 ár.

Vegna lengri meðalævi og lækkaðrar fæðingartíðni verða talsverðar breytingar á aldurssamsetningu þjóðarinnar. Öldruðum mun fjölga verulega á spátímabilinu einkum undir lok þess. Í dag tilheyra elstu þjóðfélagsþegnarnir óvenjufámennum fæðingarárgöngum sem fæddust á kreppuárunum.

Eftir 2030 þegar fjölmennir árgangar eftirstríðsáranna komast á eftirlaunaaldur mun hlutfall aldraðra hækka verulega. Árið 2050 verða 7,5% íbúa áttræðir eða eldri samanborið við 3,1% við upphaf spátímabils.

Þótt gert sé ráð fyrir því að barnsfæðingum fækki nokkuð á spátímabilinu verður fæðingartíðni áfram há í evrópsku samhengi. Íslenskar konur geta í dag vænst þess að eiga rúmlega 2 börn um ævina. Þetta hlutfall mun haldast óbreytt til 2015 en lækka síðan jafn og þétt í 1,85 við lok spátímabils.

Vegna fremur hárrar fæðingartíðni verða börn og ungmenni hlutfallslega fjölmenn hér á landi. Árið 2050 mun fjórðungur íbúa tilheyra aldurshópnum 0-19 ára en í dag er þetta hlutfall 28,8. Fólki af erlendum uppruna mun væntanlega fjölga í framtíðinni.

Hagstofa Íslands gerir r ekki sérstaka spá fyrir innflytjendur en vegna aukins aðflutnings fólks frá útlöndum verður hlutfall einstaklinga sem fæddir eru í útlöndum hærra en verið hefur.

Í spánni er gert ráð fyrir að tíðni flutningsjöfnunar verði rúmlega 3 af hverjum 1.000 íbúum á komandi áratugum. Þetta er heldur lægri flutningsjöfnuður en í Noregi og Svíþjóð en hærri en í Danmörku og Finnlandi.

Við ættum að taka okkur til fyrirmyndar íbúa í Bolungarvík , en þar halda árlega sína ástarviku sem á að nýta til þess að búa til börn.  Ef við gerðum það er ég viss um að við yrðum á milli 500-600 þúsund árið 2050.  En þá verð ég einmitt 100 ára og eins og ég hef áður sagt frá þá atti langafi minn Kristján frá Stapadal í Arnarfirði 18 börn með tveimur konum og það síðasta þegar hann var 82 ára gamall.  Ég gert varla verið minni maður en hann og þar sem það eru 25 ár þar til ég verð 82 ára og 53 ár í 100 áraaldurinn gæti ég auðveldlega eignast 25 börn í viðbót við þau 4 sem ég á nú þegar.  Er ég þar að miða við 82 ára aldurinn, en ef ég miða við 100 ára aldur, sem ég næ alveg örugglega þá gætu bæst við 53 börn.  Það er að vísu eitt smá vandamál, en það er að ég er fráskilinn og vantar því konu og til að þetta yrði nú aðeins auðveldara væri betra að hafa konurnar tvær.  Hugsiði bara ykkur allar barnabæturnar og fæðingarorlofin, þetta yrði lúxuslíf.  Ég heima að passa börnin og tvær konur í fullri vinnu.

Landsmenn 437.844 árið 2050?

Ég vissi það, ég vissi það

Ég skrifaði á þessari síðu fyrir stuttu um dag fatlaðra og þar sagði ég eftirfarandi um kjör öryrkja:

"Eina von okkar er sú að um næstu áramót á þessi málaflokkur að flytjast í ráðuneyti Jóhönnu Sigurðardóttur sem er sennilega eini þingmaðurinn á hinu háa Alþingi sem lætur bág kjör þeirra, sem minna mega sín í okkar þjóðfélagi sig einhverju varða.  Hún er ekki að bara að tala og tala, heldur lætur hún verkin tala."  Og hvað skeður,í gær kynnir Jóhanna sínar tillögur um bætt kjör aldraðra og öryrkja og er búinn að berja þetta í gegn í ríkisstjórn og ætlar að byrja á að hrinda þessu í framkvæmd strax á næsta ár.  Í Kastljósþætti í gær var rætt við Jóhönnu um þessi mál og þar sagði hún að þetta væri búið að samþykkja í ríkisstjórn og kostaði bara á næsta ári 5 milljarða og síðan kæmi meira á eftir.  Þegar hún var spurð hvort þetta væri ekki ansi mikið, svaraði hún að þetta væri aðeins byrjunin og meira myndi fylgja á eftir.  Síðan benti hún á að það væri víða verið að leggja vegi og grafa jarðgöng fyrir miklu hærri upphæðir og án þess að gera lítið úr því sagði hún að sínar aðgerðir væru til að aðstoða lifandi fólk í lífsbaráttunni.  Ég vil því hvetja alla sem vilja styðja baráttu öryrkja að senda tölvupóst til Jóhönnu á netfangið "[e-mail] með eftirfarandi texta:

 "Ég þakka þér fyrir baráttu þína við að lagfæra kjör aldraðra og öryrkja og vonandi verður haldið áfram, þar til kjör þessa hópa eru orðin mannsæmandi, sem og þeirra sem nú lifa við fátæktarmörk vegna lágra launa og þeir geti lifað eðlilegu lífi eins og annað fólk."  

Eftir því sem fleiri taka þátt í þessu munu áhrifin verða meiri og fleira verður gert.  Það styttist óðum í gerð nýrra kjarasamninga og vitað er að margt fólk fær ekki hærri laun en strípaða lámarkstaxta. sem í dag eru ekki nema 125 þúsund á mánuði en verkalýðshreyfingin hefur lagt fram kröfu um að þessi laun verði ekki lægri en kr: 180 þúsund á mánuði og að skattleysismörk verði hækkuð úr 90 þúsund í 200 þúsund.  Þar sem ríkið er einn stærsti vinnuveitandinn sem er að greiða þessu lágu laun og ég tel nokkuð víst að Jóhanna mun beita sér í því líka ef hún fær fjöldann af tölvupósti.  Við getum náð ótrúlegum árangri ef nógu margir standa saman.

Fyrir nokkru síðan var í fréttum að ákveðinn atvinnuveitandi á Ítalíu stóð í kjaradeilu við sitt starfsfólk og til að sanna hvað auðvelt væri að lifa af þeim launum sem hann greiddi, ætlaði hann að sýna sínu starfsfólki að hann gæti auðveldlega lifað ágætis lífi af þessum launum.  Hann tók sig síðan til og lét greiða sér þessi laun og svo reyndi hann að spara allt, sem hann gat og sanna að þetta væri ekki erfitt.  Eftir 20 daga var manngreyið orðinn svo blankur að hann átti ekki einu sinni fyrir kaffibolla og þá gafst hann upp og hækkaði launin.  Væri nú ekki tilvalið að einhver þingmaður eða ráðherra reyndi að lifa á launum sem væru 125 þúsund á mánuði.  Ég þori að leggja höfuðið að veði að enginn þeirra gæti það.